Schöne Utsichten!

Nu is dat jüst so kamen as de Prognose! Na 39 Jahren Regeren in NRW is de SPD afwählt worrn. Trotz oder wegen Raat vun Professer Rürup, Hartz I-IV, Agenda 2010 un Wohrschoen vör Heuschrecken?

De CDU hett eene Millioon Stimmen mehr kregen. So hooch as de Tall vun de Arbeitslosen. Is dat Tofall? Op jeden Fall hebben de Heuschrecken een Deel vun de SPD-Stammwählers opfreten!

‚Münte’ sien utverschaamtes Grienen bie de Ankünnigung vun Neuwahlen in dissen Harvst hett aver de CDU de Petersill verhagelt. De SPD-Vörsitter hett eene Snuut maakt as wull he seggen: "Dat hebbt ji nu dorvun! Nu mööt ji Farv bekennen! Wüllt ji den totalen ——" Ne, dat to'n Glück nich! Aver: "Wüllt ji Stüersenkungen för de Ünnernehmen, Arbeitslosengeld II un billige EU-Utländer? Denn mööt ji SPD wählen! Wüllt ji aver Sozialdumping, keen Künnigungsschutz, noch mehr Arbeitslose, also den Ünnergang, denn maakt de Wahlkrüüzen as in NRW!"

Na den eersten Schock weer Angela Merkel kloor, dat se ehr Teel, Vörsitterin vun de Düütschland AG to warrn, dicht vör Ogen hett. Aver Vörsicht! Ik heff dat Geföhl, dat Ministerpräsident Stoiber siene Ambitionen noch nich opgeven hett. He prahlt mit siene Regerungskennis un denkt, dat he de betere Kandidat is.

Herr Westerwelle warrt no bloots 6,2 % siene inlagerten Schöh mit de 18-Perzent-Sahlen ut'n Schapp kramen un bi jede Talkshow dem Moderator ünner de Nees holen.

Avers woneem hett se de Hoor? Op de Tähn?

Sogar Bertha hett den Sünndags-Krimi vergeten un de Berichte vun de Wahl in’e ‚Glotze’ keken. Sabine Christiansen hett se sik aver schenkt. Siet de Tiet de Kabarettist Schramm se afqualifizeert hett as "Klofrau", hett Bertha de Nees vull. Aver se weer ok so övertüügt vun Fro Merkel un ehr modern Hoorsnitt. Se seggt, se will Angela wählen. Endlich eene Fro as Kanzlerin! Un ok wegen de Quote! Se meent, dat geev noch nich so vele.

Wat versteiht Bertha al vun Politik un Froons-Quote? „Ik warr den ‚Genosse der Bosse’ wählen!“ heff ik antert. Bertha hett smuustert un fraagt: „Wegen de Quote?“

Ik bliev ganz rohig un heff seggt: „Du wählst Merkel wegen de Froons-Quote un ik Schröder ut Mitleid un Barmen!“