Israel

vun Dieter Guderian

Dor is in'n Oogenblick so veel Unroh, wenn dat üm Israel un Palästina geiht. Wenn ik de Biller in't Kiekschapp ankieken do, dennso warrt mi swack üm't Hart. So veel höllsch Macht, de dor to sehn is! Wovun kümmt dat? Ik heff mi mol in de kloken Bökers un in't Internet ümkeken, wieldat ik gern en beten wat över de Geschichte vun de Israeliten weeten wull. Hier is ersmol ene groff Översicht:

Koort vun'n Nahen Oosten

Kiekt man in de ole Bibel, dennso kann man sehn, dat de Juden in dat Rebeet leevt hefft, üm dat se sick hüttodags strieden. In ganz un gor verleden Tieden kämen de Ägypters, de sik de Juden snappen dähn. Se schullen sik as Slaaven in de Frömd för de Ägypters afmarachen. Dat hett lang duurt, bit se wedder frie wöörn un in ehr Land trüch kunnen. Dat käm en anner Mal noch veel leger. So vör 2000 Johren kämen de Römers un verjaagten de Juden. Nu verdeelten se sik över de halve Welt. Ganz veele güngen no Europa.

As de Luft nich mehr so dick wär, dor kämen in de Johren 1882-1903 ut Oosteuropa so an de 30.000 Juden wedder trüch no Palästina. To de Tied harrn de Osmanen siet en poor Johrhunnert noch dat Seggen in Palästina. Achteran hefft de Briten de Osmanen dor rutsmeten. Dat wär 1917, as de eerste Weltkrieg noch in'ne Gäng wär.

De uursprüngliche Plaan to'n Opdelen. Koort: Wikimedia Commons

In dat sülbige Johr seggten de Briten, dat se de Juden helpen wulln, ene "Jüdische Heimstätte" in Palästina to schapen. Un se mokten to glieke Tied enen Plaan för dat Opdelen vun dat Land. De stünn in de Balfour-Deklaration.

Wenn eener eersmol wat in siene Hannen fasthöllt, dennso gifft he dat nich wedder weg. So käm't ok, dat de Völkerbund (de Vörlöper vun de UNO) de Briten an'n 24.7.1922 as Mandatsmacht över Palästina insetten dä. Dor seten se denn eersmol.

In Düütschland slöön de Nazis ehr Regiment op; dor kämen in de Johren twüschen 1932-1938 noch eenmol so an de 250.000 Juden ut Europa no Palästina. De Briten kämen op Duur mit de Situatschion nich so ganz trecht. De UNO besloot denn an'n 29.11.1947, dat dat ganze Land opdeelt warrt, dormit sik dor twee niege Staten etableern kunnen.

Dat hett nich mehr lang duurt, bet de Juden an'n 14.5.1948 ehren demokratischen Staat utropen dähn. Se hefft niege Städer buut. To'n Deel hefft se de an Öörd sett, de se all vun de Bibel kennten. Von nu an hefft se ok de Dören wiet open makt, dormit veele Juden ut alle Welt no Israel Aliya (d.h. de Inwannern) moken kunnen. De Palästinenser hefft keenen Staat mokt. Veele flüchten in den Gazastriep, de to de Tied noch Ägypten to eegen weer.

So is dat kamen. Koort: Hagalil

As wi weeten doot, hett dat all de Johren al Krieg twüschen de Arabers und Israel gäven. Mehrsdeels wär Israel de Winner. Dorbi hefft sik de Grenzen verännert un Israel is grötter worrn.
De Gazastriep is jümmers lütt west. An de Küst is de Striep 45 km lang und dweer röver 10 km. Dat is en beten lütter as dat Bundsland Bremen. In dat lütt Rebeet sitten so bi 1,5 Millionen Palästinensers. An'n End vun de Söß-Daag-Krieg in't Johr 1967 is Israel in den Gazastriep sitten bleven, üm de Lüüd in Schach to hollen. Eers 2005 sünd de Israelis dor wedder rutgohn. Siet de Tied hefft se sik wedder in de Wull. De Palästinensers hefft in de Tied so bi 10.000 Raketen no Israel rinschoten un de Lüüd in Südisrael dot oder bange mokt. As Israel sik dat nich mehr gefallen loten wull, is de Armee an'n 27.12.2008 in Marsch sett worrn. Un wat nu is, köönt wie alle Dag in'n Kiekschapp oder in de Bläder sehn. Dat is slimm, wat dor passeeren deit. Ik fraag, wokeen enen goden Weg weet, üm dat wedder in de Reeg to bringen.

So süht dat för de Minschen in Israel ut, wenn se op ehre politsche un geographische Situatschion kieken doot:

Dat Bild stammt vun düsse Websiet un wiest de Laag vun Israel
mang muslimische (nich allens arabische) Staaten