Wedderböstig Minschen

vun Behrend Böckmann


Dat gifft väle Bewägungen un Krings, dei mit ehr Sorgen üm den minschlichen Ümgang mit Planten un Dierten ok männigmål för Upseihn von sik sülben sorgen. Dor gifft dat Greenpeace, BUND, NABU, Robin Wood, WWF Düütschland, Düütsche Ümwelthülp, Düütscher Naturschutzkring, Vier Poten, PETA, Provieh, IFAW un mennig annere.


In'n Grundsatz hemm sei ja recht: Ümweltdemo

Sei all wedden üm uns Natur un Ümwelt, setten œwer ok all up 'n anner Pierd. Ehr philosophischen Infäll wannern hen un her twüschen dei anthroposophisch Lihr von Rudolf Steiner orrer dei praktizierte Landwirtschaft von Johann Heinrich von Thünen up Gaut Tellow in Mäkelnborg, twüschen biblische un esoterische, twüschen wirtschaftliche un politische, twüschen normale un splienige, twüschen demokratische un populistische Ansichten, twüschen Mischungen ut Düsterrod un noch mihr Düsterschwatt. Un dat denn regional, national un global... un all disse Krings un Organisatschonen verspräken, so tau hanneln un tau wirtschaften, dat nicks för dei eigen Tasch œwerblifft, un setten sik taun Bispill dorför in, dat 'n drööchlecht Mur wedder natt ward, Böm wedder so as in'n Jumfernholt wassen, dei Wål nich mihr jaacht ward, dei Farken mit Spältüch upwassen, dat Streuner ut Rumänien düütsche Hushunn' warden, alban'sche Zirkusboren in'n Gnådenholt "borengerecht" läben, Mohnblaumen an'n Ackerrämel bläuhn, dei Biber wedder bi uns tauhus is, dat Fleddermüs ünner't Dack nich stürt warden un dei Adebar sien Jungen uptrecken kann, 'n Rüsseldiert nich mihr in'n Zirkus tau seihn is...


Blöhstriepen an'n Ackerrämel sünd ein Verdeinst von Aktivisten. Dei Natur höört nich den Kommerz tau

Un dor gifft dat noch dei Adepten von "Extinction Rebellion", dei mit uns Demokratiemodell — so näumt Oltkanzlersch Angie dei düütsche orrer abendlännisch Ordnung — äbenso as Putin dormit nich taurecht kåmen un Frieheit un Minschenihr för sik as grenzenlos utleggen, sik för dei Allerkläuksten hollen un sik as obsternatsche Minschen mit wedderböstigen Börgersinn gägen uns Demokratie — uns abendlännisch Demokratie un nich dei antike Demokratie — upböömen. Un dit Upböömen süht denn so ut, dat 'n up Stråt geiht un dei "witten Männer" anklåcht, sik up'e Läusen vonne Stråtenbåhn setten deit orrer vör't Bundskanzleramt dåchlang so lang hungern deit, bet dei Kanzler mit den uthungerten Aktivisten dei Ünnerhollung söcht.


Na kiek, hier kriggt Angie Merkel ehren eigen Wahlkampfslogan üm dei Ohren slaan!


Rousseau wier ok kein dumme Kopp

Dat best Bispill dorför is 'n junger Mann ut Griepswald, dei sik ut Sorgen üm sien Ümwelt dei Ümweltorganisatschon "Extinction Rebellion" anschlåten hett un nu dat måkt, wat dei Grünner Roger Hallam (Johrgang 1966) as inglischer Ümweltaktivist un Vadderfigur von "Extinction Rebellion" vörgifft, un dei för dat 21. Johrhunnert villicht dat sien will, wat Jean-Jacques Rousseau (1712-1778) för dat "Siècle des Lumières", dat Johrhunnert von'e Opklårn, in't 18. Johrhunnert wier. Œwer is dei Storm up dei Pariser Bastille tau verglieken mit den Schaulstreik von Greta Thunberg (Johrgang 2003) in Stockholm orrer den Hungerstreik von dissen Griepswolder vör't Bundskanzleramt in Berlin? Rousseau un sien Adepten hemm' Afräknung hollen mit Gott un dei Götter up Ierden, œwer dei hütigen Aktivisten willen mit dei öllere Generatschon Afräknung hollen, mit all, dei dörför sorcht hemm', dat sei sülbern bet up den Dach keinen Krieg beläben mössten, nå un nå sorgenfrie läben künnen un nie nich 'n Knust Brot för Kauken hollen hemm'. Doch sei verhollen sik as'n Katt, dei wedderböstig dei Fellhor tau Barch stiegen, wenn 'n Köter sei inne Predulch nimmt, denn sei spälen dei Katt, dei in't Gruundgesetz den Köter süht, dei ehr anne Gurgel will un gägen den sei sik upbömen möt.


Kunn Upbömen nich so utsehn?

Dei Ünnerscheed tau Rousseau is wisslich dei Tieddruck, den dei jungen Minschen fäuhlen daun — ein existenzielle Tieddruck, as wi all an den Dürresommer spöört un ok anerkennt. As bi James Bond, wenn in dei letzten Minuten ein Digitålanzeige trüchwards löppt un Bond denn dei Welt redden mutt. Disse jungen wedderböstigen Minschen hollen sik för dei letzt Generatschon, dei den Ünnergang dörch dei Klimakris noch uphollen kann. "Zivilet Upbömen inne Demokratie" is ehr Devis, sei willen dei Poletikers düchtig dei Leviten läsen un wenn's sik nich insichtig wiesen, mit buckig Akschonen bewägen, intaulenken. Nich gräune Wür, sonnern gräunet Hanneln is nödig. Un dortau hürt ok, dat 'n taun Bispill technische Anlagen demoliert, dei fossile Rohstoffe föddern orrer tranportieren. Un dei ein un anner nimmt sik näbenbi noch ok 'n Ogenspeigel an'n Hungerstreik von Mahatma Gandhi, Martin Luther King, dei Kalikumpels in Bischofferode orrer an den tschechischen Studenten Jan Palach, dei sik 1969 up'n Wenzelsplatz tau Prag mit Benzin œwergåten un anstickt hett. Un noch anner hollen ut'n feministisch Sichtwies den heterosexuellen un witthütigen Mann för 'n schullig Schubberjack, dei dat Œwel inne Welt is, wieldat hei sik in Œwersee mit Frugens inlåten, mit Sklaven hannelt, Kolonien un sogor niege Natschonen as dei Staaten, Mexiko orrer Australien grünnt hett.

Dei wedderböstigen Rebellen vonne letzt Generatschon kœnen sik bloots dorüm upbömen, wieldat se in'n abendlännisch Demokratie läben, un disse Demokratie måkt dat mœglich, dat sei sik radikalisieren un as infåmige, dummdreiste un rotznäsige Ümweltaktivisten nich blot Anlagen demoliern, sonnern ok den Verkihr tau Lann, tau Wåder un inne Luft låhm leggen. Wat sall dat bringen, sik ut Bang vör dei Klimakris up dei Stråt fasttaubacken un den Verkihr tau stoppen? Dor wier't all bäder, por Böm tau planten sporsåmer mit mit Wåder ümtaugåhn.


14.8.2022


na baven