Inflatschon

vun Behrend Böckmann


Wenn dat Geld verlüsst den Wiert,
löppt inne Wirtschaft wat verkihrt,
wenn mit't Geld, dat hüt innåhmen
is morgen nich mihr uttaukåmen!

Man deit Grübeln un ok Sinnen,
üm den Schulligen tau finnen,
un as't nich anners kåmen kann:
Putin is dei böse Mann.
Hei dreiht den Gashahn sachtens tau,
un wi marken nu ganz gau,
dat so düer as noch nie
is hüt dei nödig Energie.

Kinnings, is dat würklich wohr,
dat Putin as dei niege Zor
dei ganze Welt in Haftung nimmt
un den Spritpries nu bestimmt?

Bodder, dei bodderblaumengäl,
kost't mit eins nu mål so väl.
Licht dat an den Sünnenschien
orrer süll't ok Putin sien?
Bi't Bier, dat ut'n Håhn ward schenkt,
man an verläden Tieden denkt;
'n Maß kost't nu 'nen roden Schien —
dat hemm' nu Drinker von Putin.

Öl von Sünnenrosen in't Regål
kost viermål mihr as dunnemål,
doran möt blot schullig sien
dei ümmerböse Kierl Putin.
Wägen Dünger, Energie,
sticht dei Zuckerpries as nie!
Nu säuten wi mit Saccharin
un danken dat den Herrn Putin.

Kann dei Minsch sik nich mihr lieden
un lött sik dei Hor mål schnieden,
stäkt dei Horschnieder o Schreck
mit Putin ünner eine Deck!
Dei Semmelbäcker näbenan
kiekt dei Mählräknung sik an,
kalkuliert un räkent lies
den niegen Putinsemmelpries.

Läs nich dei Aibolit-Geschicht,
gåh mit Burattino in't Gericht,
ok wecker blot Katjuscha singt,
sik inne Eck von Putin bringt.
Hürst von Aram Chatschaturjan
di den Säbeldanz denn an,
låwst dei Wolgatreidler von Repin,
büst tau dicht denn an Putin.

In'n Bunnesdach in uns Berlin
sprök vör Tieden mål Putin,
dat tau Europa allemål
hürt ok Russland vör'n Ural,
man wull in't Hus Europa läben,
Hass un Krieg süll't nich mihr gäben
un œwerall künn Fräden sien,
säd dunnemåls as Fründ Putin.

Doch Putin, dei hett nich bedacht,
dat dei NATO em wat lacht,
dei krüppt nu an Russland ran
un måkt ut em 'n bösen Mann,
hei schütt up Brauder Wolodymyr
un höllt von Fräden gor nicks mihr,
doch keinein is sik ganz wiss,
ob hei Kain orrer Abel is.


Bild: Ludgerd Lüske. Klick op to'n Vergröttern!


13.7.2022


na baven