Dat Polit-Karussell

vun Jens-Peter Bey

Bitte opstiegen! Aaaaver jümmer mit Afstand!

Wenn de Kanzlersche in Brass is, kann se sik, Dunnerslag, bannig eschoffeern: Dat is ’n Orgie seggt se, dat Debatteern und Räsoneern vunwegen dat Halflang-Maken bi Corona. Lockern is nich, meent se. Anners verspeelt wi opeens uns Schangsen, den gräsigen Virus bi de Büx to kriegen.

"Wenn du dat Peerd anpackt hest,
nich wedder locker laten!", raadt Mutti

Man de lütt Armin Laschet ut NRW weet dat beter. Un Milljonär Fiete Merz, de ole Black-Rocker, is jüst so ut de Tüüt. All wüllt se wat warrn bi de Swatten. Ok de plietsche Wendehals Markus Söder, de Krütz-an-de-Wand-Nagler, de Bööm-Grabbler, de sik bi de Grönen anvietzen deit.

All Karussellpeer jachtert: "Wennehr geiht Mutti? Wennehr geiht Mutti?"

Man he versöcht dat annersrüm as Armin. Mehr so as Bavarian-Churchill: Bloot, Sweet un Tranen bi dat Corona-Gemetzel. BST un BMW. Dat bringt mehr as 50 Perzent. Dat langt, wenn’t üm de Wuss geiht, un de Kanzlersche af vun Hoff will.

"Ach wat, Düütschland kriegt doch Negativ-Tinsen, wenn dat Schulden opnimmt! Wi warrt rieker dordörch! Mit Schulden hüüt achterlaat wi de neegsten Gegeraschoonen Inkamen!"

Hett de Hanseaten-Sozi Olaf Scholz noch wat mittoschnacken? He grabbelt as Finanzer immer deeper in de Kniep. Pardautz. Dor sünd opeens Milljarden to finnen för düt un för dat und för nochmal wat. Keen will noch wat afhem? Sünd de Automobilbeschieters god noog opstellt? Un wat is mit de maddeligen Fleegers? Is Adidas noch goot to Foot?

Bilütten ward mi dat mulmig. Keen schall dat trüchbetahlen? Kinner un Kinnerskinner! Un wenn’t nicht anners is, kümmt ok so’n Inflatschoon wedder good topass!

Ik will den Dübel nich an de Wand malen. Ik doch nich. Dat Leben schrifft hüttodags Dreihböker, de binah so grulich sünd as de Geschichtsböker. Un jümmers dreiht sich dor en Karussell...