Tollkirsche

Goorns bekieken

vun Karl-H. Nissen

In Wilhelmsborg sünd wi utstegen, glieks kunn man de bunten Hüüs vun de Buu-Utstellen sehen. Dor rechts, dat is de Niebuu för de Behörde för "Stadtentwicklung und Umwelt". Riesig groot, dat is wohl nödig. En Deel is ganz hooch, un alles sünd bunte Striepen.

"Mobil" dörch dat "Land vun de Oliven"

Un denn — ik heff rein beten verdutzt keken — kreeg jeedeen vun uns so en lütt Elektro-Motorrad mit veer Rööd. Föhrt ganz langsam un schoont de Been. Prima! Un weer ok nödig. Dat is wietlöftig dor un dat geev so veel to kieken.

In't Olivenland

Toeerst weern wi bi de Religionen, fiev verschieden Weltreligionen harrn dor enen Goorn. Fründliche Fruun hebbt allens verkloort. Up en gläsern Tafel weer dat Vadderunser in vele Spraken, ok up plattdüütsch.

In'n Goorn vun de Juden: "Gott maakte de Fisch"

Över blaag farvt Sagespäne en Ring mit wunnerfien bunte Fisch

As wi rutgüngen ut'n Goorn vun de Christen, kregen wi so'n Band üm't Handgelenk bunnen.

Denn hebbt se Böker upstapelt. Ganz bunt, as en Goorn vull Blomen. Kannst baben up rümlopen.

Un överall Water, dor en groten Diek, dor en See. In en so'n Diek stünnen de Water-Hüüs. Veerkantig Kassen, dat is hüüt so Mood, witt un blau vun buten, mit Wahnungen över dree Etagen. Billig sünd de nich, aver dat hett mi doch gefullen.

Alant an't Över

Denn weern wi in Australien un in Amerika, Teekisten stünnen dor mit Assamtee un Darjeeling, un ut Sansibar en ganz groot Felsen — veer Meter hooch — mit en jüst so groten Bonsai-Boom baben up.

Thema vun de Goornschau is "In 80 Goorns üm de Welt" na Jules Verne sien "In 80 Tagen um die Welt. Hier rechts: de "Drunken Piers" vun St. Franzisko.
(In'n Achtergrund dat groot Huus mit de Striepen.)

Wi sünd mit de Een-Schienen-Bahn föhrt, de ganz rundüm geiht, kannst allens fein vun baben bekieken.

Wi hebbt wat eten, dat müss sien, un denn wedder wieder mit uns Mobil.

"Teekisten mit Assam un Darjeeling"

Wunnerlich weer dat Algen-Huus. Dat is verkleedt mit Glas-Kassens, de sünd vull Water un in dit Water wasst Algen. De stiegt jümmers hooch un dal, sünd jümmers in Bewegung.

Achteran weern wi hier bi uns in Norddüütschland, sünd an Knicks lang föhrt un weern in de Lüneborger Heid mit en richtig Hünengrav. Na ja, dat weer en beten lütt, keen halven Meter groot, dat weer nüüdlich.

Anneke müss, is klor, na den Hexengoorn. Krüder geev dat dor to sehen un de Rezepten dorto. Mal sehn, wat dat warrt.

Tollkirsche

Wi stünnen vör dat "Wälder-Huus". Ünnen weer en Uutstellung, baben weer en Hotel — un dat allens — also dat hele Huus — weer mit Holt todeckt. Ik heff mi dat verkloren laten: Na twee Johr süht dat Holt schetterig ut, dat warrt gries, man denn höllt dat ewig, hett mi een vertellt. Lieden much ik dat nich.

Vör dat Holt-Huus weer en Straat. So richtig, as dat hüüt so de Mood is, mit en Slaglock in. Un in dit Lock weern Blomen plant!

Un denn överhaupt de Blomen! Würklich en "Meer vun Blomen". De Dahlien, unendlich de Farven, de verschieden Orten.
De Rosen, se weern noch an't Blöhen un de fiene Duft kettel de Nääs! Anneke kunn sik gor nich trennen.

En rode Blomenslag op de IGS, Foto ML

Dor weer en Beet mit rode Harvstblomen. Mann, wat gifft dat för vele "Roots"! Un all passt allerbest tohoop.

Wi sünd den ganzen Dag rümföhrt, hebbt aver lang nich allens bekieken kunnt.

Avends müssen wi trüch na'n Willemsborger Bahnhoff. De Haben is nich wiet af. Wi sünd an Container vörbi kamen, söben Stück över'nanner.
Wilhelmsborg is en ganz bunt Stadtviddel vun Hamborg. Een Eck, de heet Reiherstieg, warrt jüst moderniseert. 1.700 Lüüd wahnt dor - un de kaamt ut dörtig Nationen. Up den Bahnhoff stünn ne Musikkapell - jüst för uns, klor! - un de speel Dixieland - glööv ik.
Dat weer en feinen Geburts-Dag, de kunn nich beter sien.