Maat Jan ut BremenMaat Jan:

Ik harr enen Droom


"Leeve Frünn, hüüt, an'n 1.3.2016, fiert wi to'n föfften Mol den Dag vun de dütsche Freeheet. Dat is en Anlass, trügtoblicken op dissen März 2011 un up dat, wat wi hüt den "Opstand vun de Anständigen" nömen doot. An 1.3.2011 weer dat so wiet, as dat ole Regime sin Maske dolfallen loten hett un nor en lange Hetzjagd den eenzigen Fründ, den dat Volk noch harr, afsetten wull.

Dorvör wern al veele oppert worn, wiel se to populär weern un utspreken dään, wat de Lüüd dachen. Man dit Mol wern de dor boven to wiet gohn, as se utrekent Karl-Theodor to Guttenberg vunwegen irgendeen Tüünkrom ut sin Amt drängt harn. Fors harn sick överall in't Land sine Ünnerstütters tosomenfunnen, dat har spontane Demos för us oprechten Eddelmann geven, un as jümmers har een Blatt dat op een Nenner bröcht, wat al Lüüd dacht hebbt: "Dat langt!!!" So har dat grot op de Titelsiet vun Dütschlands gröttste Zeitung stohn. Dat Wort is fix to en Upschree worn, to en Parole för en wassende Bewegung, de sick denn tosomensloten hett to de B.I.L.D., de BürgerInitiativeLeeverDütsch. Ehre Parolen as Dat langt un Yes we can — ok anners!! weern över Nacht överall op T-Shirts, Stickers, Wannen un Transparente to sehn.

Ohn lange Schnackeree is de afsette Baron to'n Overbefehlshebber utropen worn, een Division nor de anner is to em överlopen. De Bundswehr, so harn de Generäle verklart, scheet nich op eer eegen Volk.


De Bundsaadler woor to en Bundspageluun ümwesselt! Bild: D. von Horn/J.P. Bey

Jüs as al eenmol, veele Johr her, versammelt sick de Kern vun de Bewegung vör dat Springer-Hochhus in Berlin. Veele kregen nostalgische Geföhle, Rainer Langhans leet ut'n Dschungelcamp gröten: "In min Hart bün ick bi jo!" Man dit Mol geiht dat tohop gegen en gemeensomen Fiend, as de fix wassende Toog upbrekt nor'n Regeerungsviertel, dat in Storm innohmen wor. Angela Merkel har dor ehr gröttst Talent brukt: Se kunn unvermodens in de Menge ünnertauchen.

Wolfgang Schäuble, de ole Haudegen, har mit stille Begeisterung dissen hilligen Volkszorn wassen sehn. He övergift den Bendlerblock kampflos un föhr nor hus, wobi he liesen en Militärmarsch vör sick hen summt.

Ulla v. d. Leyen wor begnadigt un leevt vun dor an up en Riederhoff bi Hannover, wo se sick up ehr Kernkompetenz konzentreert: dat Gebären.

De Rest vun de ole Regeerung is, as veele Verbrekers vörher al, op en Schipp nor Austrolien brocht worn, wo se in een vun Sonja Zietlow mit ehr maliziös Lächeln föhrten Camp gründlich ümertogen wern.

De neede Regeerung har de besten Köpp ut'n Volk tohopbröcht. Ünner de Öllerspräsidentschop vun Friede Springer (dorher de dütsche Grot: "Friede wees mit di!") regeert Volkstribun to Guttenberg mit sin wetgelige Eleganz un kruppstohlharte Kompetenz över allens. Em anne Siet staht as Minister för:


Leistungsminister Wuffgang Clement
  • Bildung un Weetenschap: Günther Jauch
  • Wohrheet un Volksbelustigung:
    Kai Diekmann
  • Dütschdom un genetische Intelligenz:
    Thilo Sarrazzin
  • Jugend, Kultur un Migrantinnen:
    Dieter Bohlen
  • Geld un Moral: Horst Köhler
  • Arbeit, Leistung un Almosen:
    Wolfgang Clement
  • Froonslüüd un Familie: Mario Barth
  • Islam un annere Spökenkiekereen:
    Alice Schwarzer
  • Dütschland un de Rest: Ulrich Wickert
  • Religöse Frogen un Bottschafter bi'n Vatikan: Peter Hahne

As dat wiethen sichtbore Symbol vun de Rückbesinnung op ole Werte wor in Berlin en gewaltig Helmut-Kohl-Mausoleum but. En pfälzischen Rentner hett protesteert: "Ick bün doch noch gor nicht dot!", man dat hett kieneen interesseert. Vun dit stolte Buwerk ut sprek ick nu to ji hier in'n Sool un buten an ehr Empfängers vun Radio Teutonia Libertare, en ehemoligen Privatsender, de jüs so as de Dütsche Bank (nomen est omen) in Volksegendom övergohn is. So is ok de giftige Influss vun utländische Lögen överwunden, sietdat dat so nöömte "Internet" dör de Aktion "Intern nett" gegen en rein düütsches Nettwark utwesselt worn is, wo een bloß noch de gratis utdeelten Volksklapprekner för brukt.


Düt is en richtige Fuffziger, ok wenn falsche Fuffzigers regeert!

Nich toletzt verdankt wi de neede Regeerung ok use gode ole D-Mark trüch. Wenn ok dat Utland mit us kien Geschäfte mehr moken will, denn bloß ut Neid up use harte..."

Jüs as ick mit mine Reed so wiet weer, hör ick den Kaptain ropen. "Jan, wo bliffst du, Marsch an Deck mit di!" — un ick bün opwacht. So gau as ick kunn bün ick ut mine Koje jumpt, un sogor as ick al boven op Deck stunn, har ick bloß eens dacht: Man got, dat dat bloß en Droom west is!

Ehr opweckte

Maat Jan


8.2.2011
mehr vun Maat Jan
Foto Clement: Bundesministerium für Wirtschaft und Arbeit/Wikimedia Commons


na baven