De Krabben-Philosophie

vun Addi Kahl

Wer pult blots all de Krabben ut, frisch in de Noordsee fungen,
wenn se mit Spegeleier op Bradkantüffeln delikat landt op de Tungen?
Wenn Klookschieters düsse Fraag stellt, de maak ik denn fix kloor:
„De pult man leider in Marokko ut, un dat all lange Johr,
denn de Krabbenpulerie
is bi de Friesen langen vörbi!“

To allereerst hievt „Fischers Fritz“ dat Krabbennett an Boord,
denn sott he se in Ketels rosa, vun jeher Fischers Oort.

Denn de Krabbentörn na Afrika? Keen Seemannsgarn, echt wohr,
un wenn de Öös ganz nakig sünd, sünd se balden wedder door,
denn de Krabbenpulerie
is achtern Diek all langen vörbi!

Tscha, an Krabbentörn na Afrika hebben sik plietsche Typen stöört.
Krabbenpulen, Patent anmelden, un af un to hett man all höört,
'ne Krabbenpuulmaschien weer nu de Lösung achtern Diek.
Bünn awer nich ganz seker, un op dat hölpt in 't Friesenriek?

Denn de Trick is de Knick bi de Krabben an 'n Steert,
an 'n drütten Ring, hest du dor mol den Knickdreih probeert?
Opeten, afreten, weg smeten? För Stümper is Pulen bescheten,
den Krabbenjanker stillen könnt Anfängers fix vergeten.
Man de Krabbenpulerie
is bi de Friesen lang vörbi!

Un wenn du to fuul büst, sülven Krabben to pulen,
bruukst bi Krögers blots in Iesschapp rin schulen:
hunnertgrammwies, schöön in Plastik, appetitlich un frisch,
vun marokkanische Deerns pult, ganz frisch op 'n Disch.

Kregen de oolen Fischer nochmaal düssen Tostand to sehn,
Krabben na Marokko? Meenst Du, se fünnen dat wohl schöön?
Un so föhr ik na de Nordsee, kööp mi bi 'n Fischer ganz frisch
'ne Tüüt vull rosa Krabben fangfrisch op 'n Disch.
Ik puul se sülven, dat gönn ik mi!
Sülvst pulen, wat för'n Leckerie!
Ja, de Krabbenpulerie
is för mi noch nich vörbi!