Maat Jan: De tweete Fröhling Dat Fröhjohr kummt un mit Macht wart överall uprümt,
sick rutputzt un klor Schipp mokt. Dorbi is dat jo al de tweete Fröhling,
dit Johr hett jo heel warm anfungen, ehrdat dat nochmol kolt worn
is. Ober irgendwie hebbt sick de Lüüd dor en Bispeel bi
dat Weder nohmen: Överall gifft dat olde Promis un Politiker,
de ehrn egenen tweeten Fröhling beleevt.
Ok Hartmut Mehdorn lett sick nich verdrieven. De grode Sanierer, de al de Bahn kaputtspoort het, is nu Chef vun Air Berlin woorn. Dorbi is de Firma ok ohn em al so good as pleite gohn. Worum also nich glieks noch annere Altlasten dor entsorgen: Josef Ackermann verköfft de Tickets, Jürgen Schrempp vun Daimler draf den Shuttle-Bus föhrn un Horst Köhler verklort de Seekerheitsvörkehrungen an Bord. Dat wart vörwiss de spannendste Reed, de he in sin Leven holen hett. De Monsieur Trichet ut de EZB schall jo nu bi'n Roomfohrtkonzern EADS anfangen. Merkel wart sick freien, se wull em jo al lang op'n Mond scheten.
Otto Rehagel is ok tröch in de Bundesliga. Un ick har jümmers meent, wenn sogor de Griechen di al nich mehr betohlen wullen, denn geiht dat richtig to Enn mit di. De Düütsche Bank hett ut de Finanzkrise bannig wat lehrt: Toerst hett se en Risikovörstand utsöcht, de glieks vun de Bankopsicht wegen "fehlender Qualifikation" aflehnt worn is, un nu verhelpt se en Ex-Spion to sin tweeten Fröhling mit en Job as Risikoberoter: Horst Uhrlau ut'n BND. Wat de blangen sine CD-Sammlung (mit veele Nomen vun Stüürsünder, düür köfft vun BND) för Qualifikationen as Bankberoter hett, is mi nich so heel klor. Man Risiken erkennen, dat kunn he ok dor, wo gor keen sünd. Dorum hett he ok den Düütschen Murat Kurnaz lever in Guantanamo schmoren loten, as em, de nix don har, free to loten. Op jeden Fall is Uhrlau nu de Agent mit de Lizenz för Kröten. Man good, dat de Toverdienstgrenze för Rentner jüst rup sett worn is, anners har Uhrlau in sin needen Job nich mehr Kröten verdeent as en Minijobber. Un dat is wohl ok de Wert, den Risikomanagement bi de Dütsche Bank hett. Mag jo ween, dat de Schwizer Uhrlau as annere Stüür-CD-Köper noch vör Gericht bringt un he denn in Knast landt staats in de Chefetage. Man över dat Risiko hett he sin neede Brötchengever wohl nich so genau beroten. Bi de FDP hett Christian Lindner jüs so'n beten wat vun en tweeten Fröhling. He is jo bi den kolden Wind, de sin Partei disse Dog in't Gesicht weiht, fix inknickt, ober nu drievt he wedder need ut as Spitzenkandidat in NRW. Mehr as en Muurblömchen mach dat wohl nich warrn. Ick bün al neeschierig, wat för Lüüd noch ehrn tweeten Fröhling fiern: Moderiert Christian Wulff op End "Wetten dass"? Saalwette: "Wetten, dat se dat nich schafft, vun mi bit to'n End vun disse Sendung een ehrliche Anter to kriegen?" För Wolfgang Schäuble gifft dat ok al de passende Show: "Rette de Million". Oder rafft sick Helmut Schmidt nochmol op un kandideert doch as Kanzler? Spiegel-Titel: "Ick kunn dat beter!" Ungefähr sin veerten Fröhling beleevt disse Daag Oskar Lafontaine. Nordem he sick de schmucke un nich mol dartig Johr jüngere Sarah angelt het, is in Saarland vör Schreck de heele Regeerung uteenanner fullen. Nu wart al spekuleert, ob Oskar noch mol as Parteichef nor Berlin geiht un vör all, wo lang he dit Mol dorblifft. Bloß bi sin Saarländer SPD-Kollegen Heiko Maas hebbt sick
keen Fröhlinggeföhle instellt. De SPD dämmert lever
in en langen Harvst un tövt up, dat Mutti se wedder leev het. Ehr Maat Jan |