vun Behrend Böckmann

Dei Tiedungs-, Klœn- un Kiekschappmåker sorgen ja dorför, dat uns Språk ümmer dinglischer un geschlechtergerechter ward. So heit dat nich mihr "Gauden Dach, miene Damen un Herrn" in't Kiekschapp, sonnern blot noch "Gauden Dach" — dormit will man bekunnen, dat 'n ok dei sexuellen Minnerheiten anspräken will, dei sik nich för dat hollen, as wat dei Natur sei måkt hett.

So ännern sik dei Tieden un dormit ok dei Språk. Dei jungen Lüd von hüt spälen nich mihr Hopse, Teihnerprow orrer "Räuwer un Schandarm", sonnern sei hemm' den Lepptopp an'n Wickel, sünd mit eins geemende Geemer, (spälend Späler, dat inglich Dauwurt dortau "to game"). Ut "to game" wür dat dinglisch Wurt "geemen", dat nå uns Rägeln böcht ward: ik geem, du geemst, hei, sei, dat geemt, wi geemen... ik heff geemt (Vergangenheit), ik war(d) geemen (1. Taukunft), ik wür geemen (Wunschform)... In uns Språk is middewiel so väl Inglisch, dat ik mi faken dormit tröösten dau, dat Inglisch ja doch bloots ein plattdüütsche Dialekt is. Up'n Aart is dei ole Språk vun dei Angeln un Sassen nå ein längeren Butenlands-Upentholt licht verännert wedder tau uns trüchkåmen!

Un so weiten dei Lüd vun hüt ok wat mit dei niegen Wür Diehlmeker un Geemschenjer (Dealmaker un Gamechanger) antaufangen. Œwer as wi lütt wiern, dunn wüssten wi ja ok nich, wat Rap för 'n Sang wier un dat Blasen nich blot dat Fläuten up'n schnitzt Wiedenholt bedüden däd. Mi klingt dat noch inne Uhrn, wenn uns Öllern inne Tiet von'n Koreakrieg (1950-1953) sungen hemm': "Ein, twei drei Korea, dei Krieg kümmt ümmer nea" un denn, as dat dei iersten HO-Lådens inne DDR geef, süngen: "Tschia, tschia, tscho, Kees gifft't in'n HO" (1950 geef't all 2.300 Filialen vun disse Lådenkääd). Tau mien Kinnertiet keemen nich mål klauke Lüd up den Infall, dat Stalin 'n Diehlmeker un Ulbricht villicht sien Geemschenjer wier.

Œwer dei analoge Welt kreech nå un nå 'n Konkurrenten, dei digitale Welt mit Klappräkner un Ackerschnacker! Un dat wier mihr as 'n Revolutschon. Ümmer mihr dinglisch Wür schlieken sik in. Wi versennen nich mihr 'n Breif, den dei Postbüdel denn utdrägen deit, sonnern wi sennen 'n "Mail" von einen Computer taun annern — un dat väl fixer, as dat dei Post kann. "Mail" heit twors up Inglisch "Post", œwer ein post (mit langes o språken) gifft dat ok, dor is dat Wurt wedder up'n Ümweg in't Inglische opduukt: Dat is nämlich, wenn ein' wat posten deit in ein soschåles Nettwark usw. Dor kumm mål klår!

Liekers is dei Sellschåp noch nich so wiet, Bundskanzler Kohl 'n Diehlmeker tau näumen, dei mit väl Geld dei DDR von den för Perestroika un Glasnost bekannten Geemschenjer Gorbatschow afköfft. Dei Kolle Krieg is vörbi, doch dei "Ewig Fräden", von weckern Kant eins drömt hett, kümmt nich inne Puschen. Ut den Kollen Krieg ward dei hybride Krieg un Drohnen dei niege Waff in dissen niegen Drohnenkrieg.

Dei Drohn, dat lütte unbemannte Fleigtüch mit künstlich Plie un all möglichen Scheitkråm an Bord, is œwer ein wirkliche Geemschenjer — dat hett dat Kriegföhren verännert, so as dormålen dat Schwattpulver un dei Scheitprügel mit Piel un Bågen Sluss måkt hemm'. Dei Drohnen kåmen tau'n Deil ut den 3-D-Drucker un låten sik gor nich miehr genau up ehren Ursprung trüchverfolgen. Du weitst nich nau, gägen weckern du kämpfen deist, wenn du gägen Drohnen kämpfst. Ierst langsåm warden wi gewohr, up wat wi uns in Taukumst instellen mœten. Un dat dat noch miehr Œwerraschungen gäwen kann. Wenn dei KI ierst allens lenkt, warrt dat pikant. Körtens heff ik läst, dat dei KI dörch ganz lütte Fählers "böse" warden kann (dei Artikel is leider achter ein Betahlschranke). Na denn väl Spåß!

Nu sünd Kanzler Merz un sien Kriegsminister Pistorius dei Diehlmeker in Europa — un sei stimmen uns Börger up 'n Politik in, dei bös, ganz bös ennen künn. So posaunen's ümmer wedder ut: Wi sünd noch nich in 'n Krieg, œwer wi sünd ok nich mihr in'n Fräden! Un so måken s' uns klor, dat dei Drohnenafwihr 'n Geemschenjer gägen jedwede "hybride" Angriff sien möt. Sülwst wenn ik dei Minschen Merz un Pistorius vertruen wöör (un dat höllt sik bi mi in Grenzen) — kœnen dei twei œwerhaupt sülwst noch wat entscheiden? "Hybride" Angriffe sünd ok welk gägen Computernetze... Denk an dei KI: ein lütte Fähler, un batz hemm wi ein utwussen Malesch an'n Hals.

Villicht is dat bäter, dat nich jedein Geemschenjer sienen Nåm gerecht ward un dat Späl wirklich up'n Kopp stellt. As ok dei Leopard-Panzer inne Ukrain för 'n Geemschenjer in'n Kampf gägen Putin güll — un doch nich väl verännert hett. Wisslich schall Putin in sien Schranken wiest warrn, œwer den Drohnenkrieg kœnen wi all noch beduern.