Ünnerwegens in de Wersermarsch —
          op de Sporen vun de swatte Null   

vun Meike Balzer-Fraun

Dor weer annertiets en lüttjen Graven, de hölp de groten Mooren in de Wersermarsch dröög to maken.
Mal up’n Dag schull nu en Autobahn vun Bremen na de Havens anne Noordsee hen
buut warrn.
In den lüttjen Graven keem en Stahlrohr, un de Stahlbetonautobahn kreeg en dicket Ünnerbett vun witten Sand vun de Geest dichtbi (anners geiht dat in’t Moor ja nich mit den Stratenbu) un toletzt noch en feine glatte Asphaltdeek.

Lange Johren leep allens goot. De Pendlers, Touristen, Lasters, Auto- un Truppentransporters un besünners de Swoorverkehr kunnen twüschen Binnenland un Küst hen un her susen. Meist harrn se sogor freie Fohrt op de A 27.
Dat Gravenwater leep sinnig dörch dat Rohr, un dat de Rost middewiel lüttje Löcker in den Stahl freten dee, dat mark keeneen nich.

Düssen Winter aver pladder dat utermaten in düt Rebeet vun Noorddüütschland.
Nüms kann sik op so veel Water besinnen! Histoorsch — as wi dat nu nöömt.
Wieldat dat Gravenrohr all den Regen nich faten kunn, söch sik dat Water sienen  Weg dörch den Sand ümto, maak de Löcker in de Tunnelwand grötter un spööl so ok noch Sand un Water dörch den Graven.
Gott wees Dank, wat Lüüd spitzkregen, dat blangen de Autobahn op een Mal depe Löcker in’n Bodden weren!
Se maken de Autobahn twüschen Uthlede un Hagen stracks dicht, ehr dat de Fohrbahn in’n Dutt sacken kunn.

De Swoorverkehr, de al na Noorden hen ünnerwegens weer, steiht nu op Parkplätz, un ok wat süüdwarts mutt, kümmt eerstmal nich weg. To’n Bispeel sünd dat Kraans vun Bremen na Bremerhaven. Un jeedeen Nacht fohrt normalerwies 30 Lasters mit Rotorblääd för Windrööd vun Cuxhaven in’t Binnenland.

De Lüüd in de Dörpen längs de Utwiekstrecken föhlt sik bald as in’n Lockdown. Bi den Autobahnverkehr op de Land- un Kreisstraten ahn Ampeln or Footgängeröverweeg kaamt se kuum  to ehr Navern or Ladens. Un Lüüd, de sik utkennt, brackert mit ehr Autos över Straten, de egens blots för Landweertschop, Footgängers un Fohrrööd dacht sünd. De Straten sünd to eng för Lasters in’n Gegenverkehr, so dat de Ränner meist to Matsch fohren sünd.
Un düsse Lüüd freut sik nu al bannig op all de Utnahmverlöven, de heel gau kamen schullt un de denn den Swoorverkehr ok noch dörch de Dörpsstraten schickt.

50 m vun de Autobahn warrt opbuddelt, 6 m deep. Massig Stahl in den Beton, Bööm un Kavels längs de Autobahn, allens noch natt, sworer as de dacht hefft.
De Graven schall en nie’et 3 m dicket Rohr kriegen. Noch dit Johr in’n Martmaand schall allens fardig sien. De Oosterverkehr mutt rullen!

Bild: Orator/Wikimedia Commons

Wenn denn nich noch een (oder mehr?) vun de annern fief Gravens ünner de Streck…

Schöön is ja, dat de Iesenbahn twüschen Bremerhaven un Bremen letzttiets faken fohrt un sogor meist pünktlich is. Man de Lüüd vun Bremerhaven un Nordenham kaamt de tokamen Weken nich över de Werser, wieldat de Fähr nich fohren kann.
Dat Holt vun de Anleggbrüchen mutt na 25 Johren utwesselt warrn. Dat gifft en Busverkehr dörch den Wersertunnel 20 km süüdlich vun Bremerhaven, man dat duert, un mit’t Rad büst meist opsmeten. Keen Weg gifft’t nich dörch den Tunnel, blots en poor Rööd hefft Platz in den Bus.
Aver ahn Auto un ahn Rad hest du hier en Problem. Denn ÖPVN mit Verlaat, dat is dat, wo een hier vun dröömt!

Wat nu kümmt, hett nix mit de swatte Null to doon — is aver ok Schiet.

De Iesenbahnbrüch över de Hunte is twei. De Kaptein vun en Binnenschipp hett letzte Week woll den Pegelstand nich richtig leest un de Brüch in’n Dutt fohrt.
Gifft twoors ok en Busverkehr twüschen Berne un Nordenham, aver ok wedder ’n Problem för de Radfohrers, man vör allens de Lüüd in’n Haven vun Brake — en Noordseehaven an de Werser för Agrarprodukte — weet nu nich wohen mit all dat, wat de Scheep dor anlandt, wenn de Töög dat nich aftransporteren köönt. Meist sünd dat Koorn, Foder för Deerten, Plantenölen, Holt un Swoorlastreedschopen.

Blangenbi, ok de Binnenschippsverkehr op de Hunte twüschen Oldenburg un de Werser steiht still.

Gifft dat en plattdüütsch Woort för "sensible Infrastruktur"?