Fans in't WM-Fautballfewer?

vun Behrend Böckmann

1971 wier't so wiet, dat 'n Emir up'n Halfinsel an Persischen Golf 'n Staat as Emirat Katar tau grünnen un in't glieke Johr UNO-Mitglied tau warden. Der Emir un dat Emirat sünd inne morgenlännisch arab'sche Welt dat, wat in uns abendlännisch Welt 'n Fürst un 'n Fürstentum as taun Bispill in Lichtenstein, Andorra orrer Monaco gäben is. Bet 1971 geef dat noch nich mål n' Hauptstadt von dit Emirat, denn ierst 1979 wür dei ierste Bu för dei taukünftig Hauptstadt Doha hensett. Doch dei Geschäften mit Ierdöl un Ierdgas leeten dit Land — mit 11.571 km² man äben half so grot as Mäkelnborg un mit knapp drei Milljonen Inwåhners so bevölkert as Schleswig-Holstein — prosperiern, un in'n Nu ward Doha 'n Haupstadt, dei nich mit Kiel orrer Schwerin tau verglieken is, sonnern ihrer mit dei Wulkenkratzers von Manhattan.

300 m hoge Hotels un Bürohüs, Ünnergrundbåhn un temperierte Wåhnungen gifft dat för dat Völkergemisch, denn blot gaut 10 % vonne Inwåhners sünd "Katarer", anner sünd Ägypter, Syrer, Libanesen, Sudanesen, Jordanier, œwer ok Amerikaner, Kanadier, Australier, Düütsche un anner Europäer. Vonne Philippinen, ut Indien, Nepal un anner asiatisch Länner kåmen väle Gastarbeiters, dei för den katar'schen Riekdaum rackern. Un so as in China dei Kommunistische Partei mit dei Marktwirtschaft dat Land nå vörn bröcht hett, so höllt dat in Katar dei tau Tiet herrschende Emir un Staatsoberhaupt Tamim bin Hamad Al Thani mit den Koran un dei Marktwirtschaft. Dat politische, kulturelle un wirtschaftliche Läben ward in dei islamische Welt mihr dörch den Koran un dei islamischen Gebote bestimmt — anners as dat in Europa mit dei Bibel un dei Teihn Geboten dei Fall is. Bikrupen vör dei Eh is 'n Sünn, Polygamie hengägen nich. Alkohol drinken is äbenso 'n Schann', un as von Propheten verflucht gellt dei, dei "Leif mit sien eigen Hand måkt".

"Pecunia non olet" säd man in't antike Rom, un dat gellt hüt ok noch: Mit Geld künn Katar dei Fautball-WM 2022 köpen, un wenn't so lopen deit, as dat löppt, denn ward Kartar den Vörsitt in'n UNO-Minschenrechtsrat œwernähmen. China un Saudi-Arabien sünd dor ja ok in. Ja, de Weltgeschicht hett Humor maakt männichmål gaude Witze!

Kåmen wi nu taun Fautball, dei inne afrikan'sch un arab'sche Welt dörch dei Kolonialtiet taun beleiwte Sportoort wür. Ik sülben heff in Afrika beläwt, dat dei Jungs Popier taun Ball knüllen, mit 'n Sacksband fast ümwickeln un denn solang dormit bolzen, bet sik dei Ball wedder uplööst. Um männigein dröömt ok von 'n Profispäler, dei in Europa tau wat kåmen künn. So wunnert dat ok nich, dat Katar ok Fautballer finnen deit, dei gägen gaudet Geld gaud för Katar spälen un dat Katar dat för gaudet Geld ok henkrägen hett, dei WM-Späls 2022 uttaurichten. Dat Wunner Doha wür üm acht Wunner rieker, denn för dei 64 nödigen Späls würn för 'n Dubbelwumms (gaut 200 Milljarden €) acht nagelniege Stadien un dortau noch Hotels von Wannerarbeiter ut Indien un Nepal buucht, un sei liggen all in'n Streck von 68 km taueinanner. Doch männig Wannerarbeiter fünn den Dod — un dor füng uns Kritik an't katar'sche Verständnis von Minschenrechte all an.

Achtung Buustelle!

Mit Rücksicht up den hitten Wüstensommer hett man sik afspråken, dei Späls in'n Näwel- un Julmand aftauhollen, wenn dat dor nich mihr ganz so hitt is. Un üm sik anne Hitt tau wennen, is dei düütsche Mannschaft all por Dåch ihrer in'n Oman lannt un hett sik in'n Lännerspäl gägen dei omans'che Landsmannschaft, dei up Platz 75 inne Weltranglist rangiert, an Temperaturen un Tietümstellung anpasst. Un näbenbi wier denn ok dei Tiet, üm œwer dat nödige Verhollen in Katar tau schnacken, woans mit dat Alkohol- un Sexverbot ümtaugåhn is, woans gegen dei lege Behandlung von Frugens un Wannerarbeiter tau prostestiern un woans dei Rägenbågenfåhn m/w/d för dei queere Bewägung tau hissen is. Dat dei Rägenbogenfarven nich erwünscht wiern, harr dei FIFA al klorstellt. Un dor keem man up dei "One Love"-Armbinn' as 'n Teiken gägen Homophobie, Antisemitismus, Rassismus un för Minschen- un Frugensrechte — doch dei wür von allerböbelsten Fautballchef ok noch ünnersecht. Dat wunnert ok nich, denn FIFA-Boss Gianni Infantino ut'e Schwiez wier ja schön dumm, wenn hei sien Johrsgehalt von 2,7 Milljonen € up't Späl setten wür. In'n Vergliek dortau kümmt uns Bundskanzler blot up 'n Johresgehalt von bummelig 'n half Milljon €.

One Love!

So sünd sik Emir Tamim bin Hamad Al Thani un FIFA-Boss Infantino einig, as sei glattschnackerisch verkünnen: "Endlich is dei Dach kåmen, up den wi solang täuwt hemm'. Minschen vun alle Relischonen un Sichtwiesen kåmen hier tauhop. Wat sei ünnerschiedlich måkt, dat bringt uns tausåmen."

Doch dat is Schmer. Dat Geld allein höllt allens tausåmen — un dei Späls sallen ok noch wat afschmieten. Man mellt, dat drei Milljonen Tickets tau 200 € för 'n Vörrunnenspäl un för mihr as 3800 € för alle Späls verköfft würn un dat 'n all mit 'n Gewinn von 1,5 Millarden €uros räken deit. Man schnackt ok von Fans, dei as Taukieker inköfft würn, un dat dei Eröffnung nich tau verglieken is mit dei WM von 2010 in Südafrika, wo Fans mit 'n Vuvuzela, 'n Oort Blasruhr, düchtig Larm måkt hemm'. Nich tau œwerhürn wiern in Doha dei Fans ut Südamerika mit ehr Bölkerie "Wi willen Bier!"

Doch dei Bierutschank wür liekso korter Hand ünnersecht. Dat lett, as wenn Katar tauminnst in ein Disziplin Weltmeister warrt — in't Verbäden.

För düütsche Diskaunter is dat Wihnachtsgeschäft inne Burten wichtiger, as dat 'n Fanartikel utlecht, dei nich afgåhn. Wihnachtsmarkt un Fautballkieken passt nich gaut tausåmen, un so höllt sik die düütsche Iewer för Fautball in Grenzen, taumål dei düütsche Elf gägen Japan al verlurn hett — un vunåvend gägen Spanien is dei Höpen ok man minn. Wieldat düütsche Spälers verbåden wür, dei "One Love"-Binn an'n Arm tau drågen, hett sik Binnenministersch Nancy Faeser as Besäuker nå Katar upmåkt un sik mit dei Armbinn' näben den FIFA-Bass Infantino plaziert un taukeken, as dei düütsche Mannschaft sik dei Hand vörn Mund hollen hett, wat soväl bedüden süll as dat wi uns dat Mul nich verbeiden låten — ok wenn dat ihrer nå dat Gägendeil utsüht.

Dat Muul tauhollen wier ierst dei Anfang. Hüüt gägen Spanien hollt sei sik
dei Ogen tau, un gägen Costa Rica verstoppt sei sik dei Uhren, dat sei dat Utfleiten
vun dei Fans nich hüürt

Hett dei gräune Minister Habeck dat all nich henkrägen, mit den Emir von Katar so tau verhanneln, dat dörch 'n Energiepartnerschaft dat nödige Gas nå Düütschland kümmt, so vergnatzt nu womœglich Nancy Fauser denn Emir. Un kann man sik dat leisten, wenn katar'sches Kapital in düütsche Grotünnernähmen as Düütsche Bank, Hapag-Loyd, Siemens orrer Volkswågen stecken deit? Dat Upbegehrn vonne åbenlännischen Länner för åbendlännische Minschenrechte schert Länner mit 'n islamisch Kultur wenig, ok wenn dei iransche Fautballmannnschaft bi't Uptaktspäl nich dei Hymne mitsungen hett un ünner Ümstänn' in Teheran mit Konsequenzen räken möt.

För den Utrichter Katar süll disse WM dat allergröttst Fautballfest in'n Wüstenstaat warden, doch dat keem nu anners. Politischer Striet twüschen FIFA un DFB, katarische Schandarmen schassen "One Love"-Binnen, dat Bier- un Kœmverbot un dat Läben nå Koranvörschriften, dei Sieg von Japan œwer Düütschland un geringe Inschaltquoten... nicks, œwer ok gor nicks passt tau dei Denkmuster von uns
liberale Demokratie, doch wiederhen regiert dat Geld dei Welt un dormit ok dei Fautballwelt. Un dat warrt wiss ok so blieven. Dorop stöten wi an.