18 Euros sünd nich väl

vun Behrend Böckmann

Wat brösig gäben's mit ehr drüddet Entlastunspaket an, blot dat is kein Westpaket as tau DDR-Tieden, dat nå Kaffe un Appelsinen rüken däd, äben Westrükels in sik harr. Wi singen nich mihr "Uperstannen ut Ruinen", denn dat rod-gäl-gräune düütsche Triumvirat hett uns ja dei Tiedenwenn' bröcht, un wieldat Düütschland dei miehrsten Inwåhners un dei gröttste Volkswirtschaft von alle EU-Länner uptauwiesen hett, steiht uns 'n Führungsrull tau. So dei Böbelsten! Worüm denn nich wedder dei Hymne von Anfang an singen?

Luxemburg toppt uns? Kann nich angåhn!

Bi't Kinnergeld liggen wi nå Luxemborg up Platz twei. Villicht sall dat ut dissen Grund nu af 2023 18,00 Euros mihr gäben, üm ok bi't Kinnergeld den iersten Platz tau beleggen!

Porschefründ Lindner, "Robert Ratlos" alias Habeck as Droomdänzer twüschen Öko- un Atomstrom un dei kinnerlose Jogging-Kanzler Scholz as "Kanzler-Wumms" läbensgrot all för't Wassfigurenkabinett måkt — sei all marken gor nich, dat's sik as Regierung nich an ehr Verspräken hollen, dat dat Düütschland un dei Düütschen ok wiederhen gaut gåhn sall. Un wenn dat wat gifft, dat nich so löppt, as dat lopen süll, denn hett Muddi Merkel schuld.

So einfach is dat: Muddi Merkel as Physikerin künn anners denken as 'n Dichter un Paragraphenrieder un sei künn russisch un düütsch mit Putin schnacken. Sei hett 2008, as dei amerikån'sche Investmentbank Lehman Brothers dat Geld utgåhn wier, allens dån, dat ut dei Finanzkris kein Wirtschaftskris wür. Sei hett sik up russ'sches Ierdgas un Ierdöl verlåten, un sei wull leiwers Gas ut Russland dörch Nuurdstream 2 nå Lubmin hålen as dat düre un ümweltschädlich Frackinggas ut Amerika. Sei hett nich up Bögen un Bräken up niege gräune Strommœhlen sett't, œwer sei hett den düütschen Wähler nich mit'n Inflatschon anschäten un nie nich mihr verspråken, as sei hollen künn. Nu hett sik rod-gäl-gräun mit dei Devis' "Fortschritt wagen" anne Spitz sett't, spräkt von'n Tiedenwenn', måkt 100 Milljarden för dei Bundswehr locker, stört Düütschland mit Sankschonen gägen Russland inne Inflatschon, gifft mit 'n ierst, tweit un drüddet Entlastungspaket as Inflatschonsutgliek an. In't drüdde Paket kriegen denn nu ok Rentner un Studierende wat, denn dei sallen bi dei neechsten Wahlen dat Krüz wedder richtig setten; un dat Kinnergeld sall af 2023 üm 18 Euros upstockt warden.

Dat wi nochmaal nostalgisch na Merkel warrn schulln,
harrn wi ok nich dacht!

Tau dat güllig Kinnergeld von 218,00 Euros kåmen 18 Euros för't ierste un tweite Kind hentau. Dat drüdde Kind wür eerst nich un denn doch bedacht. Doch kümmt 'n Kind inne Schaul, denn möten dei Öllern all mihr as 'n Monatskinnergeld för 'n Ranzen un wat so dortau hürt utgäben. Un dei 18 Euros mihr, sei måken nich mål den Inflatschonsutgliek för Melk, Bodder, Brot un Gräuntüch ut: Melk kost't œwer'n Euro, Bodder mihr as twei Euros, 'n Streuselschneck mit Puddingfüllung gaut 2,50 Euros, Tüffeln hemm' äbenso as Wihnachtsstuten in'n Pries düchtig taulecht...

Dei armen, armen Familien! An düsse Steed
is ein Krokodilstrån von dei Politik fällig. Dei Trån is 18 € weert!

So sorcht dei rode Kanzler dorför, dat sien gäl-gräunen Mitstrieder dei Taukunft anpacken, sik mit grote Klorheit för allens insetten daun, ok dorför, dat dei Bundswehr mit 100 Milljarden Euros "modernisiert" ward, also mit 'n Hümpel Geld, dei grötter as dei för dei drei Entlastungspaketen is. Un "Robert Ratlos" verklort uns, dat 'n Bäcker, dei ut Kostengrünn' sien Handwark upgifft, nich dat Geld utgåhn is, sonnern hei blot sien Backstuf för' n Tiet dicht måkt.

Düsse Bäcker-Wichtel kennen nich den Ünnerschäd twüschen Insolvenz un Liquidation
von ein Geschäft, œwer Philosoph Robert kennt em!