Dat niege Harstgebäck

vun Behrend Böckmann

Dei Sommer is noch nich ganz vörbi, dor liggen inne Burten bi'n Diskaunter all dei iersten lütten Päperkauken, Marzipantüffeln, Wihnachtsstuten un Zuckerkringel as Anfang von't Wihnachtsgeschäft. Œwer dor ward noch nich von Wihnachten schnackt, sonnern von'n Harst. "Harstgebäck" is dat niege Wurt för Rosinenstuten un lütte Wihnachtskauken, dei dei Hannel all af den Austmånd an'n Mann bringen will.

Füng vör Tieden dat Wihnachtsgeschäft ierst nå den Stillen Sünndach an, so hett sik disse Bruk äbenso wennt, as sik ok Poletikers un ehr Poletik wennt hemm'. Nähmen wi blot dei Gräunen, dei sik nu nich mihr blot för Fleddermüs un Blaumenstriepen an'n Ackerrämel insetten, sonnern in Verbinnung mit dei Taukunftskoalitschon dei Kriegskunst för sik entdeckt hemm'. Un dat is in Nullkommanix gahn, so föhlt sik dat an. Alltied snacken sei pazifistisch, kümmt œwer dei lüttste echte Krieg, wupps stahn sei mit dat Militäär in Rieg un Glied. Kunnst al an'n Kosovo-Krieg sehn. Un nu: Panzertoni Hofreiter un dei Dichter Habeck un dei Danzgirls Lang, Haßelmann un Dröge hemm' sik von gräune Frädensapostel tau schwatte Putinhasser wannelt un schuben den bösen Putin dei düütsche Energiekris, dei Inflatschon un allens, wat nich so löppt as dat lopen süll, inne Schauh.

Hach ja, solk Lüüd hemm' kein Hart för Putin — nich mål ein vun Päperkauken!

"Blot gaut, dat dat all dei lütten Harstkauken för uns Wahlparty gifft", seggen sik disse Lüd, dei von't "döschig" Volk in Sassen un Thüringen wägen Brandmuern un Rode Linien stråft würn un nu nich weiten, woans sei tau Pott kåmen sallen, üm den Börger tau verkloren, dat sei inne stråft Midd ümmer noch bäder sünd as dei Putinfrünn' von rechten un linken Rand. Œwer dat Volk is uneins mit disse Lüd un hett 'n anner Meinen.

Nu ja, nu möten s' son'n lütte dröge Harstkauken as 'n Qualdux rünnerwörgen un uppassen, dat dei nich in't Halslock stäken blieben un dat dat denn noch leger ward.

Champagner un Sahnetorten kœnen sik dei leisten, dei dei würklichen Winner sünd un von wecker in'n Momang kein Wähler weit, ob's dat Land 'ne lichte Taukunft bringen.