Klaag un Anklaag

vun Rudi Witzke †

Gülln lücht
Jerusaleemsteen
in de Muurn.

Hellicht Sünn
övern Ölbarg,
Heven oraang-rood.

De ool Fru
un ehr Enkel
in'n Schadden

töven op
laven' köhl Water.
Een snüürt Bünnel...

dor in de Eck.
"Loop! Loop!"
Sien letzten Wöör.

Denn Blitzen
un Krachen un
överall Bloot.

Em ritt in de Höcht,
se sleit dat daal.
Ünner Sliern

vun Bloot
een letzt Blick
up utlöscht Leven!
Stell di vör,
du slöppst un se staht
vör de Döör.

Suldaten!
Keen Weg,
dorvuntokamen.

Se griept
dien' Jung.
He een Verbreker?

Se griept den "Däder".
Binnt Ogen to...
Woll blots Doot is beder.

Se piert em
se foltert,
nix mehr weit he.

Staat, de in de Tokunft,
wull gahn
för Recht vun elkeen

to stahn,
pienigt un quält.
Nüms kann vörbi

doran sik sliekern.
"Kollateraal"
starven Kinner.

So schreev Rudi Witzke al 2002, so kontrasteer he dat Lieden op all Sieden — op en Wies, dat knapp to kennen is, vun welk Sied he jüst snackt...

Un wieder sammel he ut Medienberichte:

"Hamas leader's wife forbids son to become suicide bomber"
stünn in de "Jerusalem Post"
an'n 2. August.

Wenn de Sekerheit dat föddert, dennso dörffst "scharp verhöörn".
Israeelsches Recht?
"Wer wollte heute dem Shin Beth in den Arm fallen, wenn er erklärt,
mit "außerordentlichen Verhörmethoden"
neun von zehn geplanten Attentaten zu verhindern?"
(ut "Freitag")

Hüüt heiten de Steden noch jümmer Jerusaleem, aver vör allen Steden in'n Irak un up Mali, Madrid un London. De Doot is ut de Lien un sien Knechten swemmt in Bloot. — Keen Minschen mehr?

Rudi Witzke leev Israel un dat Hillige Land, hett dat veel bereist. He wüss, dat de Hass dor nich in'n "luftleeren Ruum" wussen is. Is meist good, dat he de Tostänn hüüt nich mehr beleven mutt.

26.11.2023


na baven