Vörher un Achterran, G 20 — Deel 2
Donald, 'n lütt beten inhegt,
Hamborg‚ 'n lütt beten affackelt,
Angela, 'n lütt beten tofreeden

vun Jens-Peter Bey

Nee, ganz so leeg weer dat doch gor nicht mit de G20-Vullversammlung an de Elv. Nich to verglieken mit G8-Hilligendamm, wo Fru Angela in den XXL-Strandkorv vun Bush, den Lütten, Nackenmassaasch kreegen hett. De niede amerikaansche Präsident hült sik wietaf vun Angelas Nacken. Nich dat he vör Jochen Suer bang is, nee, de Grabbelee in Hamborg is nich sien Oort. Wat ok passeert, Donald kann maken, wat he will: Am Enn vun dat Leed haut de Feek-Njus-Lögenheinis em so oder so in de Pann. Bi dat Goden-Dag-Seggn de Hand düchtig to schütteln is nich richtig, forsch totodrücken is nich richtig, un de Hand wegtotrecken kümmt erst recht ok nich good an. He "kann maken, wat he will. Swieg man jümmer, jümmer still."

Ut Donalds Hand-Lehrbook: De vörbildliche Handslag — to wenig — to veel. O Mann!

Donald kunn düttmal all de Lüüd, de he lieden mag, oorig de Hand geben. Is de BunnsNarichtenDeenst BND en lütt beten mit Ritalin togang wesst? Hett de CIA mit Trängkwileisers naholpen? Harr he en Extra-Briefing vun so'n amerikaansche Fru Pappritz? Oder is he vun sien Melania vörweg düchtig op'n Pott sett worrn?

"Wenn se dat Dings dörsaagen will", denkt sik Donald, "woso nimmt se so'n dösige stumpe Saag? O Mann, duert dat lang!"

De Elv-Muskanten hebbt de Nummero 9 vun Beethoven bi dat groot Konzert lang un breed utklingen laten. Weer meist en beten veel för Donald, de blots Gedüer för een Stünn harr. He hett liekers ok all de Singeree uthollen un sik dat Poseern verkneepen, as dat Klatschen losgüng. Geev rein nix to meckern.

Bi de Knipseree is keeneen vun Donald an de Siet drängelt worrn, un för 'n lütten Cheese-Grientjer weer he immer good. Unangenehm opfullen is blots, dat Donald sik bi Angela anvietzen wull, hett he doch op'n poor Fotos ehrn Finger-Salmi namaakt, un de hört alleen de Merkelsche to.

Bi dat groot Dinner hett Donald den Steenbutt heel manierlich to Liev kreegen. He kann — so veel is klor — beter mit fish sticks üm, aber wat schert de Kanzlersche dat. Trudeau sien Lütten (3) kreeg düsse Fischfingers to Meddag. "Gifft doch keen Grund, de Canadiers jümmerto vörtotrecken. Dat Schikaneern fangt mit de Spieskoort an un hört mit dat kniepige Betahlen vun de NATO lang noch nich op", denkt sik Donald.

Ut Donalds Hand-Lehrbook: Düsse Geste mutt he maken, wenn he de Saak mit den Friehannel ünnerschrifft. O Mann!

De Netto-Tied för dat Verhanneln is man bannig kott west. Liekers hett Donni sick ok mal afseilt, wenn em dat so to pass keem. De Quackelee vun den so nöömten Klimawannel is em op'n Wecker gahn. Donald weet üm sien Plichten, un dat Blaumaken is nich sien Saak. Twee Stünnen lang hett he dat anner Alfa-Diert dropen, den Wladimir ut Russland. Se weern glieks Pütt un Pann, hebbt sik nich schert üm den Krim-Klau, die nieden Patriot-Raketen in Polen un dat vörherige Höhnerhoff-Gegockel. De Freeden in Syrien un ok in de Ukraine weer na twee Stünnen utverhannelt. De kommt fix in Sack un Tüten, wenn dor keene Dwarsdrievers tohuus den schönen Freeden wedder karboneert. So geiht en Instant-Deal. — Vörher geev Trump noch Order an sien Militärs in Asien, de Norden-Koreaners mit'n Fake-Attack to wiesen, dat he ok anners kann. He is schon en verdeubelten Keerl un schull den Kim Jong Un glieks totwittern, wat he dörch de düsteren Schieven vun sien Koor in Hamborg lesen kunn: "Welcome to Hell"!

Donald is Füer un Flamm för de NoKos!

Lütt beten Befragen, lütt beten Tolustern bringt 'n beten wat tosamen, wat dor hoch kümmt, wenn een in düsse Tieden mit "Welcome to Hell" to doon hett:

Mennigeen ward gallig, wenn he de Parol' blots höörn un sehn deit.
Mennigeen is düsse Daag dat Höörn un dat Sehn vergahn.
Mennigeen will keen Plastersteen in sien Kinnerzimmer kriegen.
Mennigeen will keen Füer ünnert Dack un op de Straat hebben.
Mennigeen will nich, dat de Ladens utplünnert ward.
Mennigeen meent, dat de Polizei jüst dorför to rechte Tiet oppassen schull.
Mennigeen meent, dat Füerwehr, Eersthölpers un Polizei, Stratendeenst un Müllwarkers veelmals Dankeschön för ehr swoore Arbeit verdeent hebbt.
Mennigeen hett — för alle Tieden — de Nees vull vun Lüüd, de sik swatt utstaffeern doot un nich anners as kackbruun ageern doot.
Mennigeen meent, dat Politikers sik öberall dropen künnt, blots nich door, wo de Randale programmeert ist.
Mennigeen kann nich so veel freeten, as he kotzen mutt, wenn dat Beduern vör dat Höllenspektakel so afgrenzt ward: "Warum nicht Pöseldorf oder Blankenese?"
Mennigeen kriggt das Würgen, wenn de Scharpmaakers un Gedankenverdreiers dat Seggn hebbt.

Wohrschu: De gifft in de Elphi un op dat Schulterblatt.

Sünd wi nich all en beten Donald? He is so —— so normal!!