Maat Jan un sien Generaschoon...

Bumm Bumm Boomer

Annerletzt har ick dat hild un heff mien Toog jüst so eben noch kregen. Man bi't Instiegen bün ick mit en jungen Mann tosomenstött. De Mann har en lütt Kind op'n Arm.

„Oh, deit mi leed, dat wer keen Afsicht“, heff ick furts seggt. De junge Keerl kiekt mi an un zischt denn „Is nich so schlimm – Boomer!“

Opeens weer dat hele Afdeel musenstill. Ick kunn de Blicke vun all de annern Fahrgäste op mi spören. De Jungkeerl betüter sien Kind, dat kort opwacht weer, man nu fix wedder inslööp. „See hebbt wohrschienlich keen Kinners“, seggt he to mi. „Oder?“

„Nee, mien Fro un ick harn us so wecke wünscht, man jichtenswie..“
„Al klor“, grient he, „jümmers bloß an sick sölbs denken.“

„Jo nu“, segg ick verlegen, „dorför betohlt wi jo ok mehr in de Pleegversekern...“
„Pleeg?!“, bölkt he, „Wat weet een as du vun Pleeg?“

„Is jo god“, versök ick em to begööschen, „man dissen niegen Boomer-Soli, wenn he denn kümmt, wull ick gern betohlen. Jüst as dissen annern Soli för de Minschen ut'n Osten, de en Diktator ehr Frieheit wegnahmen hett. Ji hebbt jo sotoseggen ok en lüdden Diktator, de jo juun Frieheit wegnehmen de...“

„Typisch!“, meent he, „Se meent, se kunnen sick eenfach frieköpen! Dorbi sünd Kinners use Tokunft!“
„Wiss, wiss“, geev ick to. „Man op End har ick jo ok arbeidt för mien...“

Dor speelt de Tokumst

„Och sooo! De fiene Herr hett arbeidt! Jümmers fien buckelt, wat? Fix Karriere maakt, fett Geld verdeent un denn ok noch fette Rente. Unseen dorgegen...“

„Na good, ja, ick geev to, ick heff ok Geld dormit verdeent. Un jo, ok in de Rente inbetahlt. Dorum schall jo miene Generaschoon vör de Rente nu een soziales Johr leisten...“

„Een Johr? Een Johr? Ick heff mi nu all dree Johr üm den Lütten kümmert. Kita-Plätze gift dat keen, dorum duert dat söss Johr, bit dat he tominnst den halven Dag na School geiht. Un ick do dat geern!"

„Nu good“, segg ick, nadem dat de annern Fahrgäste to End applaudiert harrn, „Dat is natürlich grootorrig vun Se. Man so'n soziales Johr, dat kunn een jo ok bi de Bundswehr afleisten. Un villicht warrn wi denn jo as Fredenstrupp na de Ukraine schickt. Un wenn de Russe denn doch kümmt... denn wart sick de Boomer-Fraag vun alleen lösen.“

De Rollator- und Rolli-Rentner gegen de Russen!

Dat hett em inlücht, un mit en anerkennenden Nicken lett he mi ohn wieder Snackeree utstiegen.