Keen billigen Jakob

vun Heinz Tiekötter


Dat is jo gornich wohr, dat de Minsch giezig is. Kloor; dat gifft 'n Barg Minschen, de mööt den Euro tweemol ümdreihn, bevör dat se em utgeben köönt. Dat is ok keen Schann. Man wenn de Gazetten un de Bilogen vull stoht mit Sünnergelegenheiten un Extraanbott, mit "hüüt 33 Perzent Nolass" orrer "dree Ünnerhemden för den Pries vun een" un du bruukst grod welk, denn nimmst di 'n Poor mit no Huus. Dat hett doch nix mit Giez to doon.

Wenn bi dien Supermarkt en Plakoot an de Lodenschiev hangt, dat hüüt "1 Pund Hack bloots € 1,50" kost un du all siet 'n poor Weken 'n Janker op Frikandellen hest, denn nimmst du twee Pund mit no Huus. Dat mookt di doch nich to'n "Billigen Jakob".

Freuher hebbt de Warbeagenturen de Egenschop vun Woren un Artikels rutstellt. Een Antog weer schick, he weer durabel un harr Knööp ut echten Hoorn. Hüüt wüllt se di in den Loden locken mit: "Düsse Week all Soken mit 40 Perzent Rabatt!" Besinnst du di op den Volkswogen? De Käfer leep un leep un leep! Vundoog wüllt se di ködern mit bloots 200 Euro Leasing in'n Maand.


Da wiest sogor dat Sporswien den Moors!

Freuher, in'n Harvst, hebbt se di no Capri inloodt. Dor sasst du di bi Sünnschien, Folklore düchtig verholen un bi godet Eten un scheunen Wien diene Gesundheit op Schick bringen. Hüüt heet dat bloots "14 Doog Capri all för 600 € un all wat du supen kannst is ok dorbi un in'n Pries inbegrepen!"

Se hebbt keen Argumente mehr; se hebbt bloots noch Priese. De Warbefuzzies schätzt uns falsch in un jem fallt nix mehr in. Un denn beschimpt uns de Politikers un de Presse as Giezknüppel.


21.7.2020


na baven