Katar-Kater

In Katar swingt uns Jungs ehr Been.
Kunn beter gahn! Kunn slimmer ween!
Denn leider löppt de Kickerie
in Katar bloots so blangenbi.
Veel mehr noch as dat Resultat
verargert mi, wat düsse Staat
— stinkriek is he noch bavenop —
un mit de FIFA alltohoop
sik leisten kann un rut sik nimmt,
bet allens na ehrn Willen stimmt!

Solk Binnen för den Kapitän
mit Regenbagen wulln s' nich sehn:
Politisch weer't, wöör provozeern,
so bruukt se dat nich tolereern;
dor gifft't en FIFA-Paragraf,
de heet: "Wees folgsam, still un brav!"
Un 'keen sik nich devot benimmt,
so as de FIFA dat bestimmt,
na de schall uns noch kennenlehren!
De Binde warrt wi em verwehren.

So'n FIFA-Haltung is nix wieter
as schäbig. Feige Büxenschieter
sünd all de DFB-Gestalten —
ik kann meist nich mehr an mi halten.
Se kniept den Steert in allemann —
to'n Schamen is dat, is en Schann.

Ich habe fertig,

segg ik bloots.
Uns Mannschap schafft sachs noch wat Groots
orr warrt villicht ok ünnergohn —
för mi is allens dat eendoon.
Ik seh bloots, wat ik jümmers seh:
De mit dat dickste Portjuchee
behöllt dat Seggen. Ik bün rut.
Ik knips mien Kiekschapp eenfach ut.

Teknen: Rudi Witzke