Alternativ Heizen is wedder modern

vun Ursula Vollstedt


Ganz kommodig Fröhstück eten, 'n Blatt mit dat Ne'este vun'n Dag dorto, dat is to scheun. So fangt bi uns jeedeen Dag an. Wenn Sünndag is, denn geiht dat glieks dorno op uns Sünndagstour dörch Sleswig-Holsteen. Ik bün Bifohrer un kann mien Ogen no links un rechts wannern loten. Dat is ok scheun, wenn de Sünn nich schient, mußt dien Ogen blots wiet losmoken, dormit du all'ns opnehmen kannst.

Dor fallt mi oftins een lütte Geschicht in, de ik to Huus opschriev. Hüüt heff ik dacht, dat de groten Versekern sik wat infall'n loten mött. Duert nich lang, denn ward de eerste Holthupen klaut. Höört en Holtstopel to de Huusroot-Versekern? Mutt de as'n Fohrrad afsloten warrn? So vele grote Holtstopels as nu hebbt noch nie nich in de Goorns un op de Hööv stohn. Wenn man an en Neebueck vörbi kümmt, wo meist junge Lüüd mit lütt Kinner ehr Huus buut hebbt, dor stoht Huus bi Huus de groten Stopel.


"Meeh!", seggt de lütt Zeeg, "wokeen will soooo veeeel inböten?!"

Kaminholt bruukt tominnstens twee Johr to'n Drögen, dor mutt 'n ganzen Barg Vörrot ansommelt warrn.

Ob nu wull de Ehscheden weniger ward? Ob de Schedenafkoot sien Praxis sluten mutt? Worüm? Wenn een Poor sik mol so richtig dull in de Wull hett, denn kann een vun de Beiden, villicht afwesselnd, rutgohn un sik bit Holt tweihauen ornlich utdoven un sien Wut afreageren. Mi dücht, dat is beter as Töller twei smieten un sik anbrüllen.


So hebbt de Pyramiden vun Gizeh ok mal anfungen — un denn güng dat jümmer wieder...

Hett ok glieks 'n Vördeel, denn dat Holt mutt twei un ornlich opstopelt warrn, bevör de nächste Regen kümmt. Wenn se em or he ehr bi't Opstopeln helpt, is de Ehstriet villicht al wedder vergeten, un se sünd sik nich mehr böös.

Sühst wull, hett all'ns twee Sieden.


23.4.2011


na baven