Kirchendag smitt Plattdüütsch rut

vun Karl-H.Nissen

"Korl, wat is mit di? Du maakst di Sorgen üm uns Plattdüütsch Spraak? Ik meen, Plattdüütsch is so lebennig as lang nich mehr. Överall in uns Land gifft dat plattdüütsch Vereine. Un denn, Korl, Plattdüütsch in Kinnergoorns, Plattdüütsch in de Krankenhüüs. Dat gifft plattdüütsch Theater, wi weern graad in de Premiere vun de Nedderdüütsch Bühn hier in Lübeck. Du müsst dor ok mal hengahn, maakt Spaß.
Du kannst ok mal en plattdüütsch Book lesen. Uns Blatt bringt alle Woch enen Stremel Platt.

Hest du dat leest: Plattdüütsch in de School! In uns Land sünd 27 Scholen utsöcht, in de gifft dat plattdüütschen Ünnerricht.

Dorto Plattdüütsch in de Kirch. Letzt weer de grote Stecknitzfohrer-Gottsdeenst in'n Dom — up Plattdüütsch. Pingsten geiht dat wedder los mit de plattdüütschen Andachten in Lütten Grönau, elkeen Sünndag bet Oorndank.
Up den Markt höörst Platt un in'n Bus.
Korl, Plattdüütsch leevt — worüm treckst du so'n Snuut?"

"Worüm ik so'n Snuut treck? Dat will ik di vertellen. Du hest mi jüst verkloort, woans dat mit de Kirch un Plattdüütsch löppt. Dat is fein — hier in't Land. Ganz vele Johr gifft dat den Evangelschen Kirchendag. Jümmers weern de Plattdüütschen dorbi, harrn ehr egen Eck, dor seten Lüüd, mit de kunnst Platt snacken. Weer dat villicht slecht besöcht? Ach wat! Letzt Johr in Hamborg, wat weer dor för Leven!

Tokamen Johr is de Kirchendag in Stuttgart. Gewiss, dat is en beten wieder weg. As dor de Kirchendag 1999 al mol weer, weer dor gewaltig Bedreev in't "Mundart-Zentrum". Ik weet noch, dat ik för de Swaben un all de Hoochdüütschen en plattdüütsche Predigt "simultan-översett" heff, se harrn ja sünst keen Woort nich begrepen, un se hebbt mit de Ohren slackert un seggt: "Dat schall en Dialekt sien?!" Un dor harrn se ja recht, denn uns' Platt is ja en Spraak.

Man is dat en Grund, de Plattdüütschen vör de Döör to setten, ehr rut to smieten? Dat hebbt se daan, de düchtigen Lüüd an de Spitz. Se seggt, se wüllt den Kirchendag "slanker" maken. Gode Idee — denn flüggt Plattdüütsch eben rut!"
Korl weer so in Rage, he hau mit de Fuust up den Disch.
"Sett wi villicht de Kirch vör de Dör? Höört wi up, fraam to sien? Nixda. Man se, de Kirch, deit dat eenfach un ahn uns to fragen. De Plattdüütschen schallt even för sik alleen beden un fiern, nich mit de annern tohoop up den Kirchendag. Is dat christlich? Is dat Gotts Will? — Nu segg du doch mal wat dorto!"

Ik heff nix seggt. Ik heff ok up den Disch haut.