De doppelte Robert

Politische Stammdisch vun Martin Ripp

Düsse Sünndagvörmeddag döcht nich bloots to'n Koortenspelen. De dree Frünnen sünd ganz schön op hunnerttachtig un mööt eerstmal diskereern. Wat good, dat Charly, de Weert, ganz vun alleen Beer bringt!

"Hest dat ok höört? Nu warrt dat eernst mit dat Gas!"
"Ja, Putin dreiht vun sülven af! Will he uns dormit wiesen, dat en Boykott em nich wehdoon kann?"
"Habeck appelleert nu, wi schallt all blangen Stroom un Water ok noch Gas sporen!"
"Kann ik gor nich, ik heff en Öölheizung!"
"Quatschkopp! Ah, dat Beer! Büst'n Baas, Charly! Proost!"
"Proost! To'n Glück mööt wi keen Beer sporen!"
"Tööv man, dat kümmt noch! Dürer warrt dat wiss!"
"Charly warrt uns aver doch nich to dull blöden laten! Proost! Ah!"

Na en depen Toog kunnen se klorer denken, düch ehr.

"Also dat Gassporen", stüür Ralf, "dat geiht ja doch ehrder de Industrie an. Wat de privaten Lü inspoort, dormit kannst de Spieker nich vullkriegen!"

"Man dat sünd doch en Barg Industriebranchen, de dat angeiht!", sä Walter mit Nadruck. "Nich bloots de Metall- un Chemie-Lüüd, sünnern ok de Glasherstellers un sogor de Levensmiddelindustrie verbruukt Gas!"

"Neenee", mell sik Korl, "mien Bertha seggt, de Levensmiddelindustrie produzeert Gas, dat süht een, wenn se ehr leckern Kohlrouladen maakt hett un ik denn —"
Ralf müss in sien Beer pruusten, man Walter schien en beten op'n Slips peddt. "De Rinder produzeert veel mehr Methan un —"
"Och Walter", lach Korl, "vun di heff ik ja ok al mal dat een orr anner Büxendunnern höört!"
Ralf lach sik meist ünnern Disch. "Wenn de Levensmiddelindustrie all düsse Afgase sammeln un in den Produkschoonsprozess trüchföhrn kunn..."
"...denn weer düsse Industrie fix klimaneutraal!", sloot Korl mit'n Grientje.
"Un wat passeert", sä Walter streng, "wenn de Levensmiddelindustrie ehr Produkschoon rünnerfohrn mutt? Naaa?"
"Is doch kloor, wi nehmt all endlich mol beten af! Mien Bertha wünscht sik dat al lang — vun mi, nich vun sik natüürlich", lach Korl.

"Tja, denn tööv man, bet de halve Industrie in Kottarbeit geiht, de Arbeitslosen anstiegt — Verdeenstutfall un Soschaalkosten — dat sünd allens Stüergeller, mit de dat betahlt warrt!"

"Orr nich betahlt, wenn't na Finanzheini Lindner geiht! De mutt ja de Mineraalölkonzerne dat Geld nasmieten, för de lütten Lü blifft dor nix na! Neegst Johr schall wedder de Schullenbrems gellen!"
"Dat klappt doch nienich!"
"De Blamaasch günn ik em!"
"Jau! Dorop en Sluck! Proost!"

Un wedder setten se bedächtig de Glöös an un na en depen Toog wedder af.

"Aver in Habeck sien Huut", meen Walter bedächtig, "much ik nu doch nich steken."
"In Habeck sien Huut wöörst du ja ok gor nich rinpassen", spötter Korl goodmödig. "15 Kilo orr so —?"
"Dummtüüch! Ik bün nich dick! Lenk nich af. Nu will Habeck wedder de Kahlenkraftwarken anschalten. De Drecksleudern."
"Dat's wohr", sä Ralf, de sik vun sien Lachanfall verhaalt harr. "Dat is en Paradox. Reaalpolitik also."
"Jo, de Klimaminister mutt sik nu achter den Weerschapsminister versteken. Tominnst för en Tied."
"Dat is sotoseggen de doppelte Robert!"
"Also wenn't na mien Bertha güng, kunn dat ruhig twee vun em geven! Se findt em to'n Knuddeln, seggt se. Den ollen Schönling!"
"Na, nu nich ieversüchtig warrn! — Wüllt höpen, dat de arme Habeck keen Persöönlichkeitsspaltung dorbi afkriggt!"
"Un dat he morgen noch weet, wokeen he is. Den Klimaminister bruukt wi nämlich nödig."
"Jo, wenn een so dick is as du, denn hett he an de Eerdverhitten keen Spaaß! Jümmer dörtig Graad in'n Sommer, Schiet, wat?"
"Korl, mit dien Hintjentüüg schullst du mal ophöörn bi so en eernstes Thema!"
"Deit mi leed, wenn ik nich över lachen kann, wöör ik över hulen, so eernst is dat, un dat wullt du ok nich!"
"Hest recht, Korl. Nix för ungood. Büst'n goden Keerl. Bertha ok."

Ralf smüüster sien twee Frünnen an. "Na, hangt de Segen nu wedder lootrecht? Denn köönt wi ja de Skatkoorten utpacken!"
"Jawoll, hest Recht! Wi hebbt bloots beten Damp aflaten müsst!"
"Solang ji den Damp nich över de Büxen rutlaat", meen Ralf, "schall mi dat recht ween. Dat Methan maakt ja doch bannig Schaden in de Atmosphäär. In de dor baven un ok in de Atmosphäär hier. Also bitte, nich pupen. Hier sünd de Koorten. Walter, du giffst."