Maat Jan warrt keen...

Netflix-Kieker

Mien Süster ehr Jung hett mi to Wihnacht en Netflix-Abo schenkt. He seggt, dormit kunn ick in't Fernsehen kieken, wat gor nich in'n Fernsehen kummt. To'n Bispeel Wednesday. "Un wat kummt dor den Rest vun de Week?", frog ick. Dor hett he mi bloß dösig ankeken. Wednesday heet nämlich nich bloots Middeweek, so heet ok de lütte Deern ut de "Addams Family" vun fröher. Kennt Se villicht noch, disse Familie, de utsüht as en Geisterbahn op Bedreevsutfloog. De ehr Deern hett nu ehr egen Serie — up Netflix.

Geistige (achtern) un liefliche (vörn) Nohrn vun Netflix-Kiekers

Un de is bannig erfolgriek. In eene Week harrn Netflix-Kieker de 340 Stunnen lang ankeken. Dorbi hett de Week bloots 168 Stunden! In een Week hebbt de Netflix-Kiekers also twe Weken Netflix keken. Dat heet natürlich ok: Netflix-kiekers warrt tweemol so fix öller as anner Lüüd.

Un sowat hett de Bengel mi schenkt!

Ick hebb dat heel ruhig mit em diskuteert. In all Roh hebb ick em verkloort: "Hör mol, du undankbaren Rotzblaag, kunnst dat wohl nich aftöven, dat ick den Löpel afgeven do, du oll erbschleicherisch Ekel!"
Nee nee, meent he, dat weer doch nich meent, dat weer bloots dormit ick mi an Land nich langwielen do.

Dor weer ick denn doch kort dorvör, mi uptoregen.
"Langwielen?", frog ick, "wokeen langwielt sick hier? Langewiel is wat för Idioten!"

"Man een möt doch Netflix hebben", meen he verbaast. "10 Millionen Düütsche kiekt Netflix!" Dor hebb ick mi denn doch freut. Nu weet ick endlich, wo veele Idioten dat in Dütschland gifft.

Sicht op en dörsnittlich Netflix-Kieker-Bregen