Maat Jan ut BremenMaat Jan süht...

Nix Needet ünner de Sünn


Över de Fierdog heb ick en olen Janmaat un Seemann wedder dropen, de veele Johr nich mehr in Düütschland ween is. "Na, Jan", het he frogt, "du kennst di doch jümmers so god ut in de grode Politik. Wat hett sick denn nu ännert?"
Dor bin ick in Verlegenheet komen. Wi hebbt jo nu en neede Regeerung. Ober wat heet hier need? Merkel, Schäuble, Steinmeier, Gabriel, de Maizière…. All de olen Gesichter, de min Kumpaan vun sin letzten Besöök in de Heimat kennt, sünd wedder dor. God, de FDP is nu rut ut'n Bundsdag — ober anners süht dat man meest so ut, as op sick gor nix ännert hett. Dat hebb ick min Maat denn ok vertellt. Toerst hett he luut lacht. Un denn hett he sick fix nor de nächsten Schipp erkunnigt, de in't Utland föhrt.

Wenn wi nu en Rente mit 63 kreegen, hett ne noch frogt, worum denn utrekent nich för Wolfgang Schäuble? Dor hebb ick em verklort, dat dat nich anners geiht, Schäuble is unentbehrlich, denn wenn een mol CDU-Vörsitzender ween is, denn kunns di seeker ween, he kennt sämtliche Stüürtricks ut'n Effeff.

Ick wär jo heel to geern dorbi ween bi de Koalitionsverhandlungen. As dat utsüht, hebbt se dor lustig "Reis nor Jerusalem" speelt bi de Ministerämter. Ulla von der Leyen weer jo toeerst as Gesundheetsministerin vörsehn. Man dat wull se nich, se hett jo Medizin studeert un weet, wat för en Sumpf in dat Ressort op eer luert. Wo komt wi ok hen, wenn Minister upmol wat vun ehrn Ressort verstahn schallt? Lever mokt se heel wat anneres, denn kunn een jümmers seggen, "vergeev ehr, denn se weet nich, wat se doot". Gegen de Gesundheitsmafia is jo dat Verteidigungsministerium en relativ freedliche Sook. V. d. Leyen is as Mudder vun de Kompanie ok al in Afghanistan ween, man anners as Guttenberg in Zivil. Se brukt ok keen Stohlhelm, dorför hett se ja eer Frisur.


De "Grote Koalitioon". (De lütte Mast achtern is de CSU.)


De Oppositioon in ehr Waterfohrtüüch

För us Binners toständig is wedder mol min ole Fründ Thomas de Maizière, alias Tommy, de Misere. Nich dat ick em persönlich kennen do, ick segg dat bloß, dormit he tominnst so'n beeten wat Minschlichet kriggt. Anners kunn dat op End rutkomen, dat he gor nich echt is. För mi is he en Vörstufe vun de Klonkrieger ut "Krieg der Sterne" oder en ole Roboter, Modell "preussisch Bürovörstaher". As he programmeert worn is, weer "künstliche Intelligenz" leider noch heel un deel unbekannt. Oder is he en flugunfähige Drohne? — Mit em as Binnenminister is dat wiss nich mehr lang, denn fleegt lütte Drohnen bi jede Demo över use Köpp. Klor sün de unbewaffnet. Eerstmol.


Un an't Stüür steiht... nüms!

Meest datsölbe gellt för dat Modell F.W. Steinmeier. As Minister för us Buters har ok he al toverlotig wiest, dat he över veer Johr ohn een eenzig eegen Idee utkomen kunn. So Lüüd hett Mutti gern. Dorum kunn ünner Merkel ok en Kassiererin mol fix Ümweltministerin warrn. För Energie schall Siegmar Gabriel sorgen. He hett jo ok vun al de Minister de gröttste Biomasse. Bit op Peter Altmaier. De hett dat heel hart dropen: he möt in't Kanzleramt. Dat is för em as en Fitness-Programm: 100 Mol an Dag Kneebögen vör de Kanzlersche. Man dat helpt nix, afnehmen möt he, wenn he Pofalla norfolgen wull. Anners blieft he in Merkel eern Dickdarm stecken.

Pofalla sölben passt dorför optimol to de Düütsche Bohn. Dor kunn he per Luutsprekerdörsaag de Verspätung vun ICE XY per sofort för erledigt verkloren. Ok sin fründliche, sachtmödige Aart, mit Parteifrünnen to schnacken, is en Vörbild för al Bohnschaffner: "Hol din Mul! Du vertells bloß Schiet! Ick kunn din Schiet nich mehr hörn." So klingt dat nu över de Bohnhöff. Also ok dor allns as jümmers.

So'n beeten wat Needet gifft dat tominnst ut Hessen. Dor regeert de brutalstmöögliche CDU-Landsverband vun Düütschland nu mit de Grönen tohoop. De Grönen kreegen dorför dat Wirtschapsministerium un dröfft nu den Frankfurter Flughafen sölben utbuun. Mit de is dat ok jümmers datsölbe: Jümmers sünd se so lang strikt dorgegen, bit se endlich een froogt. Un stoht denn fix Gewehr bi Foot as Mutti ehr lütte Helper. Jüst so hett dat de SPD-Basis bi ehre Mitgliederbefrogung jo ok mokt. Un knapp steiht de neede Regeerung, hebbt se sick al gegensietig inne Plünn. Disse grode Koalition is eben so grod, dat se togliek ehr eegene Opposition is. Dor kunn Gysi noch so stolt rümstakeln un sick "Oppositionsführer" nömen. Ober ok he hett de gröttste Opposition in sin egen Partei. De hett to de Europawohl jüst wedder mol faststellt, dat Europa bloß en groden Bulten undemokratische Militaristen un neoliberale Kapitalisten is. So en slechten Ümgang hett de Linke wohrlich nich verdeent. Dorum wüllt wi ok nich so ween — un se lever gor nich eerst nor Europa wählen.

Tominnst nich

Joon Maat Jan


Nix as rut op See!


Bild v. Klaeden: Bischöfliche Pressestelle Hildesheim (bph)


na baven