 |
|
Klor to'n Kentern Nu geiht dat rund! De dütschen Reeder wüllt ehr Scheep nu sülbs gegen Piraten verdeffendeern, mit bewaffnete "Sekerheetskräfte" an Bord. Dat heet, för mi as olen Fohrensmann gift dat nu heel neede Upgoben. Wohrschienlich möt ick eers mol uppassen, dat von de needen Uppassers kineen öber Bord geiht. Un denn möt ick em verkloren, dat de Schlepper, de us entgegenkummt, us bloß in'n Hafen holen will un se bittschön nich op den Lotsen scheeten. Wo de needen Waffen wohl unnerbracht warrn schallt? Ick meen, in de 99% vun de Tied, wo us kien Piraten angreept. Wenn ick bi'n Inslopen weet, dat unner mine Kajüte 2000 Schuss scharpe Munition un vellicht noch'n poor Handgranaten un so Tüch liggt — dor föhl ick mi doch glieks veel sekerer un kann heel ruhig slopen.
Immerhin hebbt de Piraten dit Johr al 212 Scheep överfallen. Dat is düdlich weniger as de letzten Johr, man jümmers noch to veel, meent use Reeder. Use Handelsflotte ward jo uk jümmers lütscher. Dat heet, tominnst de Scheep, de unner düütsche Flagge fohrt, düütsche Löhne betohlt un nor Düütschland Stüern tohlt, de warrt jümmers weniger. Man de "Utflaggten", de unner de Flagge vun irgendeen Billiglohnland fohrt, man dütsche Reeder tohöört, de nehmt jümmers to, nu al över dreedusendeenhunnert. So sehn sünd use Reeder de slimmsten Piraten vun all: Se hebbt de düütsche Hannelsflotte al mehr verkleenert, as Piraten dat je kunnen.
Man dor geiht wohl kin Weg vorbi, dat use Handelsscheep in Tokunft bewaffnet fohrn möt. Up de Bundswehr is jo kin Verlot, de kriegt jo — anners as de Piraten — kine jungen Lüüd mehr. De Nachwuchssorgen bi de Bundswehr sünd al so grot, dat se sogor ene Zeitsoldatin ehre künstliche Befruchtung betohlt — bloß dormit wedder en Jungsoldat norwasst.
Un denn gifft dat jo noch de dütschen Piraten. De sünd jümmers "klor to'n Ändern", man dat is ok dat eenzige, wat bi de Partei klor is. Af un to sünd se mol so'n beeten för Atomkraft, denn wedder nich, denn reformeert se dat Urheverrecht, man ok bloß so'n beeten, un disse Dog demonstreert se heel analog op eegene Fööt gegen de GEMA. Twischendör kummt se mit ehre eegene Finanzsoftware nich klor un ok de Mailserver is mol för en poor Daag utfollen. Dorför "kennt wi us in Punkto Cyberwar bestens ut", as ehre Ex-Geschäftsföhrersche Weisband seggt. Recht het se — wenn se mit "Cyberwar" de E-Mail-Strieteree twischen de Chefs un Ex-Chefs in ehre Partei meent. Internet-Pirateree schall jo ok achter de neede Stüer-CD stecken, de schienbor en düütschen Stüerfahnder hööchstpersöönlich tosomenstellt het. Dat meent jedenfalls de Schweiz, de dissen Stüerfahnder jüst so för Gericht bringen wull, as de somalischen Piraten disse Daag in Hamborg för Gericht staht. Dorbi springt em ok use anners so liberole Justizministerin bi. De wull söke Stüer-CDs heel un deel verbeden. De Verbreeker sünd denn nich de, de Stüern nich betohlt, sunnern de, de dat opdeckt. De wohren Stüersünder kriegt se denn twors gor nich mehr to foten. Man Verbreekern gegenöver, de Geld hebbt, is se denn doch wedder bannig liberol.
Nich so liberol sünd de Liberolen, wenn dat um alternative Energie
geiht. Dor stellt sick doch eenfach jedeen so veele Windräder
un Solaranlagen up, as he meent! Un de erneerbore Energie wasst un
wasst!! So geiht dat nich, meent Rainer Brüderle, Energiewende
moi un god, man fien sünnig, dat use groden Stromkonzerne nich
den Ansluss verleeren. Dorum wull he nu en "Moratorium"
för erneerbore Energie. Dat klingt ersmol harmlos, man so is
dat mit Merkel ehren Atomutstieg ok losgohn — mit en Moratorium
för Kernkraftwerke. Op end ward se nu al afstellt. Moratorium
heet übrigens nor Duden "Upschub vun Schulden". Ick
wet jo nich, wat för Schulden Brüderle bi de Stromkonzerne
hett, man de veelen Afgase un Rückstände ut Atomkraft un
fossile Energie, de sünd ok eene Art vun Schulden — un wenn
de fällig warrt, denn gift dat kin "Moratorium", dat
schwant ok Maat Jan |
Maat
Jan:
