Kuddel un Bertha sünd...

Rolling home!

Kuddel

Leev Leser,

wenn se uns vermisst hebbt, wi, Bertha und Kuddel, sünd wedder dor!
Wi weern dree Johrn in Bulgarien an'n Swarten Meer. Uns Wahnungsmeed is ümmer düerer worrn, so dat wi uns vun de Rent ümmer weniger leisten kunnen. Wi harrn hört, dat man dor mit ene lütte Rent goot leven kann. Syrer, Afghanen un Nordafrikaner wüllen se nich hebben — aver düütsche Rentner!

In dat lütte Huus mit lütten Goorn in en Dörp bi Warna weer dat blots in'n Sommer schöön. Dor geev dat Touristen, de düütsch oder engelsch snacken dään. De Dörpbewahners snacken totaal unverständlich, as de Bajuwaren. För Bertha weer dat kyrillisch!

Dat Schicksal weer goot to uns: Kuddel siene sössunnegentig Johr oll Moder is in Oktober doodbleven, freedlich un ahn Pien. Wi kunnen no Hamborg torüchgahn un in de arvte Egendoomswahnung intrecken!


Bertha un Kuddel seggt, frie na Fru un Herr Swienegel:
Wi sünd al wedder dor!

Ofschoonst wi an't Swatte Meer enen Feernseher harrn un ok sünst nich ganz vun de Welt afsneden weern, sünd wi baff, dat Angela Merkel jümmers noch Kanzlerin is. Bertha harr ja hööpt, dat dat Martin Schulz worrn weer. Ganz benaut sä se to mi:

"De Intellektuellen hebbt em beet maakt! So ungerecht! Een Daagblatt hett schreven: 'Kann ein Mann ohne Abitur Kanzler werden?' Dormit hebbt se em to enen Minsch drütter Klass maakt!"

Verdattert fraag ik: "Woso gliek drütte?"

"Na, Minschen twete Wahl sünd wi doch as negentig Perzent annere, de in de gesettliche Krankenversekern sünd!"


Feudalherrschap in't Middelöller. Ganz nerrn sünd de ohn Abitur.
Wieder baven sünd de Privatversekerten. De Regeern ganz baven is dör Gottsgnadentum beropen
un kann nich afsett warrn. — Hm, kümmt Se dat ok irgendwie bekannt vör...?

Bertha is ümmer noch goot in Analyse! — Se meent ok, de SPD kann sik nich mit de Union enigen un dat warrt to Neewahlen kamen. Silvester gung se mit in en Demonstration un harr en Plakat inne Hand mit: 'Merkel muss weg!'

De Anspraak to Niejohr weer ok nich gediegen: "Die Welt wartet nicht auf uns", sä Madame Merkel sülvst. — Nee, aver op ene seker Regeren!


Seker is jümmer bloots: Dat Geld regeert de Welt!
Düsse Pyramide kümmt mi noch veel bekannter vör!
Klick op to'n Vergröttern!


Martin Ripp
8.1.2018


na baven