Maat Jan

En Seebär in Brass

Ick heb al lang nix mehr schrieven, man wat ick disse Daag hör, lett mi kien annere Möglichkeit, as mi to melden un to protesteeren. Dat is nu alternativlos.
De Grund dorför is ene Meldung, de ick disse Daag hebb lesen müsst: "Sexuelle Gewalt: Seebär vergreift sich an Königspinguin".

Wer dat nich glöven will, hier is de Link.

Dat kunn ick as olen "Seebär" nich op mi sitten loten. Oder beter: ünner mi. De Seebär is jo hier de Öber- un de Pinguin de Ünner-legene. Link is de Sok so oder so, denn so en Pinguin is jo veel to lütt, sick gegen en Seebären to wehren.

Sex mit Seebärn? Kümmt nich in Fraag!

Wat weer de Welt fröher doch noch beter: In mine Kindheit weern Seebärn un Pinguine de besten Fründ. Dat heb ick al heel fröh lernt, un twoors ut de Petzi-Böker. To Petzi sin Frünnen harrn Seebär un Pingo höört. Un de een harr de annern nienich freten un ok nich ... nix! Nix har Seebär doon, man bloß jümmers sine oln Geschichten ut de Seefohrt vertellt, ob een dat harr hörn wulln oder nich. So en Snacker weer he, nich so een stillen Denker as ick. Un freeten harn de Tiere sick bi Petzi ok nich. Dat eenzige, wat dor freten wor, weern Mudder Petz ehr Pannkoken.

Over nu herrscht Panik bi de Pinguine. Sogor vör Königspinguine, also de ut de höchsten Krinken, schreckt de Kerl nich trüch. Dat is noch nich mol klor, ob dat een Serientäter is oder mehr as een. Wohrschienlich, meent de Forschers, is dat so as bi de Minschen ok: An gefährlichsten sünd jümmers junge, frustreerte Keerls, de nich noog to freeten, nix to don un ok kiene Fro hebbt. Anschienend klappt dat mit Froons bi disse Seebärn ok nich so goot: De Sex duert twee bit veer Minuten, un dortwischen mutt de Seebär sik öfter mol verpuusten. Un ick harr dacht, dat licht an't Öller...

Düsse Pinguine leevt in Homo-Ehe tosamen un wüllt ok keen Sex mit Seebärn

Pinguine dorgegen sünd no den Artikel gendermäßig heel modern: Homoehe mit Adoptionsrecht, dat gifft dat sogor bi de Minschen nich överall. Dorbi süht en Pinguin för mi jümmers ut as en katholsche Nonne in Lütt. De leevt jo ok mit Minschen vun ehr egen Geslecht tohoop. Un to Wiehnacht singt se gern vun en "Kindlein". Bloß to sehn kriegt een dat nich.

Up jeden Fall mutt ick mi scharp vun so ene Swineree bi annere Seebären distanzeern. Dor heb ick nix mit to doon. Useen is ja doch en ziviliseerten Minschen!

Bi de Fische is momentan ok bannig wat los bi de Zeugungsmethoden: In de letzten Johr hebbt de Minschen överall up de Welt mehr un mehr Sushi eten. Un wiel de Lüüd so scharp sünd op kolen rohen Fisch, sünd de Bestände an blauen Thunfisch bannig trüchgohn. Dorüm schall de Thunfisch in Tokunft vun Makrelen kamen. De kriegt dat Arvgood vun de Thunfische in ehren Laich sprütt, un op End kaamt dor lütte Thunfische rut. För de Makrelenmama mutt dat en heel wunnerlichen Anblick ween, dat ehr Norwuchs gor nich so utsüht as se. Un för den Papa eersmol ...

Wenn Darwin dat noch beleevt har! Woför de Evolution Jahrhunnerte un sogor Gott fiev Doog brukt, mokt wi Minschen mit en korte Injektion. De Methode is noch nich mol need, dat hebt Forscher al vörher mit Lachse mokt. De Lachse hebbt denn Forellen un sogor Kugelfische up de Welt bröcht.

Dat is nu nich jüst datsülbe as dat, wat de swienische Seebär mit de Pinguine mokt. Man frogt woorn de Fische ok nich, ob se gern Forellen oder Thunfisch kriegen wulln. Dat is also en Vergewaltigung ohn Sex. Un de is denn wohl wedder verlöövt. Villicht weer dat ok en Lösung för de armen Nonnen, dormit se endlich mol en "Kindlein" kriegen köönt.

De Seebär smacht na en Pinguin!

Bi us Minschen wart dorgegen allns dorför daan, dat Froons nich to de verkehrte Tied Kinner kriegt. Moderne Arbeitgever so as Facebook un Apple lot dorför sogor de Eizellen vun ehre jungen Mitarbeiterschen infreern. Man wenneer is de verkehrte Tied? Eegentlich jümmers: Eers dat Studium, denn de eerste unsekere Arbeit, denn warrt Karriere mokt, un schwupps is Fro över 50 un hett en 15-Stünnen-Dag, an Kinner is gor nich mehr to denken. Man keen Bang, de mehrsten Froons kaamt gor nich so wiet, dor sorgt ehr männliche Chefs al för. Denn kunn Fro, wenn se ehre besten Johr ümsünst för de Firma geven hett, sick mit 50 noch ehre jungfrolichen Eizellen insetten loten un flietig Kinner kriegen, de den Ümsatz vun Facebook un Apple sekerstellt.

Social? Is ja to'n Kreihn!

"Social freezing" heet de Methode. Is jo disse Daag allns "social", so as de Websieden, wo een de heele Welt sin Privatleven vertelln un anner Lüüd beleidigen un in Dutt moken (needdütsch "mobben") kunn, "social Networks" heet. Sozial heet jo eegentlich, wat för de Gesellschap vun Minschen doon. Man dormit hett dat moderne "social" nich veel to doon, sozial is dor nix an.

Fehlt bloß noch, dat de Sozialämter ok in "social networks" ümwannelt warrt. Denn dor mutt een jo ok sin heel Persönlichkeit open leggen — jüst as bi Facebook. Ob een up End Geld vun'n Staat kriggt un wo veel, dat kunnen de "User" denn in en Online-Forum besnacken un besluten. Dat gifft för de "User" heel neede Möglichkeiten, anner Lüüd to "mobben". Dat Woort "mob" kummt blangenbi ut dat Inglische un meent kien Wischmop, sünnern de Mafia. Man de is disse Dag seker ok al en "social network",

glövt

Maat Jan