Hochwater: Maddin sien Schangs

vun Jens-Peter Bey

Maddin, kiek di üm. Schulz, dat is dien Schangs. Wat en richtigen Sozi-Vörsitter is, schull mit Flootwater döfft warrn. Mütt ja nich immer Elv un Oder sien, womööglich reckt dütmal de Oker. Wenn dat Water överswappen deit, is dat de grote Stünn för Politik. Vun Schmidt wüllt wi nich schnacken, vunwegen de Pijetät. Aber weeßt du noch wie dien Vörgänger Platzeck as Diekgraf tweemal groot rutkamen is? Eenmal in Gummistebeln mit ehrliche Arbeit un dat tweete Mal as Oppasser för de Kanzlersche, de as so’n Poch de Ledder hochklattert is un över de Floot-Muur schult hett. Du magst dat glöben oder nich. De Oder hett sik bannig verfehrt un ophört antostiegen. De Innerste lött sik nich so licht bändigen. Dor kann de MP Weil sien besten Antog antrecken un de schönste Krawatt vörwiesen. Dat mag för de Beschieters vun VW passen, de gresige Water-Not is so nich bitokamen.

Nanu, sünd de Gummistebeln to groot för Maddin?

Wo wi jüst dorbi sind: Op de Jagd na schöne Billers un gode Ideen kunnst du di ok ’n lütt beten an’n Reemen rieten, Maddin. Mag ween, dat dor ok noch dat een oder anner Problem in Dütschland, Europa un in de Welt op di luert. Schusst bilütten mal den Achtersen hoch kriegen un nich blots as so’n Kanink op Angela schuln. De is as Slang nich to bruken. Mit en poor Ideen för de lütten Lüüd kunnst du ehr liekers den Rang aflopen. Dat sünd de, de sik Dag un Nacht afmarachen dot, jüst so as de Hölpslüüd bi’t Hochwater. Mark mol wat, Maddin, ward Tied!