Maat Jan simmeleert över

Söte Stoff un sure Tieden

An mien dütschet Volk:

Leeve Fans vun Christian Lindner, Alice Weidel un Helene Fischer!

Seggt mol ehrlich: Markt ji noch wat? Irgenswat?
Wenn ji in ehren Plasma-TV de Visagen ankiekt, de jo de nächsten veer Johr bescheeten, inlullen un an ehre Millionärs-Fründe för doof verköpen dröft?
De Laschets, Günthers un Kramp-Karrenboers, de Lindners, Hofrieters un Göring-Eckarts, oder wie ok jümmers de Strohballen heet, de se us to'n Wählen vörsett?
Ick meen gor nich de unner jo, de nix dorför kunn. De ünnerbetahlten un ünnergebildeten, de nienich op en grönen Twieg kaamt un op End Merkel wählt, bloß üm eenmol bi de Gewinner to ween.

Kompetenzvördeel vun de CDU nor Politbarometer u.a.:

Sozialet 0%
Ümwelt 0%
Freeden 0%
Strotenbuu 73%

STRO-TEN-BUU?????? Dor kunn ick jo glieks mien Auto to'n Wählen schicken! Man mien Auto wöör sik denn villicht nich för mehr Straten entscheiden, sünnern gegen den E10-Sprit, de den Motor tweimaakt. Jahaaa, ok Autos köönt ünnerscheedlich Interessen hebben! Ünnerschätzt de man nich!

Düt blaugeele Auto wählt natüürlich FDP — för mehr Stroten!

Wat heet eegentlich dat "E10"? En Farvstoff is dat nich, anners wöör dat jo E100 heten. Man ok kien Geschmacksverstärker. Stimmt, 10% Ethanol in'n Sprit, dat heet dat. Ethanol is Ethylalkohol, also Snaps. Wunnen warrt de tomehrst ut Regenwooldvernichtung. Hmm, wöör mien Auto also för de Ümwelt wählen — oder för mehr Stroten? Ick glööv, ick wähl doch lever sülbst...

Düt roodgröne Auto dorgegen is heel öko un fohrt bloots
mit minschliche Muskelkraft — trotz Breitreifen!

Fies: Woso dröff en Auto ünner Alkohol fohrn, de Fohrer over nich? Wenn ick teihn Perzent Ethylalkohol heff un denn noch an't Leven bün, kasseert mi de Udels — ok wenn dat Bio-Ethanol weer! Bi mien Auto fördert dat de Staat! Wat seggt t.B. de CSU to so'n Ungerechtigkeit? Dor mutt mal wat passeern!

Jaja, dat Eten, dat fangt ok bi uns Minschen mit E an, un ganz mit Recht. Dat heet jo "Du büst, wat du ittst" — man wat is dat? In de meesten Leevensmittel sünd mehr Soken in, as op dat Etikett passt. Dorum gift dat E-Nummern.

E100er-Nummern hevvt ton Bispeel Farvstoffe,
E200er-Nummern hevvt Konservierungsmiddel,
E300er sünd Antioxidationsmiddel,
E500er sünd Rieselhülpen,
E900er Söötstoffe un
E600er Gesmacksverstärker.

E605 — heel gesmackvull!

As ick noch lütt wor, har jedeen Goornbesitter E605 in't Hus. So ok mien Opa. De hett jümmers över dat Eten meckert. "Dat schmeckt nich mehr as fröher", hett he seggt. Mien Oma kunn don, wat se wull, jümmers heet dat "Dat schmeckt nich mehr as fröher!" Jichenswenn hebb ick bi em de Buddel E605 funnen. Ick wusst jo: 600er-Nummer, also Gesmacksverstärker. So hebb ick em unopfällig so'n beeten wat dorvun in de Suppe don. Un wohrhaftig: He hett nienich mehr över dat Eten meckert.

Dat so veel Tüg in us Leevensmiddel kümmt, verdankt wi jo us Politikers, de sick standhaft gegen mehr Kontrollen un Utteeknungen wehrt. Man wat för Tosatzstoffe brukt de eegentlich?

Dat de FDP wedder dor is, kunn bloß een Grund hebben: Se enthält Konservierungsstoffe. De Konservativen sowieso. Brukt Martin Schulz eenfach mehr Farvstoffe gegen sin Farvlosigkeit? Oder brukt de eher de Grönen, dormit se tominnest nor buten wedder grön utsicht? Brukt Gauland Rieselhilfen gegen Verkalkung? Oder Glutamat gegen sine Geschmacklosigkeiten? För allens dat gifft dat en E-Stoff! Wat Merkel brukt, is klor: Söötstoffe! Gegen bittere Wahlergeevnisse.

Over um ehrlich to ween: Beneiden do ick Merkel nich. Schon ut een Grund nich: Se is een Fro. Dat bedüüdt,

1. dat Froons, so lang as se dor is, CDU wählt un
2. dat se wohrschinlich al mol angrabscht worrn is.

Ünner #metoo kunn jedeen dat Elend sülbst sehen. Egal ob Putzfro oder Ministerin: Achter de Kulissen warrt ok op de Chefetagen begrapscht un befummelt as op en Bazar in Kairo. Un rutkomen is dat nu bloß, wieldat en Hollywood-Produzent sämtliche Froons op sien "Besetzungscouch" dwungen un ok anners begrabbelt hett. In Hollywood överrascht een jo eher, dat bloß een Produzent dat angeblich so mokt hebben schall...

Tominnst warrt dor nu över schnackt. Un as jümmers galoppeert mennicheen Politiker vöran. Ok Katharina Barley, use wohl-noch-amteerende Froonsministerin. De geißelt sünnerlich "dat Hand-op-Knee-Leggen". "Dor möt wi juristisch scharper warrn", meent se.

Knee anfaten? Vörher Afkaat anropen? Wohrschuug, Herr Dokter!

Ton "Juristisch-scharper-Warrn" empfehl ick en Blick nor Saudi-Arabien. De kennt dor twoors meist gor kiene Froonsrechte, man juristisch scharp sünd se allemol. Dor is de Hand ok fix mol af, wenn se sick an'e falsche Steed verirrt hett! Un dat to Recht! Wi weet jo, wo veel Bakterien op so en Hand sitt. De jumpt denn all op de Froo över, fix kriggt se en Verköhlen, warrt krank un kann nich na de Vörstandssitzung gohn.

Wat, in de mehrsten Vörstände gifft dat gor kiene Froons?
Also leeve Froons, dat deit mi nu leed, man dat Problem köönt wi nu wohrlich nich ok noch för juuch lösen.

Dat beduurt

Joon Maat Jan

Dorop en Sluck E10!