Klocken in Berlin

vun Hannes Frahm

De Mengenlehre-Klock in Berlin. Op düt Bild ut Wikipedia wiest se Klock 10.31. Dat geiht so: Jedeen lüchten Feld baven bedüüdt 5 Stünnen, jedeen lüchten Feld in de tweete Reeg bedüüdt 1 Stünn. 2 Feller lücht baven, keen in Reeg 2 = 10 Stünnen. Jedeen lüchten Feld in Reeg 3 bedüüdt 5 Minuten, jedeen lüchten Feld heel nerrn bedüüdt 1 Minuut = 31 Minuten.

In uns Bundshööftstadt Berlin gifft dat ja Klocken, de sünd al wat Besünners. Ob de nu anners lopen doot as in Hamborg oder Köln, dat is noch nich seggt. Aver besünners sünd de Klocken doch.

To'n Bispeel de Klock över de Lehr vun de Mengde bi dat Europacenter an'n Budapester Platz. Dat is al en Klock, dor mutt een doch nu mal henkieken, wenn een in Berlin is. Un denn fraagt man sik, woans düsse Klock denn nu jümmers to Sommerstiet un to Wintertiet ümstellt warrt? Dat is ja för een, de sik nich mit düsse Klock befaat hett, doch nich so eenfach dor so dörchtostiegen.

Alleen sik mit düsse Klock to befaten un de to begriepen, woans de de Tiet anwiesen deit, is al en Saak för sik. Un denn dat Ümstellen jeedeen half Johr stellt een sik nich so eenfach vör. Dat Vörstellen kann een de Lichten ja de 60 Minuten gauer dörchschalten, doch de een oder anner Licht mag nich so'n ringen Stromslag hebben un kann sodennig gau twei gahn. Un in Harvst geiht dat de 60 Minuten wedder retour in de annere Richten. Jedenfalls schall se een de rechte Tiet anwiesen un funktioneren.

Düsse Klock leep 2019 noch korte Tied mal trüchward, nu aver wedder flott vörwarts: De Schuldenklock. Bild: Martin Kraft/Wikimedia Commons

De twete wichtige Klock is de Klock, de en de Schullen vun uns Staat anwiesen deit. Woveel Geld wi all tohoop Banken un anner Geldgevers schullen doot. Ok düsse Klock wiest de Schullen op de Minuut nipp un nau an. Wat heet hier nu "Op de Minuut"? Wat is, wenn sik de Minuten ännern doot as bi dat Ümstellen vun de Tiet vun Winter op Sommer? Hebbt wi denn in een Minuut bi dat Ümstellen nu mehr Geld op'n Kopp haut as ahn Ümstellen? Warrt mehr Geld in de Wintertiet oder in de Sommertiet utgeven oder slimmer noch, verbrennt? Ok dat is en Klock, de mit de Tiet löppt un ümstellt warrt mutt, blots woans funktioneert dat un wokeen maakt dat? Uns Finanzminister oder stickt annere dorachter? Tellt wi nu vörwarts oder trüchwarts? Wokeen weet dat un tellt mit de Tiet mit? Klock is Klock un Wintertiet is keen Sommertiet.

As Kind hebbt uns de Olen vertellt, dat Middeweken de wichtigste Dag in de Week is. An'n Middeweken warrt in Berlin jümmers de Week deelt. Dat is heel wichtig för de, de blots en halve Week arbeiden doot. Arbeit een nu vun Maandag bet Middeweken oder vun Middeweken bet Friedag. Hölt de nu Middeweken Klock twölf op oder nu doch üm Klock een oder fangt he Middeweken Klock twölf an to arbeiden oder eerst üm Klock een? Kloor seggt hett dat bether noch nüms. Een is eenfach Klock twölf anfungen oder opholen, seggt hett keeneen wat, ob dat so richtig is.
Tja, dat Ümstellen vun de Klock is doch nich so eenfach.