Vörher un Achterran, G 20 — Deel 1
Wenn Angela füünsch is...

vun Jens-Peter Bey

De Kanzlersche kann ja sowat vun achtertücksch sien.

Ik nöm dat Schinneree, woans se mit den armen Donald Trump bi G 20 ümspringen will. Nu is he mal to Besöök un denn so’n asigen Ploon, jüst för den eersten Abend in Hamborg: Warm eten mit Tofelsülver un Sabbeljetten. Wat de Börger-King vun ÖGD, Övern Groten Diek, am leevsten mag, kömmt nich op’n Disch, blots Oot Küsin. Kunn dat nich mal richtig deftig togahn? „Snuten un Poten“ för dat Swienjack, för den Snutigsten vun all de Weltenlenkers, de sien Poten öberall rinsteeken deit? Nee, so veel Sümbollik kriggt de Merkelsche nich trech.

Wenn dat nich Trump weer, wöör 'n seggen, he denkt na. Naja, he versöcht dat tominnst — is swoor!

Een Schaandaal is de Nachtmusik, de se ordert hett. Keen Pankoken-Kapell, nee, dor mütt wedder de Philharmonikers ran. Trump kriggt düchtig wat op de Ohrn, wenn he in de Elphi sitten mutt. Sien Gorillas vun de Serucceti passt op, dat he nix an de Ohrn kriegen deit. De Muskanten hebbt’n fiekelinsche Agenda, wenn se för de Böbelsten opspeelen doot. Beethovens Sinfonie Nummero 9 is anseggt, mitsamst „Song of Joy“ achteran.

70 Minuten twitterfree still sitten, dat Muul holen un de Hannen nich rögen, dat is Folter för den amerikaanschen Jiddelfix. Wenn he glieks na dat „Allegro man non troppo“ mit den Bifall losleggn deit un sik wunnert, dat keeneen mitmaakt, kann he tominst wedder mal seggn: „America first!“ Donald hett den Knoop in’t Ohr. Schull mi mal verlangen, woans de Toseggersch em op Ingelsch bipulen will, wat de ole Schiller sik hochdütsch utdacht hett:

„Wem der große Wurf gelungen,
Eines Freundes Freund zu seyn,
Wer ein holdes Weib errungen,
Mische seinen Jubel ein!“

Egol. De Hauptsaak is nu, dat Trump an de NATO un Melania, Macron an sien Lehrersche un Jochen Suer an sien Angela dinken deit. — Trump schull sik good stellen mit den Dirigenten Kent Nagano un em nich op de Siet drängeln. Sowat schickt sik nich. Wenn he fix beide Duumen hochreckt, kriggt he sachs noch den Sabeldanz vun Chatschaturian un Bernsteins „I want to be in America“ as Togaav. Un denn kann he ok glieks in de Puuch un lostwittern, dat de Duumen dampt. —

St. Pauli kann töven, vunwegen dat Wrestling oder Catchen, as wi fröher seggt hebbt. Plinker, plinker...