Gedanken taun Einheitsdag 2004

vun H. Jürgen Grebin

Düütschland — einig Varrerland, so dacht un hannelt Hans Modrow 1989, as hei von Gorbatschow trüchkamen is.
Mien Land güng in'n Westen, verlaten von sien eigen Lüüd. Man blot, nich all hebbt dat so wullt, tau schnell keem oewer ehr de Will, tau ännern unihrlich Spraak un Tiden von Wuurdlosigkeit un Verlatenheit.
Swartrotgollen Fahnen, Westgeld as Lockmiddel — würd'n bröcht ut Nahwersland — leet se ganz vergäten, wat ehr bläuden würd', wenn de Einheitsbrei vergäten un dat "Geld regiert de Welt".
"Ut Schaden ward man klauk — so schriwwt dat Läben ook ein Bauk", seggt de oll Glasermeister ut Rühn bi Bützow — uns plattdüütsch Lüd ut Rostock hürten nipp tau, doch sei künnen nu nicks mihr ännern, nu wiert tau lat.

Wat is mi bläben?
Taun Glück mien Mudderland, mien Heimat, mien Mäkelborg! Kinnerdach erinnern an de Muddersprak, de uns ümgeef, un ok an't Läben in'n Krieg un von "Dach tau Dach" up ein Dörp in'n Klützer Winkel.
An Ungliekes, Ungerechtes, Ünnen un Baben müßt ick nu denken. Doch allens is mi so fast in mien Hart un Erinnerung bläben — woll weil uns Mudder sick wi ein Gluck vör uns stellt hett, an schlechten un gauden Dach, sick nich schonte för uns fief Kinner. Sei säd ümmer: "Wo Warer wier, kümmt Warer werrer!" un "Un wenn du denkst, dat geiht nich mihr, dann kümmt von irgendwo ein Lichtschien her!"

Hüt ward secht von de Politikers un ok von anner Lüd oewer disse Tiet, de nu all föfteihn Johr achter uns licht, von den Harwst 1989: " Wende, friedliche Revolution, Implosion der DDR, Konterrevolution, protestantische Revolution, Umbruch, Umsturz, unvollendete Revolution, feindliche Übernahme, erster Schritt zur Einheit Deutschlands, Zeit für Lumpis, die westwärts gingen und ostwärts kamen, Rückwende."

De välen Utdrücke maken keine Tofrädenheit dütlich, mihr ein "Dor mütt sick noch wat ännern, so koenen wi nich läben, so kann dat nich wierergahn!"
Ännern ward sick woll ierst wat, wenn ok nu de Mahnung verstahn ward:

"Wenn de Ünnen nich mihr willen un de Baben nich mihr koenen!"
Kamen ward dat, so wie't Amen in de Kark, davon bün ick oewertügt!
Blot wie lang dat noch duert — wer weit? Villicht denn, wenn de Jungen von hüt sick nich mihr allens gefallen laten?
De Mandachdemos bi uns in Rostock un in väle Urte in Ost un West koen'n je woll nicks doran ännern.
Dor fählt woll dit Mal de Nahwer ut'n Westen, wie dormals in't 89er Johr.
De kamen mit ehr Wollen nich ut'n Knick, koenen sick nich vörstellen oder dortau dörchringen, ein einig Volk tau demonstrieren.

Kümmt aewer noch, dorvon bün ick aewertügt!

De nu inne EU vereinigten Polen up uns östliche Siet — erfohren in Massendemos — wullen mit de Düütschen wägen slechter Erfohrung nicks tau daun hebben. Von de is ok nicks tau hoffen.