Deeppunkt

Trotz all Protesten ut de Wirtschaft un vun Düütschland siene mächtige Boulevardzeitung hett de Regeren de Stüergesetten dörchsett.

„Vun Januor af an warrt de Levensümstänn ok för uns dürer“, heff ik Sünnavendmorgen bie'n Fröhstück to Bertha seggt. Aver Bertha hett blot nickköppt. Se maakt sik Sorgen üm Schalke, nadem Rudi Assauer dat Handdook smeten hett. Bertha is in Wattenscheid boren, un Schalke 04 is noch ümmer ehr ole Leev.

„Worüm hett de Vereen em gahn laten? So en schööner Mann! Un wat för en schöönes Poor, wenn he mit de Enkeldochter vun Thomalla Reklaam för Beer maakt!“

„Dat is bald vörbi!“ heff ik grantig antert. „Weg vun Schalke is weg vun't Fenster! Glöv man nich, dat de ut de Wirtschaft noch Opdrääg kriegen!“

„Aver vun wat kann he denn leven?“

„Du maakst di Gedanken üm de falschen Lüüd! Dat de Mehrwert- un Versekernstüer op negenteihn Perzent ropgeiht, argert di nich? Dor warrt sünnerlich lütte Lüüd afkassert!“

„Ne!“ Bertha is gegenan gahn. „Ik heff leest, dat Eten, also Levensmiddel, nich düerer warrt. Blot Nonfood. Un dat köönt sik de Armen al so nich köpen. Woto bruken se denn ene Versekern?“

Mit Bertha över Politik oder Wirtschaft to strieden hett al so keen Sinn! ‚Nonfood’ hett se opsnappt ut de Bildzeitung un denkt as de annern Leser, dat mutt wat Kostbares sien!

„Aver dien Rudi Assauer kann sik bald sien Luxusauto un de düren Zigarren ok nich mehr verlöven. Villicht kriggt he nu en Anbott vun'n Gesundheitsministerium. De planen ene Smöker-Opklaren in Tietschriften un Anslagsülen. Ik kann mi dat goot vörstellen:

En Exklusivfoto vun Rudi in'e Mitt vun'n Text ahn Zigarr, aver mit apenen Mund. Un as Spreekblaas — ‘Rauchen kann tödlich sein!’“

(Wat denn — de junge Rudi A. kunn Platt?!)

Bet avends weer Bertha bannig füünsch. Denn weern wi gemeen dalslaan. Womit hett Düütschland dat verdent? Skandinavien lett de Pünkten in ehr Länner. Jüst so de Oostblock, dat Baltikum un Ex-Jugoslawien. De olen Seilschaften leven. Un dormit Hallelujah Monster! Dat weer de Deeppunkt in'n 51. Johr!

Bertha un ik harrn desülve Menen: ‚Texas Lightning’ naakelt op de Bühn! – Dat harr mehr Pünkten geven. Oder ‚Dittsche’ alleen mit Baadmantel un Latschen. He harr den Grandprix wunnen!