Wecker kennt noch Kriegsdriewer?

vun Behrend Böckmann

All, dei bäten öller as föftig sünd un dörch 'n Polytechnischen Ünnerricht ok mitkrägen hemm', woans man sülben wat klütern kann, dei hemm' ok wat vonne Kriegsdriewer hürt. Tau Bispill wür vertellt, dat dei amerikanschen Kriegsdriewer kort vör'n Anfang von'n Koreakrieg den Tüffelkäwer œwer dei junge DDR von'n Fleiger ut afschmäten hemm', üm so dei Tüffelaust tau ruiniern. Un dei Schäulers güngen in Kampf gägen disse Kriegsdriewer up't Tüffelfeld, hemm' dei Käwers afsammelt, mit hitt Wåder behannelt un denn dei Häuhner as Extraratschon gäben.

Un dei Tüffelkäwers wiern noch gor nich all afsammelt, dor füng dei Koreakrieg an. Un dei gottlosen Lenker un Denker in'n Osten wüssten wedder disse Kriegsdriewer uttaumåken, un sei wiern bet tau dei Wenn' an't Wark. Wat in't Middelöller den Düwel in'e Hacken schåben wür, dat wier in'n 20. Johrhunnert dat Wark vonne Kriegsdriewer.

Denkmal vör de UNO in New York, © Wikimedia Commons, David Vignoni

Un denn keem dei Revolutschon mit Lichten un dei Wenn', dei Kriegsdriewer wier't Handwark lecht, dei Kolle Krieg tau Enn'. Endlich Fräden in Europa. Dei sowjet'schen Truppen verlåten dei einstig DDR, dat Hauptquartier in Wünsdörp in'n Süden von Berlin ward wedder düütsch; dei amerikån'sche Air Base Ramstein bi Kaiserslautern blifft un von dor ut rückt man nu so pö à pö den Russen up'n Pelz un måkt em buckig. Ut Tieden von'n Kollen Krieg warden Tieden, wo nu wedder würklich schåten ward. Dei Kanzler verkünnt denn, as Russland sien "militär'sche Operatschon" inne Ukrain anfangt, dat 'n Tiedenwenn' ansteiht, dat Düütschland dei Ukrain in'n Kampf gägen den bösen Putin helpen möt, wenn denn Frieheit un Demokratie in't eigen Land nich ünnergåhn sallen.

Un wi hemm' wedder dat olle Muster — dei Russ is bös un wi sünd dei Gauden un wi möten näben dei nödige Hülp vör dei Ukrain uns Bundswehr mit 'n Sonnervermögen kriegsdüchtig måken. Un dor finnen sik in'n Bundsdach ok Maaten, dei in dit Kriegsgebell as niege Kriegsdriewer düchtig mithulen.

Doch möt 'n fasthollen, dat dei, dei hüt so lud krakälen, sülben nich beläwt hemm', wat Krieg bedüden deit. Sei sünd tau jung, üm tau begriepen, dat dat nie wedder 'n Operatschon "Gomorrha" as in Juli 1943 in Hamborg mit 34.000 Dode orrer 'n Bombardierung as in Dresden in'n Hornung (Februar) 1945 mit bet tau 25.000 Dode gäben sall. Un so kreigen ut binåh jede Partei niege Kriegsdriewer nå dat Johrmarktsvergnäugen "Hau den Lukas" dat niege Lied "Hau den Russen".

Lübeck 1942

Ut'e Oppositschon kreiht dor Roderich Kiesewetter (Johrgang 1963), Oberst a.D. vonne Bundswehr. Hei sitt in'n Utschuss för Butenangelägenheiten un verlangt, dat drei Milljarden as Sonnervermögen nödig sünd, dormit Düütschland kriegsdüchtig ward, un dat man dei Ukrain Waffen gäben möt, mit dei man ok den Russen in'n eigen Land düchtig ketteln kann.

Dei gräune Anton Hofreiter (Johrgang 1970) sitt in Europautschuss von'n Bundsdach un verlangt, dei Schullenbrems tau lockern un tau investiern, dormit wi dei Ukrain nauch Waffen un Munitschon taukåmen låten kœnen, denn wenn dat nich so kümmt, denn setten wi nå sein Sichtwies uns eigen Säkerheit up't Späl.

Michael Roth (Johrgang 1970) is as SPD-Maat tau Tiet Baas von'n Utschuss för Butenangelägenheiten. In'n Bisien von Hofreiter un dei gäle Marie-Agnes Strack-Zimmermann hemm's all 2022 as Adepten vonne Taukunftskoalitschon dei Ukrain besöcht un wurmœglich Öl in't Füer gåten. Dei quietschfidele Kriegdriewersche Strack-Zimmermann sitt as Gäle in'n Utschuss för Verteidigung un will den Kanzler wiesmåken, dat hei endlich por Taurus- Raketen — taun Stückpries von ein Milljon Euros — sienen Fründ Wolodymyr Selenskiy taun Geschenk måkt.
Drömen disse niegen Kriegsdriewer dorvon, dat dat noch 'n drüdde Uplåch von Sarajewo 1914 orrer Gleiwitz 1939 gäben künn?