„Land in Sicht“ för de Wersermarsch?     

vun Meike Balzer-Fraun

So süht dat hier nu ut:

Letzt Wekenenn hefft se en Deel vun de Utwiekstreck bi Uthlede dichtmaken müsst. Man de Stratenränner sünd nu woller flickt.
Veel Lasters söökt sik ehr egen annerswelk Weeg or warrt dor männichmal langs schickt, un so hefft nu ok annere Dörpen wat vun dat Malöör op de A27.

De Lokomotieven, de nöördlich vun de Huntebrüch fastseten un dor nich wohrt warrn köönt, hievt se in Brake mit Sworlastkraans op Binnenscheep un schippert se na Bremen hen. Mit de Waggons wüllt se dat woll ok noch maken.
För de Minschen dor baven gifft dat Busverkehren. So’n beten wat löppt sik also trecht. Man de Radfohrers maakt ganz lange Nesen.

De Lüüd, de dat Verantworden för de A 27 hefft, hefft glieks as dat losgung seggt, se wüllt allens versöken, de Saak noch in’n Martmaand to Enn to bringen. Se maracht sogor sünnavends.
Ok de DB will versöken, so gau as dat man geiht, en Behölpsbrüch över de Hunte to buen.

De Dreihbrüch, de nu twei is, is bald 100 Johr oolt. Bet 2020 harrst Verlööf, to Foot or mit dien Rad över de Brüch to balanceren. Lüttjen Padd den Diek rop un denn so’n smallen Weg blangen de Schienen langs. Aventüer mit Verlööf weer dat besünners för Kinner, feine Saak, gau wohen to kamen, för de Lüüd, de dor ümto wahnen un arbeiten doot.

En Behölpsbrüch is nödig för de Iesenbahn vun de Havens vun Nordenham un Brake, man Seescheep vun de Werser na Oldenburg köönt dor gor nich ünner dörch un lüttje Binnenscheep blots bi Sietwater.
Mit de Planeree vun en nie’e högere Dreihbrüch (villicht sogor för Radfohrers) sünd se al siet 4 Johren togang. Dat kann Johren duern, man sülvst en Behölpsbrüch geiht nich fix. Wat jeedeen, de dat Rebeet to’n Bispiel vun sien Radtouren her kennt, sik allerbest vörstellen kann! Dor inne Marsch sünd ja wiet un siet nich mal grote Straten, sünnern blots Dieken, Feldweeg un de lüttje Hunte.

Man nu is Land in Sicht!

En Afordente vun’n Landdag vun de CDU in Neddersassen föddert vun de Bundsregeren en „Verfahrensbeschleunigungsgesetz“ för den Uttuusch vun de Brüch. — Harrn se dat nich al längst mal in Gang schuven kunnt?

Schuldig — an allens!

Un de CDU in Bremen hett en „Dringlichkeitsantrag“ an de Bremer Börgerschop stellt:
Sluss mit dat kumplette Dichtmaken vun de A27 bet Enn vun Martmaand! Ok keen nie’en Infall.

Na, denn man tau!
Wenn dat nu nich slumpt mit all dat Flickwark, hett de Ampel tominnst Mitschuld to de Malören.