'n kollen Noors kriegen

vun Behrend Böckmann

As ik 'n lütten Butscher wier, heff'k dorvon drömt, 'n anbuuchten Fohrraddynamo an Mudders gaude Pfaff-Neihmaschien mit Hülp von't Trittbredd un dat Schwungrad up Draff tau bringen un dordörch soväl nödigen Strom tau måken, dat dat inne düster Stuf lichthell wür. So heff ik as Kind all von'n Notstromaggregat drömt, wat nu nå klauke Insichten von'n gräunen Wirtschaftsminister bald Würklichkeit warden künn.

As gräuner Christenminsch besinnt sik dei ein un anner villicht ok dorup, dat hei bi Stromsperr an'n Sünndach denn Ordelbalg inne Kark pedden mösst, dormit dei Piepen den nödigen Wind krägen. Dat all geiht mi — dei noch mit Wasslichten, Kachelåben, Warmkrug för't Bett un Afseipen in'n grot Emailljeschöddel upwussen is — dörch 'n Kopp, wenn mi dei rod-gäl-gräunen Ratschlääch för dat Läben inne Gaskrieg mit Russland tau Uhren kåmen. Un ganz vöran dei Gräunen: All dei, dei eins för Fräden åhn Waffen up'e Stråt güngen, sitten orrer seeten hüt in Parlementen un kœnen gor nich lud nauch nå schwore Waffen für dei Ukraine as Weltredder, as Redder von uns liberale abendlännisch Läbenswies, schriegen. Un sei gäben nu gaude Ratschlääch, woans sik dei Börger verhollen sallen, wenn Putin den Gashahn ganz taudreihen süll. Dei gräune Hamborger Umweltsenator schlööcht vör, dat — so as dat nå'n Krieg Stromsperren geef — nu blot tau bestimmte Tieden warmet Wåder ut'n Håhn löppt. Noch anner œwerleggen, ob man in uns drei noch nich afstellten Atomkraftwarken nich doch noch bäten Strom måken süll un ob dat nich doch bäder wier, denn Verzicht up Strom ut Kåhlen noch bäten mihr inne Läng tau trecken.

Un dei gräune Staatssekratär Patrick Graichen ut dat Habecksche Ministerium grippt denn Ümgang mit dei "kritische Infrastruktur" up un schlööcht vör, dat sik taun Bispill Krankenhüs, Schandarmerie, Füerwehr, Wåderwerken u.a. Notstromaggregate tauleggen, dei 72 Stunden vörhollen sallen, also dei Tiet, dei einsten twischen Dod un Graffleggung intauhollen wier. Nich bedacht hett wull disse klauke Minsch, dat dat för den Fall, dat dei Strom wechblifft, nicks mihr geiht, dei Tanksül steiht still, dei Kass in'n Supermarkt arbeit't nich, dei Telekommunikatschon bräkt tausåmen...

Anner drömen hengägen von Gaskraftwarken, dei mit Wåderstoff tau bedrieben sünd. Un wecker sik gägen dei EEG-Ümlåch bi'n Strom stark måkt hemm', verlangen nu ut Grünnen vonne Gerechtigkeit dei Gaspriesümlåch. Un denn sünd dor noch dei Spekelanten vonne Strommœhlen. Sei willen nu mit Windkraft dat Geld måken!

Un dor is noch dei gräune Chef Müller vonne Bundsnetzagentur, dei ok von Sporen in'n Ümgang mit Gas schnacken deit, œwer nich will, dat dei Börger 'n kollen Noors kriegen. Leiwers süll man die Heizung inne Spaßbäder rünnerfohrn un anne Stell von Bunker in'n Krieg nu Upwarmstuwen inrichten. Tau glieken Tiet verkünnt hei, dat 'n nauch Gas in Norwegen un inne Nedderlannen inköpen künn. Liekers süll man œwerleggen, ob in all Stuwen dei Heizung updreiht warden möt un ob man nich por Gråd weniger gägen 'n warme Jack intuschen künn. "Homeoffice" taun Gassporn un Gas up Koorden måken ok dei Runn' .

Dat Düütsche Wirtschaftswunner künn in'n kåmenden Winter mit Iesblaumen hanneln, doch beste Frünn von Melnyk un Co. spekeliern all mit ukrain'schen Atomstrom un dat Verspräken von Selenskyj, dat ut ukrain'sche "Pipelines" nauch russ'sches Gas nå Europa kåmen künn, wenn...