vun Behrend Böckmann

Hemm Sei sik dei Euroschiens eentlich mal wat nauer anseihn? Wat is dor up afbillt? Dat sünd Buwarken — œwer nüms von uns hett dei annerwägens as up dei Geldschiens jemals seihn. Denn düsse Buwarken gifft dat gor nich. Sei salln blots symbolisch för bestimmte europä'sche Stil-Epochen ståhn. Geldschien-Tourismus unmöglich!

Man ok dat sall sik nu ännern. Nie Euroschiens sünd vörseihn, un twei Design-Philosophien ståhn in Konkurrenz: dat Thema Natur gägen dei Biller von beropen Minschen.

Thema: Natur

Dei Rat vonne europä'sch Zentralbank will sik bet Johresenn schlüssig warden, wat för Biller up dei niegen Euroschiens aflicht warden, denn af 2030 künnen dei nie bebillerten Schiens druckt un denn pö a pö in Ümlop kåmen. In'n Momang gifft dat sössdig Design-Vörschlääch för söss Schiens, un twors ümmer dreimål Stromen un Vågels — Vågels, dei in uns Stromlandschaften tau Hus sünd un taun tweiten bekannte Europäer, dei för dei europä'sche Kultur von Bedüdung sünd. Ünner Stromen un Vågels is ümmer ein un deisülwig Vågel dreimål verschieden afbillt un dei Rat vonne EZB will dörch 'n Onlein-Ümfråch dei Winnerbiller utmåken. Dei söss Vågels, dei dreifach tau Utwåhl ståhn, sünd:

• Fief-Euroschien — Muerlöper (Mauerläufer),
• Teihn-Euroschien — Iesvågel (Eisvogel),
• Twinnig-Euroschien — twei Immenfräter (twei Bienenfresser),
• Föfdig-Euroschien — Adebor (Weißstorch),
• Hunnert-Euroschien — Klüüt, Kluut, Kroontje (Säbelschnäbler),
• Tweihunnert-Euroschien — Jan-van-Gent (Basstölpel).

Dei Muerlöper (Tichodroma muraria) as 'n buntfedderter Sänger hett ok denn Ökelnåmen "Alpenkolibri", is also in alpine Rebeits antaudräpen.

Dei Iesvågel (Alcedo atthis) wür in't verläden Johrhunnert wägen sien klorigen Feddern dull schasst, denn dei wiern dei Putz an männig Haut för vörnähm Frugenslüd. Dor hei so nåstellt wür, is hei up'e Rode List tau finnen un in väle Länner ümmer mål wedder dei Johresvågel.

Dei Immenfräter (Merops apiaster), hei läwt von Immen, Schillerbück (Libellen) un Grashüppers, ward hier un dor för'n Immenboompicker (Bienenspecht) hollen. Hei föllt dörch sien üppig kolorig Fedderkleid up. Dei Klimawannel måkt em dat Läben in Düütschland leichter, liekers deit hei noch in Afrika œwerwintern.

Dei Adebor (Ciconia ciconia) is einer vonne gröttsten Vågels in Europa. Hei is 'n Sägelfleiger un hei kann sihr olt warden. Dörch Landwirtschaft un Klimawannel kricht hei oft nich nauch in'n Schnabel un hei hett Not, sik dormit aftaufinnen. Ok wennn't em noch nich ganz lech geiht, steiht hei all up'e Rode List.

Dei Klüüt, Kluut, Kroontje (Recurvirostra avosetta) heit up hochdüütsch Säbelschnäbler orrer ok lütter Kranich. Sien Schnåbel is 'n Säbel ähnlich un in'n schwatt-witt Fedderkleid is hei gaut tau erkennen, wenn hei in't Wattenmeer vonne Nuurdsee ümherstolziert.

Jan-van-Gent (Morus bassanus) is dei plattdüütsche Nåm för'n Basstölpel, 'n tolpatschigen Vågel, dei sien Nest in Felsenwänn von Inseln bucht un von Fischen läwt. In Düütschland is hei blot up Helgoland tauhus. Of dat mal ein Beleidigen för einen echten Jan van Gent wäsen is ("So'n tüffeligen Minschen as düsse Vågel"), is hüt nich miehr fasttaustellen.

So wiet wat tau dei mœglich Vågelwelt up dei niegen Euroschiens.

Thema: Beropen Minschen

Beseihn wi uns nu doch dei Groten ut Europa, dei dat up 'n Euroschien schaffen künnen. Dat sünd drei Manns- un drei Frugenslüd:

• Fief-Euroschien — Maria Callas
• Teihn-Euroschien — Ludwig van Beethoven
• Twintig-Euro-Schien — Maria Sklodowska-Curie
• Föftig-Euro-Schien — Miguel de Cervantes
• Hunnert-Euroschien — Leonardo da Vinci
• Tweihunnert-Euroschien — Bertha von Suttner

Maria Callas (1923—1977), 'n Griechin mit italjän'schen Pass wier 'n weltbekannte Sopranistin in't 20. Johrhunnert. Sei künn 43 Opernpartien un Arien ut 34 anner Opern œwer drei Oktaven henwech singen.

Luten van Beethoven (1770—1827), 'n düütscher Komponist un Klavierspäler, dei all inne Jugend nich gaut hüren künn, is in't Öller von 48 Johren (üm 1818) ganz un gor gehürlos. Liekers komponiert hei un an'n 7. Maimånd 1824 ward sien
9. Sinfonie mit den berühmten Chor "Ode an dei Freud" von Fiete Schiller, dei hütig Europa-Hymne, in Wien tau Gehür bröcht.

Maria Sklodowska-Curie (1867—1934), in't dunnemals tau Russland gehörig polnisch Warschau geburn, studiert in Paris, forscht an Uranverbinnungen un lecht dormit den Grundstein för dei "Radioaktivität". Disse Forschungen hemm' ehr 1903 denn Nobelpries för Physik un 1911 denn Nobelpries för Chemie inbröcht.

Miguel de Cervantes (1547—1616), Soldat tau Land un tau See, Slav in Algier, Marine-Furier, Stüerinhåler, achter Trallen... is dei weltbekannte span'sche Natschonaldichter, dei mit sienen Roman "Don Quichote" gliek achter dei Bibel up'e Bestenlist rangert. 1605 kümmt dei ierste Deil von den Roman un teihn Johr låters die tweite Deil rut un alle Welt kann dei sonnerboren Begäbenheiten von den inbillten Ridder un den Kampf gägen Windmœhlen läsen.

Leonardo da Vinci (1452—1519) gellt as 'n Renaissance-Universalschanie, denn hei wier Maler, Naturforscher un Erfinner. Sien weltberühmtet Bild "Mona Lisa"
ward hüt in't Pariser "Musée du Louvre" un dat äbenso bekannte Wandbild "Dat Åbendmahl" von 8,8 x 4,6 m in't Mailänner Dominikanerkloster bewunnert. Skizzen von Fleiger, Panzer un anner Kriegsgerätschaften, Fallschirms,Winnen un Käden in un an Maschinen hett hei sik utdacht un tau Popier bröcht un nå dei Lihr von denn röm'schen Architekten Vitruv (ierstet Johrhunnert vör J.C.) teikent Leonardo den för dei Anatomie int'ressanten nåkelten Mann "Dei Vitruvianische Mensch", den wi hüt as Logo up dei Vörsied von all Gesundheitskorten vonne gesetzlichen Krankenkassen finnen.

Bertha Sophia Felicita Freifrau von Suttner, geborene Gräfin Kinsky von Wchinitz und Tettau (1843—1914) wier 'n Schriewersfru un mit hütig Wür 'n Frädensaktivistin. So heit ok ehr bekanntester Roman "Die Waffen nieder!".
Dörch Taufall kümmt sei in Paris Alfred Nobel inne Quer, ward för'n korte Tiet bi em anstellt, un wie dat Läben so spält, 1901 ward sei as ierste Fru mit denn Nobelpries för Literatur utteikent.

Wecker ganz niegelich is, dei kann sik dei sössdig Utwahl-Biller för dei niegen Euroschiens all in't Internet anseihn un ok an dei Ümfrag deilnehmen.

Dei Alternatiev

Ik sülwen fünn ja dei Idee mit dei Fantasie-Buwarken gor nich so slecht. Dat hett wat Ehrliches, denn Geld is ja doch alltohoop ein Fantasieprodukt. Båventau: Wat in't Riek von dei Fantasie licht, kann nüms för sik in Ansprook nähmen — dor gifft't kein Striederien, wat dor tau väl Manns- orr Frugenslüd, düütsche orr annere Naschonen usw. vertreden sünd un wat dei Afbillten dat ok würklich verdeint hemm. Also: Fantasie ja!

Europa hett œwer doch so väl Kultur in dei Welt bröcht dörch dei välen Persönlichkeiten! Sullen also nich solk Lüd afbillt warden? Up dei anner Siet sünd dei Vågels ein schöne Idee, so unschüllig. Jederein mach Dierten lieden. Kann man nich all drei verbinnen? Fantasie, beropen Persönlichkeiten un Dierten? Hier mien Vörschlach: Wi nehmen för allens Vågels, dei dat gor nich gifft un dei dör ehr Leistungen in Kunst un Wätenschap beropen sünd!

• Fief-Euroschien: Up düssen Schien warrt Pocki, dei Funkelstiert (picus ardens) afbillt, ein Specht-Aart. Dei Funkelstiert Pocki hett nåwieslich 1820 (un damit düüdlich vör Samuel Morse) dei Kommunikaschon mit Kloppteiken erfunnen.
• Teihn-Euroschien — Melusine, ein Saphirflügel-Auror (Auroraphilum sapphiris), ein Vagel mit lüchtend blaue Flünken. Melusine hett dat Sapphirium entwickelt, einen intensiven blågen Farbstoff, dei Geldschiens fälschungssäker makt. Dorför hett sei den Chemie-Nobelpries wunnen. (Wenn schon Fantasie, denn richtig!)
• Twintig-Euro-Schien — Fauxi, dei Nebelschimmer (Vaporiavis Caeruleus), hei hett dei Kriegskunst tau sien Tied (17. Johrhunnert) revoluschoniert un dei Isländsche Armee tau'n Sieg in'n Dörtigjohrigen Krieg föhrt. (Wenn schon Fantasie...)
• Föftig-Euro-Schien — Vistuverga, dei legendäre Måndschatten-Kolibri (Nocturnus lunacolis). Sei hett dei aktive Transparenztechnik entwickelt un is siet dei Tied unsichtbor. Dorwägen weit nüms, wat sei noch läwt; in den Volksglowen gellt sei as unstarvlich.
• Hunnert-Euroschien — Noctua Minervae, de Uul vun Athene, as Symbool för europä'sche Wiesheit un Kultur.
• Tweihunnert-Euroschien — Phönicopterus ignicresta, dei Phönix, as Symbool för Europa, dat ümmer wedder ut dei Asch upstiegt.

Mi dücht düsse Lösung salomonisch. Hemm Sei noch bäter Vörschlääch? Denn koenen Sei sik ja an dei Zentralbank wennen!