Maat Jan is för de

Inwander-Maut

Good Ding bruukt sien Tied. Anner Ding ok. Dat sücht wi jüst wedder bi de PKW-Maut. De schall nu doch komen. Dorbi hett Günner Öttinger, us EU-Digitalkommissar, jüst noch seggt, dat "de nich kummt". Over wenn Öttinger wat seggt, kunn een jümmers ruhig vun dat Gegendeel utgohn.

De frohe Bott vun de Nu-doch-Maut hett us Verkehrsminister Dobrindt jüst pünktlich to'n CSU-Parteidag kregen. He is tovör extra in Brüssel ween to'n Verhanneln. De tostännige EU-Kommissarin heet blangenbi Violeta Bulc, is "utgebildete Schamanin" un frogt bi wichtige Entscheiden opleevst ehr Pendel. De Fro is in Europa för Verkehr toständig. Dor kreegt de Utdruck "Pendelverkehr" en heel neede Bedüden! Kien Wunner, dat Alexander Dobrindt mit ehr up Ogenhööcht verhandeln kunn.

All Footgängers sünd suspekt — naja, villicht all bit op Johnnie Walker...

Mennicheen meent woll, Dobrindts PKW-Maut diskrimineert Utlänners. Over in de CSU heet dat "Wieso diskrimineert? Wi behannelt doch all Utlänners gliek." Over tööv man: De Maut is bloß de Anfang. Bi LKW geiht dat los, nu kummt de PKW an'e Reeg, op End kummt denn noch en Utländer-Maut för Footgängers. Wekeen düütsche Wege afnütt, de mutt betohlen. Dat heet jo nich ümsünst "Börgersteeg". Un de Börgersteeg is even nich ümsünst!

Footgängers sünd för de CSU sowieso suspekt. Sünnerlich, wenn de bi us inwannert. De CSU-Generalsekret Scheuer meent, wi bruukt keen Willkamens-, sünnern en Afscheeds-Kultur. Denn warrt jede Afscheebung en Event. Live in't Kiekschapp: "Goodbye Düütschland! De Wedder-Utwannerer." Un de besorgten Bürger sünd nich mehr besorgt, sünnern freit sick, stoht an de Stroot, winkt un roopt jüm nor: "Thank you for travelling!"

Schippsbegrötensanlaag "Willkommhöft" bi Wedel: Warrt se in "Schippsverafschedensanlaag Tschüßhöft" ümnöömt? Speelt se för de Scheep denn noch "Muss i denn zum Städtele hinaus..."?

Un doch kaamt jümmers noch Lüüd to us. Worum eegentlich? Ick hebb mol us Politikers frogt. Fro Bundskanzlerin, wat meent se?
"Wiel wi de erfolgriekste Bundsregeern hebbt siet de letzte Bundsdagswahl."
Wenn Se meent. Herr Stoiber, wat seggt Se, worüm kaamt de Lüüd?
"Wiel se vun den Münchner Hauptbohnhoff in bloß 10 Minuten mit de Bohn, während se in Paris noch, in'n Hauptbohnhoff, ick meen vun'n Hauptbohnhoff, un dat in bloß 10 Minuten, mit Ehr Gepäck, wieldess se in Paris sick noch Ehre Schoh tobinden."
Aha! Herr Gabriel, wat meent Se?
"Ick finn Ehr Fraag heel merkwördig, Fro Slomka."
Woso Slomka? Jan heet ick! Fro Roth, wat seggt de Grönen to de Flüchtlingskrise?
"Dat heet nich Flüchtlingskrise. Dat sünd heel arme Minschen, de to us kaamt. Dor dröff een nich vun "Krise" schnacken. Dor sünd Kinners dorbi. Keeneen is asozial. Illegal. Ok egal: Mi mokt dat jedenfalls allns heel bedropen."
Jo, Fro Roth. Is jo goot. Nich in dat Tischdook hulen. Herr de Maizière, wat seggt Se as Binnenminister?
"Ick weet dat twoors, over Delen vun mien Antwoort kunnen de Bevölkerung verunseekern."

Dorför brukt he eegentlich nich mol wat to seggen. Op end weet ick jümmers noch nix mehr. Wenn dat nor de CSU geiht, schalln bloß noch Lüüd mit en "christlichen Achtergrund" to us komen. Dat köönt se hebben: Dat givt noch Flüchtlinge ut Ruanda, Uganda, Burundi, Kongo... Allns "wunnerbore Neger" ut christliche Länner, de vör Verfolgung und Krieg flücht. Wenn de nu all nor München kamen schalln — so swatt is Bayern noch nienich ween!

Afscheebung gift dat jo al lang, man dat geiht de CSU allns to langsom. Dorbi is langsom jümmers relativ. De Sudetendütschen to'n Bispeel hebbt dit Johr besloten, de Grenzen, as se sünd, antoerkennen un keen Gebietsansprüch mehr to stellen. 70 Johr hebbt se dorför brukt. Dat is langsom.

De Verdrevenensnick

Wo wi jüs bi Verdrevene sünd: Erika Steinbach, bi de CDU tostännig för dat, wat de ünner Minschenrechte verstoht, hett fordert, Muslime, de in de CDU intreden wüllt, schallt de Scharia aflehnen. Muslime, de in de CDU wüllt? In de christlich-demokratische Union?

Dor hett Steinbach wiss Recht. Muslime, de in de CDU wüllt, schallt de Scharia aflehnen. Un Huren, de in'n Vatikan arbeit, schallt Kondome aflehnen.

Dorför demonstrert vun nu an

Joon Maat Jan