Ganz nie: dei Kangaroo-Hüppschauh

vun Behrend Böckmann

Näben ümmer niege Diäten kåmen ok ümmer niege Bewägungsoorten in Mod, üm sik bet in't hoge Öller däächt tau hollen. Denken wi dor blot an Hula-Hoop, Zumba, Gangnam, Yoga, Aerobic, Pilates, Jogging, HipHop un Rap, Rullschauh un Schlittschauh orrer Nordic-Walking-Stöcke un väle anner Såken, för dei sik ok ümmer Kunnen finnen. In'n Momang kåmen Hüppschauh in Mod, mit wecker man allein un mit anner un ok binnen un buten all dat äuwen un måken kann, wat dei Reklåme för disse Schauh verspräken deit. Hüppen as 'n Känguru un so wat dorför daun, dat' n nå 'n Schåden orrer 'n Operatschon dei Knåken- un Muskelbillung wedder in Gang kümmt, sik Rügg, Hart un Gelenken verhålen kœnen, sik kein Wåder in'n Lief ansammeln deit, wo't nicks tau säuken hett, un dat 'n nich von Dreihwörm ümschmeeten ward.

Un würklich, disse Hüppschauh wür all inne 70iger Johren von 'n Dokter in Kanada entwickelt, dormit Löper nå 'n Sportunfall wedder dat Lopen lihrn künnen. Inne 90er Johren ward dei Infall vonne Hüppschauh in Europa upgräpen un ei Hüppschauh wier in Vörstellungen up'e Bühn tau seihn. Un denn keem man up dei Stelzenhüpper, mit weckern Samuel Koch bi "Wetten, dat" in't Johr 2010 tau Schåden keem.

Dei Stelzen wiern wat för Akrobaten, œwer nicks för den Olldach. Un dei Hüppschauh wier nich ut'e Welt. Hüppen as 'n Känguru — dat wier dei Infall, un so kreech disse niege Hüppschauh nu den wunnerboren Nåmen "Kangoo Jumps" orrer "Kangoo Boots", dei ok för 'n "Home Workout" (dat sünd Sportäuwungen tauhus) tau bruken sünd. Un wecker einmål up Kangoo Jumps hüppt is, dei gifft nich up — un ward so taun Kangoo-Junkie as Minschen, dei einmål taun Buddel greepen hemm' un nie nich wedder von af kåmen.

Man künn ok ganz einfach seggen, dat sik dat üm Känguru-Hüppschauh för binnen un buten hanneln deit, dat man dei ümmer, wenn man will un Tiet un Lust dortau hett, antrecken un sien Hüppäuwungen tauhus måken kann, åhn den Schweit von'n Näbenmann in'n Studio rüken tau möten. Du büst ganz un gor up di sülben instellt, mösst up keinen "Coach" (Trainer orrer Upseiher) hüren, blot uppassen, dat du nich up'e Schnut föllst. Un dei Reklåme deit ok verspräken, dat dei Minsch mit disse Hüppschauh — dat Por wicht 4 kg — 30 cm inne Hööchde hüppt, dormit "outdoor" (buten) as "indoor" (binnen) joggen (duerlopen) kann un so sien Beinmuskulatur kräftigen deit, un dat's in Pandemietieden besonners gaut sünd, denn man möt ja nich in'n Studio gåhn. Un man nimmt sik dat Trampolinhüppen taun Ogenspeigel un stellt in Utsicht, dat dat Kango-Jumps-Hüppen ok mål 'n Olympisch Disziplin ward.

Un wieldat dei Dinger ok noch åsig düer sünd, hest du tau dei Hüpperie ok glieks ein leeren Büdel. Dei Nåm höllt also, wat hei versprickt. Un nu ex un hopp!