Maat Jan mal as Besserwessi:

Radwannern un noch mehr — in Thüringen

Ik denk faken: Wat'n Glück, dat een vunwegen dat Sächseln nich allens so nau verstahn kann, wat de Thüringers seggt! Leider schrievt se dat avers ok op. In't Internett. Tja — dat mit de Digitaliseern geiht ja man lnagsam in ganz Düütschland — un ok in'n Oosten kümmt se nich recht vöran. Dorüm hett sick ok de Websiet „thueringen.de“ noch jümmers nich an de niegen (politischen) Verhältnisse in't Land anpasst.

Dor mutt ik denn ut'n Westen mal wedder nahölpen! Hier köönt Se kieken, wat för Soken op disse Websiet staht — un wo de in Tokunft klingen mööt:

Oolt:
In't Utland warrt use Friestaat hooch schätzt vunwegen siene Marktföhrers in'n Middelstand.
Nieg:
In't Friebad wart en Utländer op'n Sprungtoorn hooch hetzt, wobi de Föhrer in de Midd stunn.

Oolt:
Na en Kranunfall… wiest sick Ministerpräsident Ramelow bestürzt.
Nieg:
Na en Wahlunfall wiest sik, dat Ministerpräsident Ramelow stürzt.

Oolt:
Ministerpräsident Ramelow hisst de Regenbagenflagg vör de Staatskanzlie.
Nieg:
Ministerpräsident Ramelow warrt ut de Staatskanzlie hisst för de Regenbagenflagg.

Oolt:
De niege Vereen sett sick för de Rechte un de apentliche Sichtborkeit vun queere Lüüd in.
Nieg:
De niege Vereen sett sick för Rechte un apensichtlich verquere Lüüd in.

Oolt:
Laat Se sick ehre individuelle Route bereken un kaamt Se dör Thüringen up't Rad!
Nieg:
Laat Se sick ehre individuelle Rute breken un kaamt Se in Thüringen ünner de Rööd.

Oolt:
Ok in usen Friestaat woorn in de verleden Johr de Kries gemeensom wuppst.
Nieg:
Ok use Rieksstaat woor in de verleden Johr fies gemeen betuppst.

Oolt:
Lüüd ut de heele Welt sünd in Thüringen tohus.
Nieg:
Lüüd ut Thüringen söökt in de heele Welt en Tohus.

Familie vun Thüringern op de Flucht — soooo trurig!