Maat Jan simmeleert över

Op- un Afbruch

Spöört Se dat ok? Dissen Opbruch?
Wi hebbt wedder en neede Regeerung. Egentlich de ole — en nee ole — op jeden Fall en Regeerung! Wat hebbt wi ehr vermisst... Tominnst de Kabarettisten. Över Monate möten se ehre Döntjes sölvst moken. Nu geiht over los, nu kummt "Een neede Opbruch för Europa" — so heet de Koalitionsvertrag. Merkel un Macron hebbt sick ok al dropen un Kund don: De neede Opbruch vör Europa... fallt ersmol ut!

De düütsche Politik weer opletzt so beschäftigt mit Groko-Verhanneln, dat se för Europa noch keen Tied har. Dat heet: Wiel dat den "needen Opbruch för Europa" givt, givt dat in Wohrheit ersmol keen Opbruch för Europa. Un dat in en Tied, wo us Europa anfangt üm de Ohren to fleegen. De Briten sünd rut, de Ungarn wüllt rut, de Italiener weet nich, wat se wüllt, man wiss nich Europa. Bloots de Düütschen sünd so mit ehren "Opbruch för Europa" togang, dat se den Afbruch in Europa gor nich mehr mitkriegt.

Tominnst de SPD will sick nu "erneuern". Is jo nich so, as wenn se dat nödig har. Ick segg jümmers, de SPD is dat AC/DC ünner de Parteien: oolt, dement un up beid Ohren doof. Doof natüürlich in de Bedüden: "taub". Ofschoonst, äh...

Naja, also dorüm will se sick nu erneuern. Wat hett jüst noch een ut'n Vörstand seggt: "Wi möt jünger, weiblicher un internationaler warrn." Wekeen wer dat noch, de dat ut de SPD.....

In en Tied, wo jedereen sik Naam, Geslecht, Huutfarv un Naschoon
sülven utsöken un sik dorna trechtmaken laten kann — in so en Tied
kann dat doch keen Probleem för de SPD sien, t.B. weiblicher to warrn?
Eenfach Geslecht ümwanneln — oder villicht sowat Androgynes....

Ach nee, dat weer jo gor nich de SPD, dat weer de Müller vun VW. Aver wenn een in Niedersachsen wohnt, is dat sowieso keen Ünnerschied.

De SPD-Spitze het sick ok al bannig erneuert, mit lauter heel neede Köpp, de wi noch nienich sehn hefft: Andrea Nahles, Olaf Scholz, Heiko Maas ...

Een is wohrlich need: Svenja Krause is nu Ümweltministerin. De hett twoors wiss nich all Kugeln an'n Reaktor, dorför is se en langjährige Fründin vun Andrea Nahles. Ick meen, wenn een över Johr befründt is mit Andrea Nahles, denn is so een Ministerposten bloots noch Schmerzensgeld. Wichtig is, se is en Fro, ut NRW — un hett keen Schimmer vun Ümweltpolitik. Dat dröppt sick good, denn in'n Koalitionsvertrag kaamt Klima un Ümwelt praktisch nich vör. Fachliche Unkenntnis is sowiso in de letzten Johren to de wichtigst Qualifikation in de Politik worrn!

Merkel hett ok een Needen — in ehr Kanzleramt. Helge Braun heet he un is Narkosearzt. Dor is he in dat Kanzleramt jüst richtig. Merkel will jo ehren egenen Rekord breken: 12 Johr in't Wachkoma — dor geiht noch mehr!

Ääähh — Pardon — ick verstah nich ganz: Woto bruukt wi en Narkosearzt,
wenn wi Merkel hebbt? Ik meen, dor warrst doch vun sülven ganz möööööd... chrrr... zzzzz...

Eerst Altmaier, nu Braun — twee gewichtige Herren. Merkel höllt dat mit Julius Cäsar: "Laat dicke Mannslüü üm mi ween!" Wenn de Gabriel nich so dull afnomen harr, weer he vellicht noch Minister. — Aver wenn Merkel Cäsar speelt, wekeen speelt denn Brutus?

Vellicht Jens Spahn, de neede Minister för Volksgesundheet un Propaganda. De weet nämlich: Hartz IV is gesund! — Europa, meent he, is dorgegen nich gesund un mutt siene Afwehrkräfte stärken — klor, is jo ok Grippe-Tied.

Den Brutus speelt wiss nich Andreas Scheuer, us needet Verkehrshindernis vun de CSU. De is nämlich "bannig inföhlsom un denkt foken toveel na". Schrifft de "Bild".
Goot, in Vergliek mit en "Bild"-Redakteur is sogar Godzilla inföhlsom un denkt veel na...