Maat Jan ut BremenMaat Jan seggt:

Wohltied!


Endlich wedder Wohltied. De letzte Bundsdagswahl is all twee Johr her, dor kriggt mennigeen Enttoogserscheinungen — wunnerlicherwies jüst de, de bi Wahlen toletzt nix to Lachen hatt harrn: De Sozen. Bi de SPD sünnt se intern all wedder in'n Wahlkampfmodus. Se wullen en needen Parteichef wählen. Und se doot allns, dat möglichst lange spannend to moken.


Se söcht en Chef? Enen Chef??? Nee, en Poor Chefs! En Duo!

Dat heele Johr treckt sick de Prozedur hen. Wunnerlich is ok, wo dat Parteivolk dorup reageert: Bi de Union ehre Vörsitzendenwahl weern de Lüüd gor nich mehr to hollen, so harrn se sick freit, dat se ok mol wat entscheiden kunnen. Ok wenn dor bloß Jens Spahn, Fidi Merz und AKK in Angebott werrn.

Bi de Sozen geev dat veerteihn Bewerber, fien indeelt in söven Mann-un-Fro-Poor. Se mööt sick also egentlich dree- oder veermol mehr frein. Man wat deit de Basis? Mosert rüm över de Kandidaten, över dat Verfahren, över allns un jedes.

Dorbi weern dor so dolle Poorungen: Dor is to'n Bispeel Boris Pistorius. Güstern noch in Hannover ünnerwegs as Jäger vun dat verlorene Maschinengewehr, hüüttodaags al Kandidat för'n Parteivörsitz. Siene Partnersche heet Petra Köpping. Se is Staatsministerin för Integration in Sachsen un dormit anschienend ünnerfordert. Klor, wenn een süht, wo dull dat mit de Integration vun Flüchtlingen jüst in Sachsen klappt, denn frogt een sick: Wat mookt de Fro normiddags? Schod, dat bi de Partei so een schoinet Poor op End teemlich wiet trüchliggt. Un wat richtig bitter is: Se liggt sogor noch achter Gesine Schwan un Ralf Stegner.


Dat Schwans Hoor ok as Bröödplatz för bedrauhte Vagelaarten döcht, is en Bekenntnis to'n Aartenschuul!

Dat Duo is de SPD-Rentnerband: He is 59, se 76. Tosomen sünd se 135 Johr old. Also binoh so old as ehre Partei! Wenn se nu noch Kevin Kühnert adopteert, denn kummt se dor akkurat hen. Wenn he denn noch irgendwo en fründlichen Gesichtsutdruck finden dä un se een Frisör, denn kunn de Karriere losgohn. Man vellicht hett he sien Lächeln ok verköfft as Tim Thaler in de ole Geschicht vun James Krüss. Mag ween, Angela Merkel hett dat vun em köfft — und bloß verkehrtrüm opsett. Over ick glöv, de Wohrheet is veel eenfacher: He is nu mol en Sozi, dor hest du nix to grienen. Wenn du de beiden schnacken höörst, denn sünd se jümmers up'n Loopenden vunwegen Digitaliseerung, Klima un allns. Alltied paraat un "de Tokumst togewandt". Bloß dat mit dat Uperstohn ut Ruinen, dat mööt se eerstmol henkriegen.

En anner schoinet Poor sünd Karl Lauterbach un Anita Scheer. Se kämpft gegen dat Insektensterben, he driggt Fliege.

Ober nu is kieneen vun de in dat Stechen komen. Bloß Olaf Scholz mit en Fro Geywitz ut Brandenburg un Norbert Walter-Borjans mit siene Partnersche Saskia Eskens. De kiekt in de Kameras as en Lehrerin, de jüst "För mi is dat ok de sösste Stunn!" seggt hett. Ehr Partner, de "Nowabo", süht en beten ut as en Krüüzung ut Nacktmull un Bookholler. De twee sünd nu de letzte Hoffnung för dat de SPD wedder Wind in de Seils kriegt.

De Rest vun de Partei kriggt sick in de Twüschentied wiederhen gegensiedig in de Hoor. De een meent, Scholz weer "unglaubwürdig", de anner find so en Ansicht "ünnerirdisch". Dat Stechen um den Vörsitz is nu bald vorbi, man dat Hauen un Stechen in de Partei nor lange nich.


Wat, dat is de Regeerung, de dor bröödt? Niege Ideen? In Schwans Hoor?!

Wat mookt egentlich de Regeerung? De is fix an Ideen utbröden. Uns Bundsweertschapsminister Peter Altmeier to'n Bispeel plaant en düütschen Weltraumbahnhoff. Wo wi nich mol en stinknormalen Flooghaven in use Hauptstadt hinkriegt. Wo süht so en Weltraumbahnhoff överhaupt ut? Fohrt dor ok Nahverkehrstöög? Oder Nahverkehrsruumscheep? So för eenmol üm'n Maand un weer trüch mit Wekenendticket? De Idee vun Peterchens Ruumfohrt klingt twoors bekloppt noog, is ober gor nich vun Altmeier. Em kummt dat bloß topass, dor buten in't All meckert tominnst kieneen mehr an em rüm. Na siene letzten Snapsideen mit Bankenfusion, "nationale Champions" un Mindstafstänn för Windrööd kunn he en Uttied wiet weg wohl goot bruken. Un wi ok. De Idee för den Weltraumbahnhoff kummt vun 'n BDI. De wüllt sowat gern buun. Natürlich bloß, wenn de Staat dat betohlt. Un bi usen Bundswimi mach dat ween, dat wi dat tatsächlich mookt. Denn weet de grönen Männchen tominnst endlich, wo se utstiegen mööt. Bit dat bi us welk ankaamt, mag dat ober noch 'n beten duurn. Bedreven warrt de Weltraumbahnhoff nämlich vun de Düütsche Bahn.


Weltruumbahnhoff vun de Düütsche Bahn: De Tokumst vun de Ruumfohrt!

Ok för Autofohrer schall nu allns anners wern. Wi fohrt nu bald autonom. Dat heet, wi sitt an't Stüür, doot ober nix. Dat mookt allns de Computer. Woto dat good ween schall, hett mi nu en Experte verklort: Dat is wegen de KI. KI is nich de neede Audi, dat heet "künstliche Intelligenz". Dat Auto wart nu künstlich intelligent. De Fohrers nich, de blievt mehrstendeels naturblööd.

KI, dat is de Megatrend in Silicon Valley. Dor hebbt se Johr för Johr an forscht un de Computers jümmer künstlich intelligenter mokt. Bit de Maschinen so intelligent weern, dat se för keen Orbeit mehr to bruken wern. Dor hebbt de Entwickler sick froogt: Wat mookt wi nu dormit? In de Sprok vun de Computerfritzen heet dat, se harrn en "Killertechnologie" söcht. Wat, woto se KI bruken un wo se Geld mit verdeenen kunnen. Un dor sünd se up dat autonome Fohren kamen. Dat hebbt se fix utprobeert un harrn markt, dat is wohrlich en Killertechnologie. De Technik funktioneert, dor loopt bloß af un to Minschen över de Stroot — un denn...

De mehrsten Minschen sünd nu mol mit en intelligente Technik gor nich kompatibel. Dat autonome Fohren hett jo Vördeele, besünners för ole Lüüd, de nich mehr fohren köönt un doch nich dormit ophören wullt. Man jüst de olen Lüüd sünd de letzten, de freewillig in en autonomet Auto instiegen wüllt. Welkeen bruukt anners autonomet Fohren? Heel eenfach: Suupköpp, Kiffers, Rasers, Föhrerschiendörfallers.... Kort: Minschen as du un ick.

Dat gifft jo nich bloß intelligente Autos, sünnern ok intelligente Textilien. Man dor is för mi Sluss! Ick will nich, dat in mien Ünnerbüx mehr Grips in sitt as in mien Kopp! Ick meen, ick bin en Mann! Dat heet, bi mi is dat vun Natuur ut all unentschieden.


Intelligente Ünnerbüxen sünd gar nich so en plietsche Idee.
Over Hööfdsaak, de Inholl blifft dumm, denn dumm f*** good!

Man wenn miene Büx nich mehr togeiht un ick segg "Oh, de Büx is inlopen!", un de Büx seggt "Nee, du büst to fett!", denn geiht mi dat to wiet mit de KI.

Meent

Maat Jan


Bildquell Ünnerbüx: hier

28.11.2019

 


na baven