Sporsomkeit is keen Giez...
...over Giez is geil!

vun Ursula Vollstedt

Jümmers sünndags, wenn de Klock no halvig negen to geiht, denn goht wi "on tour."
Wat dat heet?
Wi holt uns Auto ut de Garoosch un stromert dörch uns scheunes Sleswig-Holsteen. Lang lütte Strooten, dörch aflegen Dörper, eenfach irgendwo hen.
Männichmol is dat as Wiehnachten, wenn wi 'n Eck findt, de wi noch nich kennt.
Wegen den hogen Spritpries is dat intwüschen jo meist Luxus, den een sik nich mehr leisten kann, over wi goht nich to Kroog un smökt nich. Jedereen hett'n annern Vogel!
Wi hebbt uns Freid dor an.

Wenn de Tank vun uns Auto to dree Veertel leer is, denn hebbt wi noch 'n Spooß nebenbi.

Glieks bi de eerst Tankstell kiekt wi, wat de Diesel köst. Un so geiht dat op uns ganze Tour wieder. Duert nich lang, denn findt wi 'n Steed, woneem de Diesel fief Cent prieswerter is as in uns Stadt.
Wüllt wi hier tanken? — Nee, wi findt wiss noch 'n billiger Tankstell. Bet acht Cent per Liter kannst mit reken.

Männichmol hebbt wi Glück, over mitünner hett dor ok 'n Uul seten un wi hebbt unsen Sport to wiet dreven. Nu mött wi tanken, wiel de rode Lamp oplücht un blots noch'n beten Reservesprit in 'n Tank is. Bi de neegste Tankstell hoolt wi an un kööpt Diesel för noch een Cent mehr as to Huus.

Woans heet dat man noch: "Anscheten, Herr Paster!"