De Eeck is platt

vun Cord Denker

Dor stunn mol een Eeckboom¹, so stebig un stolt,
dat weer unse plattdüütsche Spraak.
Un Fritzing², he meen, dat weer dusendjohrs Holt,
he föhl dat un möök uns dat klook:
Ehr warme Klang, de leewt noch lang!
Do weer he sick seker un nie nich bang.

Foto: Hans-J. Grebin

Man denn in de hoochdüütsche Monokultur,
dor kümmer un nücker de Eeck.
Ehr Knorrn un ehr Knäst un ehr deegte Natuur
wörrn möör un bilütten ganz week:
Ji plattdüütsch Lüüd, nu ward dat Tied,
un nu mutt dor Hölp³ ran vun wied un sied.

Dree Länder betohln för dat Bremer Büro⁴
un gewen dor Geld för uns Platt;
un Plattland blöh op un weer kregel un froh:
Ohn Hölp weer de Spraak bald schach-matt.
Man, nu op't Mool geiht'd Dumen dol,
un nu sitt de Giez op den Spender-Stohl.

Hannober un Hamborg un Kiel geewt nix mehr
un Plattdüütsch kann sehn, wo dat blifft.
Dat köönt wi nich schlucken, dat mookt uns Beschweer,
so'n Knickeree⁵ is för uns Gift.
Dat Plattdüütsch leewt, wenn ji wat geewt,
dat is as een Segen, de Segen ööwt.

Europa ehr Charta⁶ weer schützen to Hand
un will uns dat Plattdüütsch bewohrn
Kulturpolitik in een Twee-Spraken-Land:
Man schall nich an't falsche Eck spoorn!
Hier singt een Choor för Hart un Ohr,
singt för een Huus in den Bremer Schnoor.

¹ In een' hurra-patriotischen Leedertext vergliekt de Dichtersmann de plattdüütsche Spraak mit een Eck, de al dusend Johrn dorsteiht un noch mol dusend Johrn vör sick hett, un de Tied ehr Storm geiht öber ehr
weg un kann ehr nix andoon.

² Dor stickt Fritz Reuter achter (1810-1874), de den forsch-toversichtlichen Text öber den plattdüütschen Eeckboom schreben hett.

³ Sied 1979 ward dat "Institut für Niederdeutsche Sprache" (INS) in de Bremer Ooldstadt von Neddersassen, Hamborg, Bremen und Schleswig-Holsteen mit finanziell Towendung öber Woter hool'n.

⁴ Dat INS hett de Anschrift: Schnoor 41-43, 28195 Bremen, Tel.: 0421-32 45 35

⁵ Nu hebbt de dree noorddüütschen Bundesländer de Towendung an dat INS to den 31.12.2017 künnigt. De Gründ sünd de rasche demographisch Umbruch in de Gesellschaft un de Wannel in de Medienlandschaft. Mit anner Wöör: Platt passt nich mehr in de Tied.

⁶ Sied 1.3.1998 steiht ok de plattdüütsche Spraak ünner den Schutz vun de Europäisch Charta för Regional- un Minderheiten-Spraken. Dat INS kann för besünner Projekten Geld ut Brüssel ranhooln.