 |
 Maat
Jan kennt sik ut mit...
Vertroon un Navigation Dat hett jo mol heel fix gohn. Kum is de GroKo in't Amt, is de eerste Minister al wedder rut. Un jüs een, den wi sowieso al meist vergeten harn — wär he nich trüchtreden (woorn).
Man jümmers na de Reeg: Hans Peter Friedrich weer as neede Landwirtschaftsminister tostännig för jede Aart vun Swienkraam. Sodraad he nu vun de erste Swieneree höört har, har he dat fix Siegmar Gabriel vertellt, wiel dat eenen vun sine Genossen bedrepen dä. Ehrdat de Medien de needste Sau dör't Dorp drieven kunnen. Un op Mol is Friedrich sölbs de Sau, un Seehofer bloost Halali — un nich veel loter "Sau dood". Dat kunn een woll en Buernopper nömen. Trurig doröver is komischerwies bloß de SPD. Man dat kunn ick verstohn: Enen Gegner as Friedrich kunn een sick bloß wünschen. Un so en Kanzlersche as Merkel kunn sick use Autoindustrie ok bloß wünschen. Nu hett se dat schafft, dat de neede EU-Afgasnorm bloß noch so'n Papiertiger worn is, den sick de Herrn Zetsche un Winterkorn vör't Bett leggen kunnen. Dorför hett se dat egentlich verdeent, dat de Autobuer se as Navi-Stimme verewigen. En Spritztour mit dat Angela-Merkel-Navi, dat höört sick denn ungefähr so an:
Denn kummt bloß noch en grode Knall un achterher en Endlossleep:
En poor Frünnen brukt eben ok Merkel, nu wo eer true Dackel Pofalla stiften gohn is. För de free Wirtschap hett dat bi em nich langt, man jüst noch för de Bahn. Un ok dat hett wedder veel Kritik geven, vun wegen Korruption un so. Ick heb jo al vör Johrn vörslagen, CDU, CSU, BDA und BDI to vereenigen unner eenen Nomen: CEBID! Diäten un Parteispenden wärn kien Thema mehr. Bloß dat Woort "Demokraten" stöört vellicht noch. Man nu hebbt wi de Grode Koalition, also möt wi dor noch de SPD rin integreeren. Wi nehmt also dat B vun Bund, dat E vun Eenheet, dat S ut de CSU, dat C ok, dat H för de Hochfinanz mutt ok jümmers dorbi ween, dat I vun Industrie, S för Sozialpartner un noch dat S vun de SPD un foorts hebbt wi: B E S C H I S S! Man tominnst hebbt wi en poor Ministerinnen mehr. Ick meen, dat Andrea Nahles de vun Hartz IV produzeerte Armut nu sölbs verwalten schall, ist jo bloß gerecht. Dorum Ministerin för Arbeit un Sozialet. Man weekeen schall ehr verkloren, was "Arbeit" heet? Se kennt jo bloß Uni un Partei! — Over de steilste Karriere hett Barbara Hendricks mokt: vun de Kassiererin to de Ümweltministersche. Se kümmert sick eben geern üm de Kröten! Un wi bruukt noch mehr Fruens in Führungspositionen! De wiest noch richtig Insatz. So as de arme Fro vun de Commerzbank, de jümmers alleen dör de Stadt joggen mutt. Nu föhrt se sogor U-Bahn. Ik bidd Se: En Banker in de U-Bahn, dat is doch kiene artgerechte Haltung!! Dor mutt Barbara Hendricks mal aktiv warrn.
Sünd jo ok nich all Bankers korrupt. Bloß en poor swatte Schop. Skandalbänker as de Michael Kemmer, Ex-Vörstand vun de Bayrische Landsbank, de de bankrotte "Hypo Alpe Adria" köfft un siene Bank dormit praktisch in'n Ruin dreven hett. Heel anners dorgegen de seriöse Bundsverband vun de düütsche Bankwirtschap mit sien seriösen neen Hauptgeschäftsföhrer: Michael Kemmer!!! Jüst de, de Milliarden Stüergeller verjuxt het, de mit Jörg Haider un irgendwelche Balkan-Gangster kungelt hett un en Prozess wegen Untreue an'n Hals hett — Super!, seggt de Bänker, jüst de schall use Geschäfte führen. Bi de Düütsche Bank is dat jo al Tradition, dat de Chef enen Skandal produzeert un mal vör Gericht landt. Dat is dor praktisch de Grundqualifikation. Hilmar Kopper, Ackermann, Breuer, Fitschen. In anner Wöör: Geldrutsmieten, grodkotzig uptreten, Kirch ruinieren. Wenn dat de Vörutsetten sünd, denn is ok klor, wokeen de nächste Chef vun de Düütsche Bank ward: Bischop Tebartz van Elst! De fusioniert denn de Düütsche Bank mit de Vatikanbank un lett an de Frankfurter Börs en Klingelbüdel rümgohn. Wenn dat keen Vertroon schafft, weet ick ok nich wieter, meent Joon Maat Jan
Bild Friedrichs: Henning
Schacht/Wikimedia Commons
Bild Kemmer: Bundesverband deutscher Banken/Wikimedia Commons Bild Bischopshoot: Dr. Meierhofer/Wikimedia Commons |
