Münte I bet Hartz VI

Siet de Kanzler- un SPD-Raatgever Peter Hartz sülvst in Schwulitäten kamen is, geiht dat mit de Partei wieder bargdal. De Vörstand hett to sösstig Perzent enen Knall, sünst harr he sien Vörsitter Franz Müntefering nich oplopen laten. Wenn man wedder na „links“ stüern will, denn nich to dissen Tietpunkt, wo de Wählers endlich Kloorheit hebben wullt.

Dörv man den Lüchttoorn vun de SPD so lichtfardig ramponeeren?

Jeder Vörsitter kann sik siene Sekretärin sülvst utsöken un mutt sik nich ene opdwingen laten. De annere Franz, de Lichtgestalt in’n Football, beter bekannt as Kaiser, hett sik jüst ümmer siene Sekretärinnen bie'n FC Bayern München rutpickt. To recht weer de Suerlänner bannig suer!

„Edmund der Zauderer“ hett nu sienen Grund funnen un is afsprungen. He krüppt fieg torüch in sien sekeres Nest na Bavaria. Angela swiggt still un smuustert söötsuer. As he dorbi weer, maak he bloots Arger, un wenn he geiht, maakt he nochmaal Arger. Nee, Edmund maakt Angela keen Spaaß. Mit Edmund orr ahn Edmund — wat is slimmer för ehr?

Nadem Andrea Nahles ehr Kandidatur torüchtrocken hett, is de verradene Vörsitter sachts praat, as Arbeitsminister un Vizekanzler in de groote Koalischion Verantwoorden to övernehmen. Mit Matthias Platzeck as sien Nafolger is he inverstunn. He hett sik as een wiest, de to bruken is, he weer de groot Organisatoor un best Dieklöper bie dat Hoochwater. Mit siene natt-forsche Spraak kann he Lüüd övertüügen. He schall praat siene Regenkledaasch un de Gummischöh wedder ut’n Schapp halt hebben. Wieldat nich blots de SPD, sünner ganz Düütschland dat Water bet to’n Hals steiht! Is Platzeck nu de Redder? Sünd wi denn överhaupt noch to redden?

Nüms weet dat. Woans een de fehlenden Milliarden insporen kann, dat is noch kumplett unbekannt. Trotz anner Utsaag vun de SPD vör de Wahl warrt de Mehrwertstüer seker ropsett. Sporen wüllt se ok bie de Arbeitslosen, un de ganzen Hartz-Gesetze schölen enen annern Naam kriegen. Wohrschienlich „Münte I – IV“. De SPD-Spitz un afsünnerlich de afwählt Kanzler as sien Fründ is dat schaneerlich, wenn dat Woort „Hartz“ utsproken warrt. De Arbeitslosen kannst „Hartz IV“ ok nich mehr tomoden, sietdat Herr Hartz so in Schwulitäten is. He schall sik sülven happig an dat Spesengeld vun'n VW-Konzern bedeent hebben. Un denn ok an „Lustreisen“ tosamen mit Bedreevsrat deelnahmen hebben. Nich to vergeten de vun VW betahlte „Modell-Wohnung“ un Sex mit Prostituierten.

Bertha meent, se hebbt mit em den Buck to’n Goorner maakt. Un ik bün seker, vun „Hartz I-IV“ warrt nix över blieven. Keen Ingang in de Geschichtsböker as geniale Reform. Un all Mannslüüd denken blots niedsch an Hartz-VI (sex!).