vun Behrend Böckmann

Hüt willen wi mål bäten dorœwer sinniern, wat dat mit den Lüdschnack „sik in't
eigen Knei scheiten“ up sik hett. Üm't gliek vörwech tau nähmen, wecker sik in't eigen Knei scheiten deit, dei schütt sik nie nich mit 'n Knarr 'n Kugen in't Knei, sonnern dei kümmt dörch sien eigen Hanneln tau groten Schaden in all sien Läbenslagen. Disse Bispills wiesen uns dat:

• Wesselt 'n Sportler sienen Verein in'n Globen, dat hei bi'n annern Verein tau mihr Geld kümmt, un denn blifft doch dat Geld ut, denn hett hei sik in't eigen Knei schåten.
• Secht 'n Ünnernähmer 'n Updrach in den Globen af, dat 'n Updrach von'n annern mihr inbringen däd, un dei Såk bringt weniger in un geiht lech ut, denn hett hei sik in't eigen Knei schåten.
• Ward 'n Schäuler schnappt, dei mit Hülp von'n Ackerschnacker Upgåwen in'n Klassenarbeit lösen deit, un kricht hei dorüm wägen Bedreigerie as Lohn Null Punkte — dei hett sik in't eigen Knei schåten.
• Ok bi dei Partnerwåhl hett sik all männig Fru orrer Kierl in't eigen Knei schåten.

Idiot! Staats in't Knei schallst du in't Door scheiten!

Un inne Poletik is dat nich anners, ok Poletikers kœnen sik bannig dull in't eigen Knei scheiten: So höllt Veronika Grimm — Perfessersch för Volkswirtschaft anne Uni Erlangen-Nürnbarch un Stiernenkiekersch in'n Hogen Rat von uns Bundsregierung — Habeck sien Maföken, den Inbu von Öl- un Gasheizungen af 2024 tau ünnerseggen, allein all wägen dat Fählen von Fachlüd un dat dortau nödige Material för'n Såk, mit wecker sik dei Regierung sülben in't Knei scheiten künn. Un Tiedungsmåker Alexander Will ut Oldenborg/NS meint ok, dat sik Habeck un Konsorten sülben in't Knei schåten hemm', wenn's Priesdriewerie in'n Verbinnung mit ehr andachte Energiewenn' beklågen. Un so ward nå Alexander Will ok dei Ukraine-Hülp 'n Geschäft, dat in'n Düstern måkt ward, denn keinein weit, wat dor würklich los is, denn allens, wat uns tau Uhren kümmt, dat ward uns as mœglich un nich as würklich verklort.

Sülben in't Knei schåten hett sik dei Koalitschon mit ehr Devis' „Fortschritt wagen“, den Wumms un Dubbelwumms un dei militär'sche Ukrainehülp. Dei utposaunte Tiedenwenn' bröcht Düütschland un all sien Bündnisfrünn' dei Inflatschon un männig Börger wull ok schlåplose Nachten. Un dor kümmt noch 'n Schuss in't eigen Knei. In Länner rund üm Düütschland rümmer gifft dat reigen un ümweltfründlichen Atomstrom; Habeck will sogor dei Ukrain dissen „schlimmen“ Strom afnähmen un in Düüschland dei letzten drei Atomkraftwarken afschalten. Höllt hei den ukrain'schen Atomstrom för bäder as den düütschen Strom?

Uiuiui, dor is ja allerhand krumm! Koenen dei Maten dat wedder gradebögen?

Un mit em in't glieke Hurn tuten deit dat gräune Dreigestiern Katharina Dröge (Johrgang 1984) as Gräunenbaas*in in'n Bundsdach, dei för Fählutsågen bekannte Beraderin Claudia Kemfert (Johrgang 1968) as Gelihrte in Wirtschaftsfrågen un Ricarda Lang (Johrgang 1994) as Parteibaas*in un äbenso dei gräue Klaus Müller (Johrgang 11971) as Präsident vonne Bundsnetzagentur, Michael Keller (Johrgang 1977), dei för'n Middelstand taustännige Ostdüütsche un dei bavarisch Dieter Janecek (Johrgang1975) as gräuner Koordinator för dei Warften un den Frömdenverkihr. Wenn dei sik man nich bannig dull in't eigen Knei scheiten, wenn's wiederhen ehr ideologischen Grappen in politische Dœmlichkeit ümwanneln!

Weck gräunet Denken steiht dorachter? Hemm's gor kein Bang, dat sik dei Lichtenrevoltutschon von 89 nu gägen 'n gräunen ideologischen Machtklüngel wedderhålen künn un sei so as Erich vör mihr as dörtig Johren mit sien Anturåsch von griese Mannslüd schasst warden? Œwer denken disse wiesnäsigen Gräunen denn gor kein bäten an Marx, dei all säd: „Dei Infall schlöcht in Gewalt üm, wenn denn dei Minschen dat willen!“

Dorbi is Gewalt doch alltied ein slechte Idee! Dat schullst du knienich maken!

Œwer dor scheiten sik noch mihr in't eigen Knei. Vörwech dei Kanzler sülben, dei dörch sien SPD-Poletik vonne CDU œwerhålt wür. Ok all, dei flüchtende Minschen taun einen in Frömde un taun annern in Schutzsäukende ut'e Ukrain indeilen un ungliek behanneln, warden 'n Schuss in't eigen Knei kriegen. Nich utsporn will'n wi Norbert Röttgen vonne CDU, dei Macron nå sien China-Besäuk vör einen höllt, „dei von all gauden Geister verlåten“ is, blot dat hei dorför is, dat Europa nich länger 'n Anhängsel von Amerika blifft. Wecker so schwatt süht, dei schütt sik ok sülben in't Knei!

Opletzt gåhn dei Bösen in dei Knei un dat Gode winnt.