Maat Jan hett sooo'n Schädel:

Freedhoffsruhe

Ween oder nich ween, dat is hier jümmers noch de Frog. Und de is narms aktueller as bi use Jungs vun de Bundswehr bi ehren Insatz in Afghanistan. Also schlag nor bi Shakespeare, hebt se sick dacht, und wullen de Inborenen mol eene geballte Ladung vun use grode westliche Kultur verpassen: Hamlet an'n Hindukusch! In de Presse weern jüs disse Dog de Fotos, wa use Jungs de Szene mit den Dodengräber pröövt harn. Heel naturalistisch!
Ober denn hebt een poor Lüüd meent, dat wär eene "Störung der Totenruhe". Dorbi is, nor dütschen Recht, gor nix passert. De Doden hebt se nämlich nich vun een ordentlichen Freedhoff nohmen, sonnern de wern eenfach so in de Eer verscharrt ween. Dormit wern se juristisch sowat as 2. Klasse-Lieken, und mit de eere Schädel draf jedeen Fotball speelen oder swatten Afghanen dorut smöken, as he Lust hett. Hamlet, op de anner siet, het sien Schädel ut en Graff und is dorum en Liekenschänner und is fors vun use Jungs unschädlich to moken. Veelicht weer Yorick jo ok een Moslem, und denn draf dat heele Stück sowieso nich mehr upföhrt warrn. De Rest is Swiegen.

Swiegen schallen wi ok öber de Jungs vun de wackere israelische Fleegerstaffel, de nu op een Mol dütsche Kriegsscheep (tschuldigung: Freedenssekerungsscheep! Kriegsscheep hebbt wi ja gor nich!) vör eere Küste sehn und sick twischen twee Insätze gegen irgendeen palästinensisch Dörp kort erinnert hebbt, wer egentlich eere Feinde weern.

Und swiegen schallen wi wohl ok öber een gewissen Heinz N. ut NRW, de as dütsche Soldat in't Butenland (nämli in Italien) vör 60 Johr 10 Minschen ohne jichenseenen Grund uphangen hett und dorför disse Dag in Italien as Mörder verurdeelt worn is. Ober Heinz N. levt in Dütschland, wo dat keen Urdeel un keen Verfahren gegen em givt und keeneen doran denkt, em nor Italien uttolevern. Italien — as use olde Partner in de eenzig wohre "Achse des Bösen" — denkt nich doran, de Utleverung to beandrogen. Und so blivt dat heele Urdeel bloß "een symbolischen Akt", as sin Anwalt dat nöömt.

Un noch een fienet Symbol, dit Mol ut Holland: De Eenheit vun de holländische Armee, de dormols bi dat Massaker vun Srebrenica tokeken hett, ohne wat to don, ward nu vun den nederländischen Staat geehrt! Up eene Ehrentafel (!) in eere Kaserne steiht, dat se mit eeren "Geist und Geweeten" gegen dat Gemetzel vör eere Ogen west weern. Jawoll, de Geist weer willig, man dat Flesch schert sick en Dreck! Dorut lernt gewiss ok use Jungs, woans "Freeden sekern" geiht und wat in Wohrheet vun se erwartet wart. De Rest, as wi al weet, is Swiegen. Und verswiegen.

Denn man gode Nacht, seggt

Maat Jan