Wedder up'n letzten Platz

vun Behrend Böckmann

Dei "Eurovisons Song Contest" is dat gröttst Musikbeläwnis, dat dei Europäische Rundfunkunion (EBU) för dei Unionsmaaten in mihr as 50 Länner organisiert un wür 2023 wägen dei Ümstänn' inne Ukrain gägen dat Reglemang von Kiew nå Liverpool verlecht. Un dormit dit Fest mit väl Musik un Gesang ornlich aflopen süll, hett 'n sogor up 'n Video-Botschaft von Wolodymyr Selenskij afseihn un leet dorför Herzogin Kate, dei Gattin von Prinz Williams mit väl Upseihn up'n Klimperkasten spälen. Doch ihrer as dat so wiet wier, geef dat dei natschonale Utwåhl in jedet Land un dei Sieger wier sik dei Reis nå Liverpool wiss. Dor geef dat denn œwer dei Wäk dat Rennen un 26 Länner hemm't inne Endrunn schafft.

Bi dei düütsche Utwåhl "Uns Lied för Liverpool" künn dei Hamborger Band "Lord Of The Lost" (Herr von dei Verlorenen) mit "Bloot & Glitter" (Blaut un Glitzer) afrümen un wür hushoch dei Winner. Sänger un "Frontmann" in disse Band is dei Muskant Christian Simon Krogmann (Johrgang 1980), dei sik denn Künstlernåmen Chris Harms taulecht hett. Sien Leiw tau dei Musik füng in't Kindsöller mit 'n Kniefiedel an, anner Instrumenten keemen bald hentau, mit föfteihn schrifft hei sien ierstet Lied, mit söbenteihn spält hei in't Schaulthealter von sien Waldörpschaul den Mackie Messer inne Dreigroschenoper; hei wull Dokter warden un finnt denn harte Musik gaut, grünnt 'n Band, is Sänger un Gitarrist, grünnt 'n niege Band, studiert Tontechnik un ward as Lihrer dat anner Muskanten bibögen, nimmt sik den schwedschen Sänger Per Gessle von't Pop-Duo "Roxette", un wat Kledåschen un Bemålung angeiht, Lady Gaga tau Ogenspeigel. Af 2009 is hei Sänger un Gitarrspäler vonne Band "Lord Of The Lost", af 2017 billen denn Chris Harms un vier anner Muskanten dei glieknåmig Band, so as sei in Liverpool tau seihn un tau hürn wiern. Harte Musik von Hardrock œwer Heavy Metal bet Dark Rock finnen's gaut, sei wiern all in Wacken dorbi, un äben disse Rockmusikrichtung güng Chris Harms wull dörch'n Kopp, as hei Tekst un Musik tau "Blood & Glitter" tau Popier bröcht hett. Mit 'n nådenklichen Tekst œwer dei Up un Dål in't Läben, œwer gaude un lege Tieden, œwer dat, wat wier, un dat, wat kümmt, un dat wi all datsülwig Blaut hemm' — œwer allns dat "performens" (dat dinglisch Wurt för vördrägen, vörmåken, vörspälen) ehr Lied in rode Kledåschen mit enge Büxen un väl Farf in't Gesicht. Dei Bifall nimmt kein Enn'. Ja, dat is dat, wat Düütschland in Liverpool 'n gauden Platz bringen künn.

Un so seet Harms ok tauversichtlich up't Rode Sofa von'n NDR un vertellt, dat hei dörch dat eigen Beläben up den Infall tau dit Lied keem. Inne Wedderkehr heit dat:
"Säut un bitter, wi sünd so glücklich, wi kœnen starwen..."

So as dei vosshorig Sänger Michael Schulte den Dod von sienen Vadder as vierteihnjährig Kind an'n Wihnachtsdach beläwt hett un dit Fäuhlen 2018 in sien ESC-Lied "You Let Me Walk Alone" (Du leetst mi dissen Wech allein gåhn) Utdruck geef un dormit up Platz vier lannt is, so hett ok Lord Harms wat beläwt, wat hei nich vergäten kann. As hei 2000 up'n Party in'n Bunker anne Feldstråt up't Hamborger Hilligengeistfeld wier un gägen Klock drei an'n Morgen 'n jugoslaw'sche Handgranate inne Luft güng, kreech hei por vonne lütten Stahlkugeln ut'e Granat af. Hei wür dull verletzt, schwäwte in Läbensgefohr, un noch hüt sitten por Splitter in sienen Lief. Dat mach ok 'n Grund dorför sien, dat Lord Harms, wenn hei nich as upfidummter un œwerkandidelter Muskant up'e Bühn steiht, so as jeder anner Börger in Hamborg-St. Pauli läwt. Hei wiest Drogen, Köm un Fleisch von sik, is verfriecht mit Stäkersch (Tätowiererin) Anja un sei hemm' tausåmen den Sœhn Mika.

Un dei Band schafft dat, för Düütschland in Liverpool dorbi tau sien un kümmt åhn
Vörutwåhl in't Finale un landt den up 'n iersten Platz — von hinnen. Dat Unmœgliche wür mœglich, mit Trånen inne Ogen möt 'n sik achter dei Lappen verhålen, as nich ganz acht Milljonen Taukiekers in't Kiekschapp beläben, woans dei düütsche Lord up'n letzten Platz keem!!! Ok hemm' dei wedder upfallenden Plünnen von Barbara Schönbarger nich hulpen, wieder vörn tau lannen. Œwer Düütschland is all mihrmåls up'n letzten orrer vörletzten Platz lannt. Denken wi blot an Ann Sophie 2015 in Wien, Jamie Lee ward 2016 in Stockholm dei Letzt, dat Popduo "Sister" lannt 2019 in Tel Aviv up'n tweitletzten Platz, Jendrik Sigwart geiht dat 2021 in Rotterdam nich anners un Malik Harris wür 2022 in Turin wedder dei Letzt.

Dei Band "Lord Of The Lost" kann liekers bäten stolt sien, denn dat 11. Studioalbum "Blood & Glitter" is taun Nummer-eins-Album upstägen.