Dei "Frädensplan"

vun Behrend Böckmann

Wenn all, dei œwer den "Frädensplan" orrer "Siegesplan" von Selenkyj schrieben, dorbi dei Wür in Tüddel setten, denn is dei Såk nich ganz koscher. Wenn ik taun Bispill "hei will sik Leiwkind måken" in Tüddel sett, denn mein ik, dat hei üm gaud Wäder beddeln orrer nå wat prachern deit un männigeinen mit Verspräken so blennen deit, dat 'n mitfäuhlt un någifft. Dorbi stellt sik Selenskiy as dei dor, dei dat liberale demokratische europäisch Åbendland in'n Kampf gägen den bösen Russen — gägen den kein Napoleon un kein Hitler 'n Krieg wunnen hett — redden kann. Man möt em blot ümmer mihr Waffen gäben, Waffen, dei sülfst Frünn as Olaf Scholz un Joe Biden em nich gäben willen — ofschoonst dei Ukrain an dei Gaven von't Pentagon as an ein Nabelschnur hangen deit. Kein Wunner, dat Selenskiy ok op dat Pentagon hören mutt. Oder nich? Israel hangt ja an liekso ein Nabelschnur — un gifft keinen Spiet op dat, wat dei USA willn.

Selenskyj verklort œwerall up sien Reisen dörch Europa den "Frädensplan", dat man em wiederhen mihr Waffen un dat nödige Geld gäben süll, ok wenn dei Geldgäber weiten, dat 'n Deil dorvon dor lannt, wo't nu nich lannen süll — un gäben doch ümmer wedder mihr Geld nå Kiew, üm unner annern vör Urt Rüstungsfabriken tau bugen un för den eventuellen Wedderupbu gaude Updrääch tau säkern.

Œwer dat is noch nich allens, wat Selenkyj sien "Frädenplan" vörsüht. Ne, hei will, dat sien Land leiwer hüt as morgen inne EU un inne NATO upnåhmen ward. Ierst wenn dei Ukrain Maat inne EU un NATO is, denn is Europa säker. Ein Schauh warrt natüürlich annersrüm dorut: Ierst denn is dei Ukrain säker. Dat weit jederein, œwer Selenskiy verköfft uns dat tågnackig annersrüm: De Ukrain as Barriere un Schuul vör Russland. Un nich blot vör Russland, sonnern vör den ganzen Klüngel Russland — Belarus — Nuurdkorea — China — Iran un noch anner BRICS- Staaten as Indien, Südafrika, Ägypten, dei Arab'schen Emirate... un Corona, Pest un Cholera un böse Dämonen...

Un dei rod-gäl-gräune Taukunftskoalitschon, dei nu al ein Vergangenheitskoalitschon is, un dei christlich (Noch-)Oppositschon willen denn Wähler nu verkloren, dat's dei demokratisch Midd in'n Bunnesdach is un marken nich orrer willen nich marken, dat sik dat Wahlvolk taun groten Deil anschäten fäuhlt, sik vonne Midd afwennt un nå 'n rechten un linken Rand schuult, wo man gägen ümmer mihr Waffen för dei Ukrain is un diplomatisch Verhanneln vonne Böbelsten verlangt. Œwer dei Midd un Konsorten sünd nich insichtig un hollen dei Maaten inne Randparteien för Populisten orrer gor Faschisten un ünnerstellen Wählers, wecker dei Midd afwählen, dat s' dei Demokratie in Gefohr bringen.
Demokratie in Athen wier dei "Volks"herrschaft, doch as Herrschaften verstünnen sik blot dei Mannslüd, dei den nödigen Besitz harrn un sik Unfriee as Slaven höllen. Un von dunn an hett sik dei Demokratie entwickelt un ok ümmer 'n lütt bäten verännert. Väl is bäter worrn, dor blifft œwer noch Luft nå båven.

Krieg

Un so hett dat ok ümmer gelihrig Lüd gäben, dei dat dumme Volk mit Bögen un Bräken verblennen wullen, so as sei tau denken un tau hanneln. För disse Ort Lüd kümmt ut't antike Athen dat Wurt "Demagogos", tauierst inne Bedüdung von Volksführer un låters in dei Bedüdung Volksverblenner. Un nu sech mi noch einer, dat dat kein Volksverblenner sünd, wenn s' as einzigen Wech taun Fräden den Sieg mit dusende von Doden un Krüppeln in'n Kop nähmen — un ein'n annern Wech nich mal in Betracht trecken willn.

Rund 30 Milljarden Euros — nich inräkent Geller, dei œwer Brüssel noch hentaukåmen — sünd in Form von Waffen, humanitäre Hülp un direkte Tåhlungen nå Kiew wannert. Gåhn poor dusend Minschen an'n CSD mit dei Rägenbågenfåhn as Karnevalsgesellschaft up'e Stråt, denn is dat 'n gaude Såk. Gåhn por dusend Minschen för den Fräden un gägen Uprüstung vör't Bramborger Dur, denn kåmen s' stantepee in Verroop, "Putinverstehers", ja Landsverräters tau sien.

In dei neegsten Johr steiht uns weltwied so ein Wettrüsten in't Huus, dat uns noch de Trånen kåmen warrn, wenn wi an hüüt taurüchdenken. Betahlt warrt dat von unsen Wohlstand — unse Kitas un Krankenhüüs, Straten un Bahnen, unsen ÖPNV un unsen Klimaschuul. Un denn warden noch väl mehr Minschen dorgägen op dei Stråten gahn.

Wier dat nich lichter, hüüt al ein'n echten un gerechten Fräden tau söken — tausamen mit dei Minschen von'n Rand von dat politische Spektrum?

P.S. För all dei Lüüd, dei in den Konsumkapitalismus nåwussen sünd un nix anners kennen: Dat Teiken hier œwer dei Ierd is kein niege Automarke un kein verunglücktes Mercedes-Logo. Dat is dat Frädensteiken. Mal nådenken.